كبيبة الرز

**cliopatra** · 28-01-2008, 02:02 PM

السلام عليكم ورحمة الله وبركاته
كبيبة مصري بالرز والله جميلة جدا\ الوصفة الاولي\

المقادير
نصف كيلو لحم مفروم
تلت كيلو رز مصري
ملح وفلفل وبهارات \ بيض وزيت للقلي
الطريقة
اغسلي الرز وصفيه من الماء جيدا
حطيه علي اللحمه وحطي البهارات والملح والفلفل وقلبي جيدالحد ما يختلطوا
شكليها صوابع تخينة بمقاس الكبيبة العادية
ورصيها في حله رصي الصف الاول ثم الثاني فوقه وهكذا
اغلي شوربة وضيفيها وهي تغلي علي الكبيبة واحرصي علي الصف الاخير لا تصل اليه الشوربة
سويها زي المحشي
لما تبرد\ اغمسيها في البيض المضاف اليه قليل من الملح والفلفل
واقليها في الزيت الغزير
ملحوظة
اول ما تحطي الكبيبة في الزيت امسكي ملعقتين و لفيها علشان البيض يلف عليها ولا يفرش في القلاية
لو فكت الكبيبة في السليق عيدي تشكيلها واقليها
ممكن تعمليها بالرز المسلوق او الرز المتبقي\ الوصفة التانية\

يعني الرز المسلوق+ اللحمة المفرومة المستوية لوحدها فقط بدون اضافات + الملح والفلفل والبهارات\ وتقلبيها وتشكليها وتقليها\ لكن الوصفة الاولي اطعم
وممكن تعمليها بالرز المكسر\ الوصفة التالتة\

يعني تجيبي الرز وتغسليه وتجففيه في الهواء وتكسريه في المطحنة تكسير فقط
وبعدين نفذي نفس الطريقة الاولي\ لكن حطي الرز والحمة المفرومة والملح والفلفل والبهارات في الكبة دقيقة واحدة وبعدين شكلي واسلقي واقلي
وبالهنا والشفا
انا طولت في الكتابة علشان اشرح لكم ال3 وصفات لكن اختاري وصفة هتلاقيها سهلة ولذيذة

**cliopatra** · 28-01-2008, 02:07 PM

علي فكرة انا نسيت اقول لكم ممكن بعد ما تحطيها في البيض تحطيها في البقسماط
لكن بالبيض فقط طعمها احلي وكله حسب الرغبة

**ملك المالكى** · 28-01-2008, 03:34 PM

تسلم ايديكى يا كليوباترا
والله انتى شاطرة
انتى عارفة دى فى الصعيد بيقول عليها كباب
و بيعملوها بالقمح المطحون بدل الرز المطحون
وباقى الخطوات برضه تتسلق لما تستوى و بعدين تتحمر
فعلا مميزة وغييييييييير الكفته العادية و الكبيبة

**cliopatra** · 28-01-2008, 07:22 PM

كتبت بواسطة ملك المالكى

تسلم ايديكى يا كليوباترا
والله انتى شاطرة
انتى عارفة دى فى الصعيد بيقول عليها كباب
و بيعملوها بالقمح المطحون بدل الرز المطحون
وباقى الخطوات برضه تتسلق لما تستوى و بعدين تتحمر
فعلا مميزة وغييييييييير الكفته العادية و الكبيبة

السلام عليكم ورحمة الله وبركاته
ملوكة حبيبي تسلمي لي
انا اكلت اللي بالقمح دي زمان عند جدتي في البلد \ميت غمر\ الله يرحمها
وكانت مسوياها في صلصة \يعني لاسلق ولا قلي
بس بصراحة محبتهاش \اللي بالرز ومقلية احلي