نصائح مطبخية
كل سنة وأنت طيبة.. طبعا دلوقتي واقفة في المطبخ عمالة تجربي تعملي أكلات أشكال وألوان علشان العزومات ...
بس للأسف ساعات كتير وأنت واقفة في المطبخ بتلاقي مشكلة طلعت لك كده من تحت الأرض زي مثلا إن الأكل يطلع مالحه زيادة شوية..
أو يلزق منك...أو يطلع طعمه مش مضبوط شوية وما يطلعش زي ما كنت عايزة...
في الوقت ده بتقعدي تفكري وتدوري على إيه اللي أنت عملتيه غلط علشان الأكل يطلع بالطعم ده
وما تبقيش عارفة تتصرفي ازاي...
المشكلة الأولىساعات كتير اوي لما تيجي تسلقي المكرونة تلاقيها لزقت مع بعضها أو في الحلة اللي بتسلقيها فيها وطبعا لو حد سألك ليه المكرونة لزقت منك كده هتقولي أصل الظاهر إن نوع المكرونة مش حلو...
المكرونة لزقت
وعلشان ما تتعرضيش لمشكلة زي دي تاني يبقى لازم تحطي نص كوب زيت ومعلقة ملح في المة اللي هتسلقي فيها المكرونة وما تحطيش المكرونة إلا لما المية تغلي كويس...
كمان بعد ما تسلقي المكرونة اغسليها وسيبيها في المصفاه علشان تصفي ميتها وياريت بعد كده تضيفي لها معلقة زيت وتقلبي بيها المكرونة كويس وده علشان المكرونة ما تلزقش مع بعضها.
المشكلة الثانيةممكن تعملي طبق سلطة وتسيبيه لمدة نص ساعة لغاية معاد الأكل ولما تيجي تاكلي تحسي إن السطلة طعمها متغير زي ما يكون حامض أو إن الخضروات شكلها دبلان في الطبق
سلطة الخضروات طعمها مش حلو
وعلشان تتجنبي المشكلة دي يبقى يا ريت ما تحطيش على السلطة عصير ليمون أو ملح إلا وقت الأكل لكن لو حطتيه قبل كده فده بيخلي طعم السلطة يتغير والخضروات تتبل...
ويا ريت كمان بعد ما تعملي طبق السلطة تحطيه في التلاجة لغاية معاد الأكل.
المشكلة الثالثةمن الحاجات اللي ممكن تقابلك وأنت في المطبخ وتكوني مش عارفة تعملي إيه هو أنك تلاقي إن البيض وأنت بتكسريه وتحطيه على أي حاجة بتعمليها طلع فاسد، في الحالة دي بتلاقي نفسك مضطرة ترمي كل المقادير التانية اللي عندك وتبتدي من أول وجديد...
البيض طلع فاسد
وعلشان تتخلصي من المشكلة دي يبقى يا ريت تكسري البيض الأول في طبق على جنب ولو طلع حلو يبقى حطيه على باقي المقادير اللي عندك لكن لو طلع فاسد يبقى ارميه..
ويا ريت كمان لو هتستخدمي البيض في عمل أكل حادق يبقى يا ريت بعد ما تكسري البيض تضيفي إليه رشة ملح وفلفل وتخفقيه كويس، لكن لو هتعملي أكل حلو وهتستخدمي البيض يبقى يا ريت تضيفي إليه رشة فانيليا وتخفقيه بيها كويس..وده علشان تتخلصي من زفارة البيض ويطلع معاكي الأكل طعمه حلو زي ما أنت عايزة.
المشكلة الرابعةأوقات تانية كتير نفسك تروح على طبق بطاطس مقرمشة ولذيذة ولكن بعد ما تقلي البطاطس وتطلعيها من الزيت تلاقيها طرية وعاملة زي الفطير...
