أطباق شهية ..... و غير مكلفة

**بنت أصول** · 07-05-2007, 02:31 AM

أظن إن الست الشاطرة هي اللي مش بس تتطبخ كويس لا وكمان موفرة وما بتخلصش مصروف البيت من أول كام يوم في الشهر

وطبيعي إن النساء في معظم الطبقات العادية بيكون عندها كام يوم كده في الإسبوع تعمل فيهم أكل أقل تكلفة ...بدون مثلاً أي بروتين حيواني ولا حاجات غريبة وغالية
وعلشان طبعاً أزواجنا الأعزاء ميكرهوش الأيام دي عايزين نعمل أكلات لذيييييذة وغير مكلفة وكمان قيمتها الغذائية كويسة
ولكل بلد أكلات من دي مشهورة عندهم .....إحنا المصريين مثلا عندنا الكشرى المصري والكشري الإسكندراني مع بيض
مسلوق وسلطة خضراء ....وكدة يعني .
وياريت كل واحدة تدخل تقول لنا أكلات جميلة من دي سواء كانت مشهورة في بلدهم أو من إختراعها
ويا رب الفكرة تعجبكم وكلكم تشاركو فيها عشان نقدر نوفر

**بنت أصول** · 07-05-2007, 03:20 AM

ماشي هبدأ أنا
الكشري الإسكندراني أو الأصفر:
المقادير:
3 كوب أرز مصري
1.5 كوب عدس أصفر (الذي بدون قشر)
3 ملاعق زيت أو معلقة سمن حسب مزاجك
1بصلة كبيرة
ملح
ماء

الطريقة:
إخلطي الأرز مع العدس وأغسليهم جيداً
ضعيهم في قدر على النار مع الزيت والملح والماء وأطهيهم بالطريقة العادية
قطعي البصلة مربعات أو جوانح رفيعة وإقليها في الزيت حتى يصبح لونها ذهبي مائل إلى البني
وعندها صفيها من الزيت جيداً حتى لا تطرى وضعيها على ورق جانبا
ضعي الكشري في طبق التقديم وزينيه بالبصل المحمر ......وكده الطبق جاهز
قدميه مع سلطة خضراء و بيض مسلوق ومقشر ومقلي في القليل من السمن وأصابع البطاطس المحمرة ....... وبالهنا
يالا شجعتكم أهه عايزين نشوف الإبداع

**فاطمـــــة** · 07-05-2007, 04:56 AM

يسلموووووووووووووووو

**رندوش** · 07-05-2007, 07:42 AM

اهلا عزيزتي بنت اصول
اكيد كل بلد له طابع في اكله وتوفيره
عندنا مثلا في فلسطين المجدره متل الكشري تقريبا
او ممكن بيعملوا رز وعدس مع بعض
ممكن العجه اي شي سهل المهم يحبوا افراد العيله

**لذيذة اللذيذة** · 07-05-2007, 04:38 PM

يا سلام بقى على الكبدة الاسكنرانى كمان ريحتها تجنن

مشكوووووووووووووورة

**هندريلا** · 08-05-2007, 03:39 AM

انا عندى طبخه لذيذه ومقاديرها ماتكلف

قطعى بطاطس شرايح سميكه شويه واقليها في الزيت

قطعى باذنجان اسود شرايح كمان سميكه واقليه في الزيت

قطعى طماطم شرايح سميكه بس لاتقليها ههههههههههههههه

جيبي صلصه ومكعب ماجى ومويه حاره واخلطيها مع بعض

في صينيه او في قدر تنفع الطريقتين رصي طبقه بطاطس طبقه باذنجان طبقه طماطم وهكذا

حطى الخلطه (الصلصه والماجى والمويه)عليها لاتغطيها كلها بس نص القدر او الصينيه كده

ودخليها الفرن او عالنار لحد ماتحسيها مسكت نفسها ماتاخد وقت لانه كله مستوى

تتقدم مع الارز الابيض او مع الخبز لذييييييييييييذه

**بنت أصول** · 08-05-2007, 10:34 AM

تسلمي يا هندريلا
دي شبه طبخة عندنا أسمها مسقعة بس في شوية أختلافات
مشكووورة حبيبتي
يالا عاوزين نشوف الهمة كل واحدة تقولنا أكلاتها الإقتصادية الجميلة

**بنت أصول** · 08-05-2007, 10:36 AM

كمان شكرا بطة ، رندوش ، لذيذة اللذيذة على المرور والمشاركة

**ghada00** · 08-05-2007, 11:22 AM

عندنا كمان في مصر ممكن نعمل اكتر من طبق من العدس الاصفر
** شوربة العدس

اغسلى كوباية عدس اصفر كويس و اغمريها ميه كتير و حطى معاها بصلتين مقطعين اربعة و حوالى 6 او 7 فصوص توم و 3 طماطم مقطعة اربعة و جزرتين مقطعين و سيبهم يستوا لحد ما العدس يتهرى
اضربيها في الخلاط و رجعيها على النار تانى حطى لها مكعب ماجى و ملح و فلفل و بهارات رشة بسيطة و كمون مطحون و السر بقى بعد ماتظبطى الطعم معاقتين زبدة او سمن بلدى سيحيهم و حطيها علي الشوربة و دوقى احلى شوربة عدس
** عدس بالشعيرية
حمرى شوية شعرية في سمن و حطى عليها شوربة العدس بس من غير قدحة السمن و سيبيها تستوى وقبل السوا ب 10 دقايق قطعى بصلة رفيع و حمريها في معلقة سمن لحد ماتاخد اللون الدهبى و حطيها على الشعيرية و غلوتين لحد ما تتخن شوية و اطفى عليها طعمها تحفة مع عيش ناشف و بصل اخضر ..
هى اكلة شتوية بس شهية جدا

**هندريلا** · 08-05-2007, 09:47 PM

خفقي بيض مع شوي ملح وجيبي توست وغمسيه في البيض من الجهتين واقليه في قلايه تيفال فيها نقطتين زيت طبعا من الجهين مره لذيذه وخفيفه وسهله والاطفال يموتو عليها