بسم الله الرحمن الرحيم
السلام عليكم و رحمة الله و بركاته،،
أخواتي الحبيبات ،، كل سنة و انتم و جميع المسلمين بخير
بمناسبة العيد حبيت أقدم لكم أطباق من اللحم بنعملها دايما في مصر كتقليد تحرص عليه كل الأسر في العيد و أهم الأطباق دي على الاطلاق الفتة ،، يعني مش ممكن تلاقي أي بيت في مصر يوم العيد مافيهوش فتة لأنه بعد ما نرجع من صلاة العيد بنفطر بالفتة ،،،،،، فيا رب تعجبكم الفتة..
المقادير:
المقادير دي تكفي أسرة متوسطة
كيلو و نص لحم ضاني مقطع
3 أرغفة عيش لبناني أو رغيفين عيش بلدي
2 كوب رز مصري
3 فصوص توم مفرومين
بصلة متوسطة
4 معالق سمنة
شعيرية
ملح و فلفل و حبهان و مستكة و ورق لورا و قرفة و جوزة الطيب
مقادير الصلصة:
معلقتين سمنة
3 كوب عصير طماطم حمراء
معلقتين توم مفروم أو حسب الرغبة
نص كوب خل
ملح و فلفل و شطة
الطريقة:
-نسلق اللحمة مع البصلة و التوابل و نملحها بعد ما تستوي
-نحط السمنة في حلة لحد ما تقدح و نحط الشعيرية لحد ما تتحمر و بعدين نضيف قليل من التوم و نقلبه و نضيف الرز مباشرة و نقلبه حوالي 5 دقايق و نضيف عليه مرقة اللحمة لحد ما تغطي الرز و نملحه و نخليه يغلي و بعدين نهدي النار لحد ما يستوي
-نقطع العيش قطع متوسطة أو صغيرة و نحمصه في الفرن
-نأخذ كوبين من مرقة اللحم و نغليهم مع باقي الثوم
-نحط العيش في طبق التقديم ( لازم يكون عميق شوية) و بعدين نسقيه بالمرقة شوية شوية لحد ما يبتدي يلين و بعدين نحط الرز فوق العيش
-نعمل الصلصة ، نحط السمنة على النر و نضيف التوم و نقلبه لحد ما يبقى دهبي ، نرفع الحلة من على النار و نضيف الخل و بعدين نرجعها تاني لحد ما الخل يغلي ، نضيف عصير الطماطم و نخليها على النر لحد ما تتسبك كويس و نتبلها بالملح و الفلفل و الشطة
-نصب من الصلصة على وش الفتة و نرص اللحم و ممكن نحمر اللحم في السمنة قبل ما نحطه
-نقدمها ساخنة و نحط باقي الصلصة في طبق و نقدمها مع الفتة
،،،،،، و بالهنا و الشفا ،،،،،،، و كل عام و انتم بخير
الروابط المفضلة