عروسة جديدة محتاسة و محتاجة مساعدتكوا

السلام عليكم و رحمة الله و بركاتة انا يا بنات و يا سيدات المطابخ المحترفات لسة متجوزة جديد و بلا فخر خايبة جدا فى شغل البيت و النهاردة نويت و النية للة انى اتشملل كدة و اعمل فيها ست بيت محترمة و افاجىء جوزى بعد ما يرجع من الشغل بصنف بيحبة فقررت باذن الله انى اعمل لحمة مشوية فى الفرن هقولكوا على اللى عملتة و سالكوا شوية اسئلة ردوا علية بسرعة ارجوكوا

انا جبت اللحمة و سيحتها و غسلتها كويس اوى و حطيت عليها كل انواع البهارات اللى موجودة عندى و حطيت عليها خل و بصل مفروم و قلبتها و حطيطها فى التلاجة لغاية كدة انا ماشية صح و لا فية حاجة غلط ؟
نيجى بقى للاسئلة الى ممكن تكون غبية شوية بس اغذرونى و احدة خايبة و ان شاء اللله هبقى شاطرة على اديكوا

1- اخلى اللحمة منقوعة اد اية

2- هل اللحمة لما اسويها تحت الشواية اللى فى الفرن هتستوى و لا ممكن تستوى من برة بس و تكون من جوة لسة ما استوتش

3- لو مش هتستوى بالطريقة دية اعمل اية عشان اسويها بس بشرط تكون مشوية على الشواية فى الفرن بتاع البتجاز

4- اعمل اية جنب اللحمة المشوية دية

5- عايزة اسوى اللحمة قبل ما جوزى ييجى من الشغل عشان الحق اعمل الحركات اياها يعنى لبس و مكياج و غيرة يعنى عشان ما اتبهدلش تانى فى المطبخ و الريحة بقى وكدة انتوا ادرى بالحاجات دية و اللبيب بالاشارة يفهم

بس لما اسوىاللحمة بدرى ارجع اسخنها تانى ازاى فى الفرن و لا ممكن الفها بورق المنيوم و احطها فى الميكرووييف

و لكم الاجر و الثاب عند الله تكسبوة فى واحدة محتاسة

بصي ياحبيبتي
؟؟؟ آه صحيح... لا زم تقري؟!
طيب أقري يا حبيبتي:
قبل ما تبتدي يا عنيه في حاجه مش عارفه نهايتها أيه ولا حتى بدايتها إزاي
كان المفروض أنك تدوري على الطبق ده الأول وأكيد كنتي حتوفري على نفسك كل الأسئلة و الوقت
ما أنا كنت زيك ما بعرفش أطبخ
ولما بديت كنت ببهدل الدنيا عشان أقلي البطاطس؟!!
بس بعد كده فضلت أدور على الأطباق في المنتديات .. وخاصه إللي بتكون متصوره علشان يسهل علي
الطبيخ بعد كده
و دلوقتي و صدقيني في ضرف ست أشهر
بقيت ولا أجدعها طباخه
جربي و مش حتندمي

الف شكر ليكى يا ام وضاحى و الله عندك حق بس عملت نفسى فلحوسة و فاكرة الموضوع سهل
بس طلبة جه على غفلة الصبح و ما حبتش اسيبة نفسة فى حاجة اهو اللى حصل بقى لو ما حدش رد بعد نص ساعة هعملها بقى و زى ما تيجى تيجى يا اما يفتحلة علبة تونة يتغدى بيها و الله صعبان علية الراجل دة بس هوة كان عارف من الاول و قلتلة فكر كويس هوة اللى جابة لنفسة و اتجوزنى يشرب بقى ربنا يستر و المطبخ ما يولعش

غليتى بالنسبه للحمه سبيها حوالها 3الى 4 ساعات حتى تتشرب الخلطه جيدا
وبعدين لفيها فى فويل وحطيها فى الفرن وسبيها حوالى ساعتين او لغايه لما تستوى
وبعد كده افتحى الشوايه من فوق وخليها تتحمر وافتحى الفويل
وممكن تعملى جنبها رز ابيض بالمكسرات مثلا
او ارز عادى بالشعريه وجنبها شويه سلطات بسيطه كده
ولو يا قمر عملتى اللحمه بدرى مافبش مشكله(لزوم الحركات بقى )
ممكن تحطيها فى الميكروويف بس ما تلفيهاش فى فويل لانه ماينفعش تحطى الفويل فى الميكروويف نهائى
حطيها فى صينيه بايركس صغيره او حطيها فى طبق صينى كبير وبس
او لو عندك الاطباق الخاصه بالميكرويف يكون احسن
والف هنا والشفا ومبروك الزواج ياست العرايس

ودا رابط لصينيه اللحمهصنية اللحمة فى الفرن اممممممممممممم تجننننننن

اختى الكريمة nhnh الف الف شكر على الطريقة انا قريت ردك البح و ما لحقتش ارد عليكى انا جربتها بالطريقة اللى انتى قلتى عليها بالظبط و طلعت تحفة الف الف شكر و جزاكى الله كل خير يا رب
اتفضلى معانا بقى بس لو جالك مغص انت المسؤلة هههه