شعار₪طبق متميز₪ زهرة بلبن من مطبخي
مرحبا صبايا كيفكم ان شالله تمام
اليوم كان جاي على بالي زهرة بلبن لانه بحبها هالاكلة كتير
فقمت عملتها وصورتها وحبيت انزلها
ان شالله تعجبكم
طبعا هالاكلة مرنة جدا بالطبخ وسهلة بتنعمل مع لحمة او بدون لحمة
وبتتاكل مع ارز او تغميس بخبز
انا عملتها بدون لحمة وعملت جنبها رز بشعيرية
نبدا بالجميد<< احيانا بعملها بلبن روب عادي او شنينة بلدية او(لبن اب) بس بضل طعمها بالجميد ازكى
استعملت حبتين جميد كاملات وكسرتهم ونقعتهم بماء فاتر تقريبا ساعتين
خلطتهم بالخلاط مع الماء الي نقعتهم فيه وبعد الخلط المنيح صفيتهم من اي قطع جميد قاسية ضلت <<<نسيت اصور هادي المرحلة
طبعا حبتين الجميد كمية كبيرة على الطبخة فقسمتها نصين استعملت نص وضبيت الباقي بالفريزر
لطبخة منسف او ششبرك او غيرها
استعملت راسين زهرة متوسطات
قطعتهم حجم متوسط وغسلتهم وبعدين قليتهم بالزيت
نضع اللبن على النار ليغلي مع التحريك المستمر مشان ما يخرب قوام اللبن ويصير فيه تكتلات
قبل ما يغلي اللبن بشوي ضفت عليه ماء مغلي ليخفف من اللبن لانه كتير تقيل
واستمريت بالتحريك لحد ما غلي اللبن
طبعا كمية الماء المضافة انت بتحدديها من النظر المهم يكون قوام الشوربة متماسك مو تقيل
وبتشوفي ازا بحاجة ملح بتضيفي حسب الرغبة
اضفت الزهرة المقلية للشوربة
وتركته على النار تقريبا نص ساعة لحد ما استوت الزهرة منيح وصارت طرية
بخلال هالفترة بكون فرمت توم وبصل فرم ناعم وقليتهم على النار<<<طبعا كمية التوم والبصل حسب الرغبة
وبضيف التقلية على الزهرة واللبن
وبتركها 5 دقائق على النار وبطفي النار
والنتيجة
هلا الرز بشعيرية
طبعا طبخ عادي
نقعت الرز نصف ساعة بماء فاتر بعد ما غسلته من النشا
بعدين صفيته من الماء
بضيف الشعيرية على طنجرة فيها زيت وبقليها لتتحمر
وبضيف فوقها الرز وبحركهم شوي وبضيف الملح وشوية كركم لياخد الرز اللون
بضيف ماء مغلي فوق الرز تقريبا بقدر 2 سم
بترك الرز على النار الحامية ليغلى ويتنشف من الماء
بعدين بخفض النار تحته وبتركه يتهدى
والنتيجة النهائية
وصحتين وعافية
رد مع الاستدلال
الروابط المفضلة