سلام عليكم جميعا...
حبيباتي قبل كم يوم بعثت اسألكم عن طريقة طبخ القلقاس وما قصروا الأخوات... وبعد اطلاعي على موضوعات كثيرة صراحة حسيت حالي حايصة ومش عارفه كيف ممكن تنطبخ هالبلوة اللي جاب لي اياها جوزي... لأني مش حابة أفشّل زوجي، اللي قبل ما يطلع على الشغل قللي اليوم شو رايك تطبخيلنا القلقاس!!! .. المهم عملت بحث عن القلقاس وعرفت شو طبيعة الخضار وكيف بنطبخ، وعملت طوارئ في البيت ودخلت المطبخ وبدأت أشتغل بدون ترتيب، وما التزمت بأي وصفة، واشتغلت بوحي من الفطرة وكل فنون الطبخ اللي بعرفها.

والصراحة والصدق انه النتيجة كانت مبهرة، وبشهادة زوجي وأطفالي الصغار الي حبوها، انه الطبخة كتيييييييييير زاكية...

وهاي الطريقة بالصور:

أولا: قشرت حبة القلقاس وأزلت العقد الموجودة فيها وقطعتها مكعبات


ثانيا: فرمت بصلة متوسطة الحجم، ومعها فصين توم، وقيتهم بزيت الزيتون


ثالثا: وضعت القلقاس فوق البصل والتوم وتركتهم على نار هادية يمكن عشر دقايق، وكان عندي احساس اني بخبص ورح تنكب الطبخة، لانه صارت مادة لزجة بيضا تطلع، لكني استمريت.


رابعا: كنت سالقة دجاجة من قبل، قمت صبيت مرقة الدجاج على القلقاس والبصل ، وأضفت الملح والبهار، وتركتهم يغلوا، وكنت قارئة انه يمكن تذوق لقلقاس بحذر، اذا حسيتي شيء مزعج على لسانك معناتو ما استوى. والمهم تركتهم يغلوا مزبوط تقريبا 50 دقيقة.


خامسا: ما عجبني لون مرقة الدجاج اللي صارت بيضا كتير بسبب المادة اللزجة من القلقاس، قمت أضفت تقريبا 3 ملاعق كبار رب البندورة.


سادسا: بعدين دقت القلقاس وكان طري وطعمه ماشي الحال بس مايع شوي، تذكرت انه في بعض الوصفات بيضيفوا الليمون، قمت عصرت نصف حبة ليمون وذوبت حبة ماجي وأضفتها.

يتبع....

سابعا: تذكرت انه بعض الوصفات بحطوا كزبرة وسلق، قمت فرمت شوية كزبرة، وخلطتهم بفصين توم مفرومين كويس، وبرشت فوقيهم نصف حبة الليمون، ورشة زعتر ناشف. وأضفتهم فوق الطبق بعد تقديمه.


أثناء الطبخ (50 دقيقة) تبلت الدجاج المسلوق بالبيض وخلطة الطحين وجهزتهم للقلي،قبل التقديم بشوي عشان ما يبرد وسلقت بطاطا وشويتها بالفرن.

وهاي هي سفرتي مبارح



ان شاء الله تعجبكم


ها شو رأيكم؟؟؟؟؟

حبيبتى تسلم يدك بس هذه الطريقه غير اللى بنسوى بيها القلقاس بالسلق بعد ما بنغسل القلقاس من النشا جيد جدا بنسلقه فى مرقه فراخ او لحمه ونكون حضرنا السلق بغسله ووضعه فى حله مع اوراق الكزبره الخضرا والتوم ونتركه عالنار ساعه حتى يجف ويبقى هش وبعدين نضيف عليه كبشه مرقه ونضربه بالخلاط وبعدين نصبه على الحله اللى بينسلق بيها القلقاس بالشوربه ويقدم بالف هنا هذه طريقتى وطبعا استفدت من طريقتك على اعتبار انها جديده بالنسبه لى وان شاء الله احاول اجربها وتسلم ايدك اختى

كتبت بواسطة noorelhoda

حبيبتى تسلم يدك بس هذه الطريقه غير اللى بنسوى بيها القلقاس بالسلق .... وطبعا استفدت من طريقتك على اعتبار انها جديده بالنسبه لى وان شاء الله احاول اجربها وتسلم ايدك اختى

شكرا أختي نور الهدى على التوضيح، أنا صراحة قرأت طريقتك بعمل القلقاس في اكتر من مكان بس ما فهمت كتير الطريقة، خصوصا انه ما بعرف شو هو السلق بالزبط... المهم انا استفدت من كذا طريقة وطلعت معي هالنتيجة، وصراحة كتيييييييير طيبة، ورح اعتمدها في عمل القلقاس مستقبلا... كطبق جانبي، وأطفالي حبوها كتير.

حبيبتى فى سوق الخضار او الكارفور حتلاقى اوراق السلق هى شبيهه للسبانخ بالظبط بس الفرق بينها وبين السبانخ ان السيانخ ليها راس لونها احمر السلق بدون راس وعموما ممكن تسالى اى عامل حيدلك على السلق وتسلم يدك اختى بس نصيحه منى بما ان اطفالك حبوا القلقاس جربيه بالسلق لانه مفيد جدا جدا ومغذى يكفى شربهم للشوربه اللى بها السلق كتير مغذيه ليهم ومليانه بالعناصر الغذائيه المفيده ويارب يخليلك اولادك ويباركلك فيهم ولا تاخدى كلامى انى مش متقبله طريقتك لا سمح الله انا والله حبيت افيدك وفى نفس الوقت سوف اجرب طريقتك كنوع من التغيير فى عمل القلقاس وكل عام وانتى بخير واولادك بالف صحه وعافيه

تسلمي حبيبتي.. ربنا يبارك فيكي...ومشكورة على التوضيح والمعلومات.. وإن شاء رح أجرب طريقتك كمان، واللي أكيد رح تطلع طيبة

تسلم ايديكِ حبيبتي على الطبق الشهي ماشاءالله عليكِ

تسلمي حبيبتي

يسلمو بس شو هو القلقاس

مشكووووورة على الطبق الحلو

القلقاس كتير مفيد وطعمه مقبول ... وبيشبه البطاطس كتير .... علشان انا باطبخه بنفس طريقتك بس بدون طماطم

يعني بسلق اللحم او الدجاج لوحدهم ... والقلقاس بعد ما تقطعيه وتغسليه منيح لحد ماتروح المادة اللزجة منه اما بتقليه او بتقلبيه مع بصلة وفصين توم متل ما عملت ... بضيفي المرق ومكعب ماجي وبتخليهم يغلو الى ان يقرب ينضج القلقاس بضيفي عصير ليمون وبتقلي ثوم مع بقدونس او كزبرة خضرا ويقدم ... متل طبيخ البطاطس بالليمون اذا بتعرفيه

وطريقة نور بالسلق كمان لذيذة ذقته عند جارة مصرية ... برضه شهي ومفيد

وهاي طريقتك كمان حلوة ... تسلم ايديك مرة اخرى وسامحيني على الاطالة