السلام عليكم ورحمة الله وبركاته
انا قلت انزل كل موضوعاتي في الملف
لانها كلها مصرية صميمة

المنين
السلام عليكم ورحمة الله وبركاته
المقادير
5 اكواب دقيق
1كوب زبد او سمن يسخنوا حتي الغليان
1 كوب زيت
كوب لبن فاتر
كوب ماء فاتر 5ملاعق سمسم \ذرة ملح\ ملعقة بودر
ملعقة شمر ممكن الاستغناء عنها لكن تعطي نكهة جميله
قطعةخميرة بحجم البندقة او بديلتها من الجافة \ملعقة سكر
عجوة \بلح مفروم\
الطريقة
ينخل الدقيق ويخلط مع السمسم والملح والشمر والبودر
يعمل حفرة في وسط الدقيق ويضاف الزبد وهو يغلي
يبس الدقيق بدعكه مع السمن براحة اليد ولكن يقلب بملعقة اولا حتي تحتملي الحرارة
بعد البث يضاف اللبن وقليل من الماء ويعجن ثم تدعك الخميرة بالسكر وتضاف
اعجني حتي تصبح عجينه لينه سهله التشكيل واضيفي ماء اذا احتاجت
غطي العجينة وابدئي بالتشكيل فورا
خذي قطعة منها وافرديها لتصبح مستطيل
قومي بتقطيع العجوة ووضعها علي وسط العجين واقفلي عليها الاطرافثم قطعي العجينة بالسكين
قطع صغيرة
صعيها في صاج او صينيه وغطيها واتركيها تخمر
اختبري الاختمار بوضع اصبعك عليها بخفة يترك علامة وتصبح خفيفة
ادهني الوجه بالبيض ورشي سمسم علي الوجة
وسويها في الفرن وبالهنا والشفا
نفس الطريقة بعمل بيها الكعك \ لكن بدون زيت \ وبزود مقدار الزبدة شويه
نفس الطريقة تقطع وتشكل اشكال كبيرة وتحشي بالجبن او العجوة او الملبن او فارغه باضافة الشمر والينسون
للعجينة فقط\ وتسمي\ قراقيش\

السلام عليكم ورحمة الله وبركاته
كبيبة مصري بالرز والله جميلة جدا\ الوصفة الاولي\
المقادير
نصف كيلو لحم مفروم
تلت كيلو رز مصري
ملح وفلفل وبهارات \ بيض وزيت للقلي
الطريقة
اغسلي الرز وصفيه من الماء جيدا
حطيه علي اللحمه وحطي البهارات والملح والفلفل وقلبي جيدالحد ما يختلطوا
شكليها صوابع تخينة بمقاس الكبيبة العادية
ورصيها في حله رصي الصف الاول ثم الثاني فوقه وهكذا
اغلي شوربة وضيفيها وهي تغلي علي الكبيبة واحرصي علي الصف الاخير لا تصل اليه الشوربة
سويها زي المحشي
لما تبرد\ اغمسيها في البيض المضاف اليه قليل من الملح والفلفل
واقليها في الزيت الغزير
ملحوظة
اول ما تحطي الكبيبة في الزيت امسكي ملعقتين و لفيها علشان البيض يلف عليها ولا يفرش في القلاية
لو فكت الكبيبة في السليق عيدي تشكيلها واقليها
ممكن تعمليها بالرز المسلوق او الرز المتبقي\ الوصفة التانية\
يعني الرز المسلوق+ اللحمة المفرومة المستوية لوحدها فقط بدون اضافات + الملح والفلفل والبهارات\ وتقلبيها وتشكليها وتقليها\ لكن الوصفة الاولي اطعم
وممكن تعمليها بالرز المكسر\ الوصفة التالتة\
يعني تجيبي الرز وتغسليه وتجففيه في الهواء وتكسريه في المطحنة تكسير فقط
وبعدين نفذي نفس الطريقة الاولي\ لكن حطي الرز والحمة المفرومة والملح والفلفل والبهارات في الكبة دقيقة واحدة وبعدين شكلي واسلقي واقلي
وبالهنا والشفا
انا طولت في الكتابة علشان اشرح لكم ال3 وصفات لكن اختاري وصفة هتلاقيها سهلة ولذيذة

عزماكو علي حمص
اخواتي الحبيبات عزماكو النهاردة علي مشروب الحمص بس علي كورنيش النيل في مصر ااولا المقادير \حمص منقوع في ماء ليلة كاملة\ نصفي الحمص ونضعه في حلة \ثم نضع عليه ماء كافي\ فصين او ثلاثة ثوم\وعصير طماطم مثل وزن الحمص \ يعني ربع حمص له ربع طماطم\ويرفع علي النار ونكشط الرغوة\وعند قرب الاستواءنضيف الملح والكمون فقط\ ويصب في الاكواب ويضاف الي الكوب كام نقطة عصير ليمون وشطة حراقة بودرة حسب الرغبة\ و بالهنا والشفا\

