شعار₪طبق متميز₪ كباب هندي ...من عندي .. مو من عند الهندي....
السلام عليكم و رحمة الله و بركاته:
كيفكن يا أحلى صبايا،من كم يوم عملت هالأكلة الطيبة و بصراحة ما بعرف ليش اسمها كباب هندي ، يللي بتعرف تقلي..
المهم شو بدنا بهالحكي ، بدكون عنب و للا بدكون تقاتلوا الناطور ،المهم أكلة طيبة هندي ..شامي..حلبي ..مو مشكلة.
المقادير:
*كيلو لحمة ناعمة للكباب....*أربع بصلات مقطعين جوانح
*فليفلة خضرا حلوة +ملعقة دبس فليلفة
*كيلو بندورة حمرا +ملعقة دبس بندورة
*ملح+ بهارات + فلفل أسود+سن توم مهروس
*ربع كوب زيت نباتي لقلي البصل
الطريقة:
*نضيف الملح و الفلفل و البهارات و التوم لللحمة و ندعكها جيدا" و نشكلها أصابع صغيرة.
*نصف الكباب في صينية و ندخلها الفرن مدة ربع ساعة لحتى تتماسك اللحمة و تخرج الزفرة منها.
*نفرم البندورة ناعم أو نبشرها و نضعها في صينية أخرى.
*نقلي البصل و نضعه فوق البندوة.
*نفرم حبة الفليفلة و نضعها فوق البصل.
* نصف أصابع الكباب فوق كل ما سبق.
* بما أنو الدنيا شتاء و البندورة مو كتيير بتكون حمرا نذوب في نص كوب ماء ملعقة دبس بندورة مع دبس الفليفلةو شوية ملح حسب الرغبة و نضيفها للطبخة.
* ندخلها للفرن حوالي ساعة أو ثلاث أرباع الساعة حسب حرارة الفرن، منحمر الوجه شوي و نخرجها من الفرن.
* تقدم مع الرز المفلفل بالشعيرية و معها فليفلة خضرا ...ممممممم يا سلام شي بيشهي. ، الله يسلم هالأيدين تفضلوا شوفوا و ألف صحة مطرح ما يسري يمري.. أنتو يا عمري***
رد مع الاستدلال
كتبت بواسطة ام سوسو 2005
الروابط المفضلة