سفرتي الاولى

حوستى في الصورة كانت عبارة عن عجينة وجنبها فلفل وزيتون وتن وطبعا درت بيها اقراص بيتزا وطبعا انى المعجنات ضروريات في الصفرة الرمضانية لان عمكم الراجل يحب ياكلهم مع الشربة
والعجينة درت بيها حتى سلة حشيتها بدجاج المفروم والبصل يعنى فرمت البصل وقليته في قلاية وزدته دجاج مفروم ودرتله ملح وفلفل اسود وزتر وشوي قرفة لين طاب الدجاج ( عادتا بعد يطيب نديرله في دحية وبعدين ناخد بالكاشيك ونحط في القوالب فوق العجينة بس وخيتكم امس مادرتش الدحية لاكن بالدحى احلى واطعم ومنظره احلى)
ودرت امبطن وفضلت من حشوة المبطن فا خديت العجينة ودرتها زي الصفيحة بحشوة المبطن ورشيت جبنة من فوق وجت قنينة الحق
وطبعا عروسة الصفرة الشربة العربية والحلو لقيمات



عجينة المعجنات العجينة اللي تمشي معاك اعتمديها
انى ندير فيها عينى ميزانى وهى دقيق وندير فيها حليب بودرة وملح والخميرة ندوب فيها في امية دافية وسكر ونعجن العجينة بعد نحسها شدت بعض ماتكونش رطبه طبعا المهم لما تشد نصب حوالي كاشيك او كاشيكين زيت زيتون ونعجن ونخليها تخمر
كان تبي مقاديرها لكل كيلو دقيق يبي حوالي كاشيك خميرة وكاشيك سكر وملح وكاشيشكن حليب بودرة

سفرتي الثانية

الصور المرفقة











يطريقة الكلير

متاعى انى قبل ندير في طريقه حنونة حتى هي ماشاء الله عليها بس امس قلت هي نجرب الطريقه اللي لقيتها في كراستى الاكلات منقلتها من كراسة ماما
المهم
كوب ماء + نص كوب زيت على النار لين يغلو وتزيدي طاسة دقيق وعصدى لين تتماسك وحولى من علي النار وخليهم علي جنب لين تبرد مزبوط لازم تبرد راهو والدحى تلاته دحيات طبعا اديريهم بالوحدة وتضربي بالمضرب اليدوي لين تتماسك ودرت مع الدحى روح الليمون اسمعى لما اديريهم في الكوشة خليهم يطولو في الكوشة لين تتحمر حتى من الجناب باش يقعدو مايتعجنوش


الاسكالوب

تقصى صدر الدجاج شرايح وتبليه انى تبلته بزعتر والفلفل الاسود والياغورت والبصل شرايح والملح وشرايح ليمون وحطيته في التلاجة وبعدين كل شريحة غمستها في دقيق وبعدين دحية مضروبة وبعدين خبزة مرحية وتقلي في نار ساخنة

السفرة الثالثة

فطور امس كان عبارة عن شربة وبريانى وفركاسي بتن ودحى وطاجين مفروم و سلة والحلو كان دبلة وتورتات هناء الله يعطيها الصحة علي الفكرة

هادا الحلو اللي مع الحليب التمر حشيته كاجو ولوز والدبلة



لقطة اقرب لدبلة



وهادا طاجين المفروم والسلة



هادى صورة مقربة للطاجين



وهادى جهة السلة


وهادا الفركاسي في الكوشة


وهادا البريانى






هادو التورتات الصغيرات
مادرتهمش مدورات زي هناء علي خاطر قلت خسارة الكيك اللي بيقعد بس قصيته متلتلات باش نستغل الطاجين كله ودرت متلتين كبار واربعه متلتات صغيرات
هادو صورتهم من الثلاجة