رز معمر من ثلاث محافظات مصرية
السلام عليكم ورحمة الله وبركاته اخواتي الحبيبات احب اقدم لكم الارز المعمر بثلاث طرق مختلفة من ثلاث محافظات مختلفة \ اولا انا قريت وصفة اختي مسك 800 وعجبتني كتيير وهي شبه الارز المعمر علي طريقة واحدة من الصعيد قالت لي عليها\اولا المقادير ثابتة لكل الطرق\ وهي كيلو ارزمصري \كيلو لبن\ نصف كوب ماء ممكن يزيد حسب نوع الارز \حتي الارز المصري انواع\ زبدة ويفضل فلاحي\قشطة يفضل ايضا فلاحي\ ملح او سكر\ اولا يغسل الارز ويصفي جيدا ثم يقلب مع الزبدة وتكون لينة علشان الارز يشربها \ بالنسبة للصعيد بتضعي في قاع الطاجن قليل من الزبدة ثم تضعي قطع لحم\ اوحمام مغسول ومتبل بالبصل والملح والفلفل ثم تضعي الارز ثم اللبن ب ان يغلي مباشرة ومضاف اليه الملح فقط\ثم القشطة علي الوجه وهي سر القشرة الحمراء المميزة للارز والمعمرو يوضع علي شبكة الفرن الحامي وعندما يتشرب اللبن اللبن هدئي عليه النار \ يتبع\ و بالهنا والشفا

اما بالنسبة لوصفة ماما ربنا يخليها ويشفيها ويشفي كل مريض هي من محافظة الدقهلية وهي نفس طريق التجهيز السابقة ولك بدون لحوم او حمام نهائي تطهي هذه اللحوم بجانب الارز المعمر \يعني نضع الارز بع خلطه بالزبدة في الطاجن وممكن صينية \ثم يصب عليه اللبن المغلي \ثم قليل جدا من الملح\ ثم القشطة علي الوجه ثم يدخل الفرن\ ملحوظة\ قليل من الملح لانك ممكم تغرفي منه بعد ان يستوي في سلطانية صغيرة وتضعي عليها كوب لبن دافيءوسكر \وتقدم كطبق حلووبالهنا والشفا

تابع الارز المعمر \اما الوصفة الثالثة فهي من جارتي من محافظة المنوفية\ هي نفس الطريقة السابقة لكن يستبدل الملح بالسكر ويكو ن كمية كافية للتحلية\وياكل كصنف حل\اما يعد في طواجن صغيرة الواحد يكفي فرد او يعد في صينية كبيرة ويقطع مثل الكيك ويقدم\ واخيرا بالهنا والشفا\ ودعواتكم

العاشوراء والبليلة وجهان لعملة واجدة
كل عام وانتم بخير معلش الموضورع جه متاخر لكن قلت انزله للي متعرفش تعملها اصل احنا في مصر اغلب المناسبات ليها اكلة معينة والعاشوراء باينة من اسمها بتتعمل في يوم عاشوراء تحلي بيها بعد الاكلة الدسمة وطبعا بنكون صايميين\اولا احب اعرفكم ان العاشوراء اساسها بليلة \ البليلة المصري وجبة جميلة علي الفطار خصوصا في الشتاء انا اكتفي بيها\ المقادير\ ربع كيلوا قمح مقشور ده برضه منتشر في محلات العلافة في مصر وبعض السوبر ماركت\لو حبيتي نزيدي الكمية علي كيفك لكن هو ماشاء الله بيزيد جدا\ كيلو لبن\ 2 ملعقة نشا\ باكو فانيليا\ لتزيين الوجه جوز هند مقشر \ زبيب\وممكن مكسرات او سوداني مطحونين خشن\الطريقة\ يغسل القمح وينقع في الماء ربع ساعةللتخلص من اي مادة للحفظ\ هذة الطريقة اتبعيها مع كل الحبوب الجافةدي نصيحة خبراء التغذية\ثم اغسليه مرة اخري \ ثم ضعيه في القدر واضيفي اليه ماء بكثرة يغلي ويتم غطائه باحكام ويترك 12 ساعة ولا ترعي الغطاء \ انا باعمله في المساء واتركه بيكون في الصباح جاهز\بعد ال12 ساعة بتلاقي حجمه تضاعف جدا وشرب كل الماء ضيفي اللبن واغليه كدة بيكون بليلة
ضيف عليه السكر وفي ناس بضيف كنافة محمرة في السمن\ويقدم في سلاطين عميقة\


اما العاشوراء فبعد مانضيف اللبن والسكر بدوب النشا في ربع كوب ماء ونضيفه ونضيف الفانيليا ونقلب الي ان يتماسك
\ اتركية يبرد قليلا ثم اغرفيه في السلاطين وجمليه حسب ذوقك

