من أطباقنا الفلسطينية

**Em zaid** · 05-02-2005, 10:40 AM

هذا الملف سيكون شامل الاطباق الفلسطينية
من اطباق رئيسية
مقبلات
سلطات
معجنات

رح نبدا بالاطباق الرئيسية

الكفتة بالطحينية

المقادير :
كفتة من عند اللحام( او لحمة مفرومة وبقدونس وبصل مفرومين بماكينة اللحمة)
طحينية
و ليمون

الطريقة:
قومي بتبهير اللحمة وملحيها اذا بتحبي تفردي اللحمة بالصينية او اصابع صغيرة بعد الانتهاء من تشكيلها دخليها الفرن
بعد ما اتزل المي او الدهن اخرجيها وصفي الدهن وكوني محضرة الطحينية
طريقة الطحينية اعصري الليمونة وضيفي الطحينية وحركيها وضيفي الماء خليها سائلة شوي
بعدين ضعيها على الكفتة ورشي شوية زيت على الوجه وضعيها بالفرن
حتى تتتنشف الطحينية يعني يصبح قوامها بين الغليظ والسائل

صنية كفتة وبطاطا

المقادير :
كفتة
بطاطا
بندورة
معجون البندورة

الطريقة:
قومي بتبهير اللحمة وملحيها اذا بتحبي تفردي اللحمة بالصينية او اصابع صغيرة بعد الانتهاء من تشكيلها دخليها الفرن بعد ما اتزل المي او الدهن اخرجيها وصفي الدهن
قومي بتقطيع البطاطا حلقات دائرية والبندورة و ضعيها فوق الكفتة رتبيهم خلي شكلهم حلو
قومي باذابة معجون الطماطم بالماء وملحيه ثم وضعه على الكفته ودخليها الفرن حتى تستوي

وصحة وهنا

وتابعونا

**وعود الخير** · 05-02-2005, 11:45 AM

عيني عليك يا ام زيد
تابعي
وكل الأخوات يتفضلن بما لديهن من اطباق فلسطينية شرط ان لا تكون مكررة كثيرا.

**Em zaid** · 06-02-2005, 09:20 AM

صنية الباميا

المقادير :
باميا
لحمة راس عصفور
بندورة
بصل
توم
معجون بندورة
وبهارات وملح

الطريقة:
اغسلي اللحمة وذبليها على النار
نقطع البصل والتوم قومي بتقليبه على النار حتى يتذبل
قومي بتقطيع البندورة
ضعي البصل والبندورة والباميا واللحمة وبهري وملحي البهار (فلفل اسود وبهار حلو وشوية قرفة مطحونة )
ذوبي معجون البندورة بالماء وضعي على الباميا ولفي الصنية بالقصدير وادخليها الفرن لوقت ما تستوي يعني حتى تتنشف الماء اتركي قليل من الماء وقبل التقديم ارفعي القصدير وحمريها شوي

وصحى وهنا

الباميا مع الارز

المقادير

لحمة
باميا
بصل
بهارات حب(هال قرنفل وقرفة )
معجون بندورة
رز

الطريقة:
اغسلي اللحمة وضعي بالطنجرة البصل المقسم ارباع وسنين توم و البهارات الحب وشوية زيت قلبي اللحمة ثم قومي باضافة الماء واتركيها ساعة او اكثر حتى تستوي اضيفي الملح قبل ما اتشيليها في 10 دقائق

قومي بقلي الباميا بالزيت واذا ما بتحبي تقليها حطيها بصنية و رشي قليل من الزيت وادخليها الفرن لحد ما تتحمر شوي

صفي مرقة اللحمة من البهارات والبصل وضعي عليها الباميا اذا احتجتي شوية مي زيدي مقدار كاسة واتركي اللحمة معها بعد ربع ساعة ضعي معجون الطماطم واتركيها تغلي 10 دقائق
قومي بقلي التوم وضعيه عليها

تقدم مع الرز

وصحة وهنا
وتابعونا

**Em zaid** · 06-02-2005, 09:32 AM

المجدرة

المفادير

عدس صحيح
رز
بصل

اغسلي العدس وضعي عليه ماء وضعيه على النار بعد 10 دقائق امسكي حبة عدس اضغطي عليها اذا طرية حطي الرز طبعا بعد غسله على العدس واجعلي الماء يغمرهم قليلا لمى تغلا المي قصري النار عليها لحد ما تستوي
قطعي البصل جوانح واقليه بزيت الزيتون زيدي الزيت شوي
عند استواء المجدرة حطيها بصحن التقديم وضعي الزيت والبصل عليها
ويؤكل مع اللبن (الزبادي) او سلطة

عمتي بتعملها بالبرغل الخشن
نفس طريقة الرز لكن برغل ويتقطع البصل وبتقليه وبتحط معاه سماق كمان طيبة

وصحة وهنا

**رندوش** · 06-02-2005, 09:54 AM

تسلمي اختي ام زيد الله يباركلك فيه
والله الموضوع مفيد ومنك نستفيد

**لبلبة** · 06-02-2005, 12:57 PM

ما شاء الله ما شاء الله عليك يا أم زيد

يقول المثل :

إعط الخبز خبازة لو أكل منه

الله يعطيك ألف عافية

**lanloon** · 06-02-2005, 06:14 PM

سال ريقي على صينيه الباميه يا بنت الناس

يسلموا ايديكِ و زيدينا من خبراتك

**طيـــف** · 06-02-2005, 06:40 PM

امممممممممممممم رهيبه ياام زيد

بدي اعصر مخي واروق واكتب لي كم وصفه

مشان جبل النور ماتحكي عني كسوله

**small_angel** · 06-02-2005, 06:41 PM

السلام عليكم ورحمة الله وبركاته
تسلم ايدكي يا ام زيد على الوصفات بتشهي بس اسمحيلي أضبف طبق فلسطيني بسيط كتير هوه القدره الخليلية........
المقادير:
2 كيلو لحمة
2 كيلو أرز
نص وقية سمنة بلدية
بهار مشكل
حب الهال
بهار جولنجان
ورق غار
الطريقة:
نضع اللحمة في طنجرة الضغط ونغمرها بالماء وبعد الغليان نضع عليها الملح وورق الغار والهال
ننقع الأرز ثم نضع طبقة من الأرز في قعر القدره ونضع فوقها اللحمة ونضع باقي الأرز فوقهم ونضيف مرقة اللحم وباقي البهارات فوقهم و نغطيها ونضعها بالفرن لمدة نصف ساعة بعد النضوج نضع السمنة البلدية فوق الأرز.....
وصحتين وعافيه.......
معلمومة: القدرة عبارة عن وعاء كبير يشبه الطنجرة.......

**هنلي** · 06-02-2005, 10:30 PM

تسلميلي يا ام زياد بس اضيف شغله لصينيه الكفته بالطحينيه اذا بدك الطحينيه تطلع مش محببه حطي في الخلاط ماء وعصير ليمون وطحينيه واخلطيهم شويه وبعدها صبيهم فوق الكفته