ازيكن يابنوتات
أنا قلت أعمل لكم القايمة الخاصة بيا يوم بيوم علشان لو احترتم فى يوم وقلبتم فى ملفى يمكن تلاقوا حاجه تنور عليكن وأنا عارفه إنكن أستاذات طبعا بس أهو باحاول أتشعلق فيكن وأمركن لله
بصوا بأه أنا فاتنى أصور أول يومين لكن إن شاء الله بدءا من النهاردة حاهريكن صور واستحملونى بأه بس حاقول لكن إحنا فطرنا إيه أول يومين وماتقلقوش أكيد الأكل حايتعاد وحاصوره تانى إن شاء الله
بسم الله نبدأ
اليوم الأول :
خشاف : بلح وتين ومشمشية وقراصيا وزبيب ولوز وبندق وميه وسكر
عصير تمر هندى : تمر هندى منقوع ومغلى ومية وسكر
سمبوسك محشى جبنة مثلثات
كفتة مشوية : لحم مفروم وبصل ونعناع وملح وفلفل وشواية
بفتيك : لحمة شرائح وتتبيلة بصل ولبن وملح وفلفل وبعدين دقيق وبيض وبقسماط وتحمير فى الزيت
بطاطس كروكيت : بطاطس مسلوقة وملح وفلفل ومشكلة أصابع ومحشية لحمة مفرومة معصجة بالبصل والملح والفلفل ومتدحرجة فى الدقيق والبيض والبقسماط ومحمرة فى الزيت
شوربة شعرية محمرة فى السمن وعليها مرقة
والحلو كان سمبوسك محشى قشطة ومحمر فى الزيت ومسقى شيرة ومرشوش فستق مفروم
اليوم الثانى :
خشاف برضه
عصير تمر هندى
عصير سوبيا : بوردة سوبيا جاهزة ومخلوط معاها ميه ولبن
قطايف محشية جبنة بيضا
فراخ بانيه طبعا صدور فراخ شرائح رقيقة متبلة بالبصل واللبن والملح والفلفل ومدحرجة فى الدقيق والبيض والبقسماط ومحمرة فى الزيت
بطاطس كروكيت برضة
شوربة شعرية برضه
والحلو كان قطايف محمرة شكل قرطاس ومسقية شيرة ومحشية قشطة ومرشوشة فستق وقطايف محشية مكسرات ومحمرة ومسقية شيرة
وانتظروا بأه كل السخونة بدءا من النهاردة والصور اللى حاتنزل ترف عليكن من كل اتجاه
فاصل ونعود........
الروابط المفضلة