بسم الله الرحمن الرحيم
السلام عليكم ورحمة الله وبركاته
اليوم جبتلكم طريقة حلوة وسهلة لعمل عجينة الباستا الاساسية
ومنها ممكن تعملوا اي شكل بدكم ياه من المعكرونة
نجي للمقادير
بسيطة وموجودة بالبيت على طول
2 كوب طحين متعدد الاستعمالات
رشة ملح عليه
و 3 حبة كبيرة بيض
و2 ملعقة كبيرة زيت زيتون
نحط الطحين على سطح الرخام .. ونعمل حفرة بالوسط
ونرش الملح
ونحط بالحفرة البيض والزيت
ونبدأ بلم الطحين شوي شوي الى الوسط
ونعجن
حتتكون عندنا عجينة متماسكة وصفرا
نتركها لمدة نص ساعة ملفوفة بالنايلون ترتاح
وبعدين نبدأ برقها
انا استعملت لرق العجين الة يدوية تستعمل لهذا الغرض
ولكن لو مو متوفرة عندك عادي ممكن ترقيها بالشوبك
وبتعطيكي نفس النتيجة بس تنتبهي لسمك الرقاقة تكون نفس سمك المعكرونة العادية الي بنشتريها مغلفة
طيب
وبعد ما نرقها اول مرةعلى السماكة الكبيرة
نخفف السمك
و نطويها على بعض ونرق اكتر من مرة
وبكل مرة نخفف من السمك
لحد ما تصبح بالسماكة المطلوبة
وبعدين نقطعها شرايط طويلة وتكون فتوتشيني راقية ورهيبة
ونسلقها بالماء المغلي مع الملح وعادي بس رح تاخد وقت اقل بالسلق من الجاهزة
وكمان لا تحتاج الى وضع زيت بماء السلق
يعني اول ما نحطها بالماء المغلي رح تنزل للقاع متل كل المعجنات وبعد دقيقة رح تطفو على السطح
ونتركها حوالي من 3 الى 4 دقيقة
وبعدين نصفيها
(نصيحة ) ادرسي وقتك ونظميه بحيث انك تكوني عاملة الصلصة قبل وقت ولما تشيلي المعكرونة من ماء السلق حطيه فورا على الصلصة المحضرة
وهيك بتكون النتائج مذهلة وافضل من انو تتركيها وبعدين تحضري الصلصة .....
وكمان لا تحتاج ابدا الى غسل بعد السلق
اتركيها بالملح الي عليها وحاولي ما تكتري ملح بالصلصة وبعدين عدلي الطعم حسب الرغبة
انا عملت صلصة وهي
شوية زيت زيتون وبصلة وحص ثوم وملعقتين معجون البندورة
وكمان رشة ملح خفيفة وفلفل وريحان مجفف واورغانو مجفف
ولو عندك طازج كمان حطي من الورق شوي
وطحنتها مع بعض بالخلاط
وحطيت منها في المقلاة ...
ونزلت عليها شرايط الفتوتشيني
وقلبتها
ومعها شوية زيت زيتون وكمان شرايح الزيتون
وممكن تزودي اعشاب متل ما بتحبي
تقلبيهم مع بعض شوي ...وتعدلي الملح والطعم حسب الرغبة
وتقدم
وبالاخر حتشوفوا انا كيف قدمتها
*************************************************
وهلق رح نحكي على الرافيولي
الحشوة ... شوية جبنة فيتا .. وشوية جبنة شيدر مبروشة وشوية بقدونس مفروم
خلطتهم منيح مع بعض
وهون صورة خلط الفتوتشيني
وكمان لحشوة الرافيولي
واستعملت نفس العجينة عملت نصها فتوتشيني
والنص التاني تركته للرافيولي رقيته منيح وطويته كزا مرة
اطوي وارق واطوي وارق لحتى وصلت للسمك المطلوب ...
ممكن تلاحظو انو لما ترقوها في المرات الاولى بتتشقق
مو مشكلة تابعو الرق والطي وحتلاقوها زبطت بعدين وصارت ملساء وناعمة ومتماسكة
وبعدين..نمد الرقاقة وتكون طويلة شوي
ونحط كتل من الحشوة المحضرة
وبفرشاة فيها ماء نمررها على الحواف حتى تلزق معنا
ونطوي العجين على القسم الاول ونحاول بالايد نطلع الهوا من القطع.. بالضغط الخفيف حول الحشوة
ونقطعها بالقطاعة الخاصة تبع الرافيولي لانها بتقطع وتلزق الحواف بنفس الوقت
وبتكون زكزاك
وبعدين نسلق المربعات عادي وكمان اول ما نحطها بالماء المملح المغلي رح تنزل للقاع وبعدين تطفو على السطح نتركها حوالي 4 الى 5 دقائق...( اكتر من الفتوتشيني بشوية وقت لانها طبقتين من العجين )
وبعدين نحطها مفرودة ومتباعدة في طبق الى حين موعد التقديم
التقديم
لازم نقدم الاكلتين من النار الى الطبق فورا
فننظم الوقت على هذا الاساس
اولا الفتوتشيني ..... تكون متقلبة مع الصلصة وجاهزة بس نحطها بالطبق ونرش عليها شوية ورق زعتر او ريحان او اي اعشاب انتي بترغبيها
وعليه كمان رشة من الجبنة البرميزان المبشورة وشوية صنوبر محمص
وممكن شوية حبات من البندورة الصغيرة.....cherry tomato
اما الرافيولي ممكن تعمليه مع اي صلصة بتحبيها
الكاربونارا او الطماطم
او الاعشاب او البيستو
وانا اليوم عملتها بسيطة كتير
بس نسيح زبدة ونحط فيها اعشاب مجففة لاني للاسف ما لقيت اعشاب طازجة
يعني لو الطازجة موجودة تبقى افضل
ولما تسيح الزبدة
نحط عليها مربعات الرافيولي
ونقلبها على الطرفين
ونقدمها وعليها رشو بارميزان وشوية صنوبر محمص وكمان شوية اعشاب
ولون جميل من البندورة الصغيرة
بالف صحة وهنا وعافية طبقوها ولا تخافوا اكلة ناجحة 100% .. ومناسبة للذوق العربي الشرقي
والاولاد حيحبوها كتير
وانتي مبسوطة انهم بياكلوا شي طازج لسا خيرو فيه ..............
اختكم ..... ام اليمان
لا تنسوني من صالح الدعاء لي ولعيلتي
الروابط المفضلة