طاجن التورلي
اولا المقادير
نسب متساوية من الخضار الاتي كوسة بسلة فاصوليا جزر بطاطس قلقاس ويمكن الاستغناء عنه اي نوع لحم ويكون يحتوي علي الدهن 2 كوب عصير طماطم سمن او زبدة بصلة مبشورة ملح وفلفل وبهارات
الطريقة
يشوح القلقاس واللحم المكعبات في السمن لمدة عشر دقائق ثم تضاف البطاطس ونقلب خمس دقائق ثم نضيف باقي الخضارونقلب ثم نضع الملح والفلفل والبهارات علي البصلة المبشورةوتلب بالملعقة لكي تتشرب النكهة ثم نضيفها للتورلي ونقلب واخر خطوة عصير الطماطم ونضيفق ماء او شوربة حسب الرغبة ليغطي التورلي يترك ليغلي ثم ننقله في طاجن ودخل الفرن من اسفل ليتسبك ونرفعه فوق ليحمر الوجه ملحوظة الخضر تقطع كلها مكعبات واللحم اما مكعبات صغيرة او كبيرة حسب الرغبة عصير الطماطم يجب الا يكون كثير لا نريد ان يضفي علي التورلي طعم اي خضار عادي ولومتوفر طاجن فرن يوضع علي النار مباشرة نطبخ به التورلي من اول خطوة ولا نحتاج الي نقله وافضل طواجن هي الفخار يقدم ساخنا مع الرز المفضل والسلطة

كفتة رز باللحم الجملي
اخواتي الحبيبات النهاردة هقول لكم علي كفتة رز مشهورة اوي في مصر\اولا المقادير\ نصف كيلو لحمه جملي\ هي احلي بالجملي لو مفيش يبقي لحم احمر عادي\نصف كيلو رز مصري\ بصلة\ 3فصوص ثوم\ شبت وبقدونس وكسبرة كمية كافية تخلي لونها اخضر\ملح وفلفل وبهارات ونعناع جاف ولو في اخضر يبقي كام ورقة\احنا في مصر الجزار عنده ماكينة فرم مخصوصة يعني بجهز الخلطة وبروح عندة اشتري اللحمة وهو يفرمهالي\طبعا لو هتعمليها كلها في البيت \اغسلي الرز وجففيه في الهواء\وكسريه في مطحنة التوابل تكسير مش طحن\ واللحمة افرميها لوحدها\ وبعدين حطي كل المقادير علي بعض \وشكليها صوابع او كور\واقليها في الزيت\وبعدين جهزي صلصة طماطم مسبكة بالبصل وحطي فيها الكفتة المقلية وممكن تضيفي اصابع بطاطس بطاطس تخينة شوية\ لما الكفتة تلين والبطاطس تستوي \كدةجهزت للاكل\تقدم مع ارز ابيض وسلطة\علي فكرة ممكن تخلي جزء من الكفتة بعد القلي تؤكل كما هي بتكون جافة شوية لكن لذيذة\ وبالهنا والشفا
ملحوظة لو هتستخدمي لحم عادي يبقي نصف الكمية رز لكي لا يتفكك

صنفين جلاش في صينية واحدة
السلام عليكم ورحمة الله وبركاته

صينية الجلاش بحشوتين مختلفتين
المقادير
لفة جلاش
عصاج
سمن اوزيت او الاثنين معا حسب الرغبة
جبنه مبشورة اي صنف انا بفضل الرومي
حبة طماطم مقطعة مكعبات صغيرة
حبة فلفل رومي اخضرايضا مكعبات
قرن شطة حراق ومقطع ويستغني عنه حسب الرغبة
زيتون اسود مخلي
كوب لبن
بيضة

الطريقة

هاتي صينية فرن مستطيلة قد مقاس الجلاش
السمن يكون سايح لسهولة التعامل وضيفي اليه الزيت
ادهني الصينية بالسمن
افردي نصف كمية الجلاش ورقة ورقةوحطي بين كل ورقتين او تلاتة
2ملعقة من خليط السمن
حطي العصاج علي نصف الجلاش ممكن تضيفي شوية جبنة
حطي الجبنة والفلفل والشطة والطماطم والزيتون علي النصف اخر
حطي باقي لفة الجلاش بنفس الطريقة السابقة وحطي علي الوجه حوالي خمس ملاعق من خليط السمن
عند الانتهاء من رص الجلاش قطعيه مربعات
ادخليه الفرن الموقد مسبقا
بعد خمس دقائق اضربي البيضة مع كوب اللبن وملح وفلفل وبهارات
ووزعيها علي كل الصينية
ودخليها الفرن مرة اخري\وسويها بطريقتك العادية
بعد الاستواء تبرد قليلا وتقدم دافئة او باردة حسب الرغبة
طبعا ممكن تعملي الصنفين كل علي حدة حسب الرغبة

علي فكرة لو مفيش صينية مقاس الجلاش \هاتي اي صينية وقطعي الجلاش علي قدها
وحطي اللي طلع منه علي الطبقات عادي
الحقيقة انا مش عارفة الجلاش مصري صميم ولا لا بس قلت انزله

السلام عليكم ورحمة الله وبركاته
انا لقيت نفسي احتليت الملف وطبعا كده مايصحش
وانتم اكيد مليتوا
بس والله لم اقصد ان عجبتكم مواضيعي ادعوا لي
واذا لم تعجبكم اوعوا تدعوا عليا
سماح النوبة خلاص توبة
انا بقي هدعيلكم بصلاح الحال وراحة البال
يا حي يا قيوم برحمتك نستغيث اصلح لنا شاننا كله ولا تكلنا الي انفسنا طرفة عين