ودلوقتى معاد اكلتى المفضلة
المــديــــــدة:
هى عبارة عن عشا رائع وسهل جدا بشرط توافر العيش الشمسى سبق شرحه
تجيبى العيش وتقطعيه قطع فى طبق عميق "مرة مكنش عندى عيش شمسى عملتها بتوست" بس مكنتش اصلى طبعا
وبعدين فى كنكة صغيرة نحط لبن مع دقيق مع ملح بسيط ونضعه على النار حتى يتماسك يبقى شبه الكاسترد بس اخف شوية
وبعدين نحطه على العيش ونوزعه بالتساوى ثم نضيف كمون صحيح قليل منه على الوجه
وبالهنا و الشفا
ملحوظة متاكلوش كتير عشان هى تقيله

ياريت يا ملك كنت اقدر اسالك بس انا كمان عايشة برة مصر من زمان قوي بس اوعدك لوكلمت ماما علي النت قريب اسألها يمكن تكون تعرفي حاجة

وانا ححاول ادور معاكي علي النت لان بجد موضوع شدني كتير


تعالي بقي ازيدك من الشعر بيت
تعرفي ان في كمان اكلات اسمها
الثخينة او سخينة ------ المفروكة ------ القادوسية
ومتسالنيش اكتر من كدة يا دوب افتكرت الاسامي

واوعدك لو عرفت حاجة عنهم حقولك

المخروطة دي فعلا جدتي كانت بتعملهلنا خصوصا في الشتا كانت جميلة جدا

وفي حاجة اما واخدها منها من التراث بردة بعملها في الشتا بس معرفشي لها اسم
وهي بجيب العيش الشامي واقطعه مربعات واحطة في طبق واحط علية لبن متحلي بالسكر واحط فوقدة كلة معلقة سمن ويا ريت سمن بلدي طبعا بس في الغربة يا دوب جميل قوي لو لقيت البقرة الحلوب تقضي الغرض بردة

خدي عندي يا سيتي لقيتهالك في احدي المنتديات المصرية الصميمة
__________________________________________________ ________________________
__________________________________________________ _________

طريقه عمل( المفروكه )وليست المفكوكه0

يفرد العجين حتى يصبح مثل الرقاق او الجلاش0 ثم يلف العجين ويصبح شكله

لفه طويله ورفيعه 0 يقطع قطع صغيره جدا بالسكين 0 تحضر مصفاه ويوضع بها

القطع الصغيره 0 وتوضع المصفاه فوق حله بها ماء ساخن على النار 0

حتى تستوى بالبخار الصاعد من الحله ويصفر لونها 0 يتم اضافه السمن البلدى

وتقدم ويمكن اضافه السكر 0 ( تسمى ايضا بالمخروطه)

وتشبه الى حد كبير الكسكسى ولكنها سميكه الحجم 0 وبالهنا والشفا
__________________________________________________ _______________________

وهي دي تقريبا هي المخروطة الي انتي حطاها في اول الملف بس بطريقة مختلفة شوية ولن كان الاسم ممكن يكون تم تحريفة من مخروطة لمفروكة
وعلي رائ المثل قال اية ---- كل شيخ ولية طريقة --- وعجبي

ودي عن السخينة لقيها في الموقع العربي الاخباري لل bbc
وبتقول
"""" وفتة الفطير الذي يصنع من فطائر رقيقة تكسر إلى قطع وتوضع في طبق كبير ويضاف إليها "السخينة "والتي تتكون بدورها من شوربة اللحوم وسمن وبصل مبشور """

والله اعلم

مرسى يا نانو على مجهودك وعلى فكرة الثخينة دى اكله جوزى المفضلة وانا بعملها على طول لانها سهلة جدا اسهل من صينية الرقاق باللحمة ومبتاخدش وقت
وهكتبهالك بالتفصيل

طريقة عمل الثخينة:
اولا نجيب الرقاق عارفينه طبعا ونكسره قطع كبيرة نسبيا فى طبق عميق ونسخن الشوربة ونضيف بالملعقة بعض الشوربه على الرقاق حتى يتشرب ويلين بس مش كتير
لاننا هنجيب بعد كدة عصاج " لحمة مفرومة مع بصل مفروم " معروف طبعا ونحطه على النار مع شوربه برضه ونتركه يغلى ثم نضيف اللحمة بباقى الشوربة على الرقاق
ونحمر لحمه " قطع" بالسمنة البلدى ونضعها على الوجه
كلها لحوم؟؟؟؟طبعا " لانها اكله صعايدة" وعلى فكرة بتتاكل بالايد مش بالشوكة ولا المعلقة

بصراحة تسلمي يا ملك علي الفكرة الجميلة
وعلي مجهودك
بالنسبة لاني من الصعيد فاحب أعلق علي شئ
اولاالمخروطة نفس طريقة العجن والقطيع ولكن بنسويها مثل الرز باللبن يعني بنحطها في كمية من اللبن
المضاف اليه ذرة ملح علي النار عندما يغلي نضيفها ونحرك باستمرار الي ان تستوي وعدها تغرف وتحلي بالسكر ويضاف اليهاعلي الوجه السمن البلدي
او يضاف العسل الاسود علي الوجه وهي فعلا لذيذة
وعلي فكرة ممكن بعد تقطيعها تنشر في الشمس حتي تجف مثل الشعرية
وتسوي بنفس الطريقة
اما طريقة المخروطة للاخت نانو
بنسميها القادوسية
وهي بتكون تقطيعتها ارفع من المخروطة
يعني زي الشعرية او المكرونة الاسباجتي
وبتسوي علي البخاروتحلي بالسمن البلدي والسكر
وفي حلة مخصوص لها عبارة عن حلة وفوقها مصفاة
يا رب اكون قدرت اضيف شئ

ملف رااااااااااااائع يا قمر بانتظار البقيه تسلمي الف شكر

الف شكر يا سالى والله انا بصراحة اكتشفت اهمية الملف ده بعد ما عملته لانى فوجئت ان محدش عارف الاكل بتاعنا خالص وفى اختلاف كبير حوالين الاسامى و الطرق يعنى المخروطة انا حماتى انهارده قالتلى انها بتعملها نفس العجين ونفس التقطيع وبعدين تحطها فى صينية مدهونة سمنه تحط طبقة من المخروطه وبعدين طبقة مكسرات "حسب الرغبة وبعدين معلقة سمنة لحد الاخر ططبقة مخروطة وعليها سمنة كتيييير على الوش وتدخل الفرن وبعد ما تخرج تسقيها شربات زى الكنافة و البسبوسة
بجد والله الاكل المصرى فى خطر