البطاطس مش مقرمشة
وعلشان تتخلصي من المشكلة دي وتحصلي على البطاطس المقرمشة اللذيذة يبقي يا ريت بعد ما تقشري البطاطس وتغسليها وتقطعيها تنقعيها في ميه مضاف إليها معلقتين ملح ومعلقتين خل وسيبيهم لمدة ساعة وبعد كده اقليها في زيت بس لازم في الأول تخلي الزيت يسخن كويس على النار لأنك لو قلتيها في زيت غير ساخن هتمتص الزيت وهتطلع طرية.
المشكلة الخامسةمن المشاكل اللي ممكن تقابلك مشكلة "عفن الخبز" خصوصا مع الحر الشديد اللي احنا فيه..
عفن الخبز
وعلشان تتخلصي من المشكلة دي يا ريت أول ما تجيبي العيش لو كان لسه ساخن يبقى تهويه كويس وبعد كده تحطيه في كيس نايلون ناشف وتحطيه في التلاجة، وبكده ممكن يعيش معاكي لمدة أسبوع من غير ما يحصل له أي حاجة نهائي ولما تحبي تاكليه تطلعيه وتسيبه لمدة خمس دقائق وبعد كده تسخنيه في المايكرويف أو على البوتجاز .
المشكلة السادسةأوقات تانية كتير لما تيجي تحمري الفراخ أو اللحمة أو حتى السمك تلاقي إنهم لزقوا في طاسة التحمير وعلشان تتغلبي على المشكلة دي يبقى يا ريت تقدحي الزيت أو السمنة كويس على النار علشان لما تيجي تحطي أي حاجة هتحمريها ما تلزقش منك.
الفراخ أو اللحمة لزقت منك وأنت بتحمريها
المشكلة السابعةساعات بتبقي مفكرة إن عندك ليمون في التلاجة وعلى الأساس ده بتعملي الأكل لكن تفاجئي إن الليمون اللي عندك طلع ناشف ومفيهوش ميه كتير في الوقت ده يبقى يا ريت تجيبي الليمون اللي عندك وتحطيه في كوباية ميه دافية لمدة خمس دقائق وبعد كده تاخديه وتضغطي عليه بإيدك جامد وبعد كده تعصريه.
الليمون ناشف
المشكلة الثامنةلو حاسة إن السمنة أو الزبدة ليها رائحة مش حلوة يبقى أكيد أنت الغلطانة علشان سبتيها في التلاجة مكشوفة وده لأن الدهون بتتحد مع الأوكسجين الموجود بالهواء، ويترتب على كده الرائحة دي واوعي في الوقت ده تعملي بيها الأكل لأنها هتخلي طعمه مش حلو وفي الوقت ده مفيش قدامك حل غير إنك تشتري واحدة بدلها بس تخلي بالك إنك تقفليها كويس بالغطاء المخصص لها.
السمنة أو الزبدة لها رائحة مش حلوة
المشكلة التاسعةلو حاسة أنك كترتي من التوابل في الأكل يبقى في الحالة دي هاتي معلقة صغيرة لبن وضيفها إلى الأكل وهي هتخلصك من أي طعم زيادة للتوابل.
طعم التوابل طلع كتير في الأكل
المشكلة العاشرةبعد الوقفة طول النهار في المطبخ علشان تعملي طبق حلو يطلع في الآخر الطبق طعمه مش حلو خالص طبعا أنت ممكن تكوني مش عارفة السبب وهو ممكن يكون إن البيكنج بودر اللي استخدمتيه مدة صلاحيته منتهية أو اتعرض لرطوبة ففقد مفعوله...
طبق الحلو ما طلعش حلو
وعلشان تتغلبي على المشكلة دي ياريت تعملي اختبار للبيكنج بودر قبل ما تستخدميه والاختبار ده يكون بأنك تضيفي شوية من كيس البيكنج بودر إلى شوية ميه لو حدث فوران يبقى تقدري تستخدميه وأنت مطمنة على الآخر.
رد مع الاستدلال
الروابط المفضلة