وهادو مع القهوة




البريانى

خودى بصل قصيه اجنحة خودى راس كبير لان طعمته فيه حلوة المهم خودى طنجرة ديري فيها زيت زي لما بطيبي عادى وحطى البصل واقلي البصل لين يدبل وحطى الدجاج والبطاطا مكعبات كبيرة وحوالي كاشيك كبير او اكتر بشوي بهار البريانى انى نستخدم في النوع متاع الدجاج ونقصي النهار حوالى 5 دقايق والطنجرة مغطية وخلي الدجاج ياخد طعمة البهار وبعدين صبي حوالي كوب ياغورت عادى ( هلبة يستغربو في الياغورت بس في الاخير مايعطيش طعم الياغورت ) لما اضيفي الياغورت قوي النار شوي لين يغلي الياغورت وحركى الطنجرة ونقصي النار وغطي كان حسيتيه يبي شوي امية زيديه شوي لين يطيب البطاطا طبعا تكون الصالصة متاع مش هلبه يعنى ماتغطيش الدجاج راهو يادوب ممكن لحد نصه
وبعدين في طنجرة تانية ديري كمية الارز لازم بسمتى لان البريانى يبي البسمتى متلا طاسة ونص مع هلبه امية في طنجرة ع النار تقعدى واقفه جنبه نص طياب ردى بالك يطيب منك الارز راهو يفسد البريانى وصفيه من المية وطووول ع الطنجرة اللي فيها الصالصة طبعا تحطي الارز حط من غير ماتحركي بحيت التحتانى يكون مخلط مع الصالصة والفوقي ابيض قاعد وغطى الطنجرة علي نار هادية لين يطيب الارز ويقدم احسن سلاطة مع البريانى سلطة الخيار والزبادي او حتى زبادى بروحة


الدبلة

حية مع كاشيك زيت وكاشيك زهر ( بدل الزهر انى درت كاشيك نصه امية ونصه روح الليمون ) وتضربي بشوكة واعجني بدقيق لين تتماسك وغلفيها بنايلو كان تعجنيها في الليل وتغلفيها بنايلو وحطى في التلاجة لليوم اللي بعده تجيك احسن
انى نخليها ترتاح في النايلو وندير حاجة تانية وبعدين نفردها بالعصا لين تبدا رقيقه وطبعا تغطى العجينة حتى اللي فردتيها بنايلو ولما تفردى استخدمى نشا بدل الدقيق واقلي طريقة القلي هي بعد نفرد ونديرها طويلة شوي نشد حاشية منها ونحط الحاشية التانية في الزيت والشوكة نغرسها على طول في الحاشية ونبدا نلف نلف واخر العجينة نلفها ع الشوكة من فوق ونقلبها طووول وحولى في صفاي لين تبرد بعدين عسليها وبس

السلة

انى العجينة ندير فيها عجينة بيتزا عادية او عجينة 10 دقايق
والحشوة دجاج مفروم وطايب في بصل وبهارات وبعد يطيب نخلط معاهم في دحية نية ونحشي ومرات نزيد في بطاطا مقلية مربعات ومن فوق جبنة لزينة

سفرة جديدة

جبتلكم صورة السمبوسة تطبيقى لكيتى

التشكيل درته بيدي لان ماعنديش الفورمة متاعها
نص دائرة حشيتها تن وهريسة
واللي شكل الباغلي حشيتها تن ودحى وهريسة وجبنة

سفرة جديدة

وتوا فطور اول امس
كان عبارة عن بيتزا وسلة نوع تانى او مايعرف بي عين الصبية وسلاطة بادنجان والحلو كان قزلامة والبركة في حنونة الغالية تهبل تهبل

هادى القزلامة


وهادا الفطور جبته جنب بعضه ههههه الصور في المطبخ طبعا









عين الصبية او السلة ساهلة وحلوة
خودى لحم مفروم وديريله شوي بصل مفروم وملح وفلفل اسود وشوي دقيق باش يتماسك مع بعض
وبعدين خودى دحية مسلوقه اقسميها بطول علي ستة ( يعنى في الاول تقصيها بطول علي اتنين وكل نص بطول قسميه علي تلاته ) وخودى بطاطا مقليه صوابع وطماطم مقطع صوابع وفلفل حلو برضو صوابع
افردي من اللحمة المفرومة علي يدك وستفي فيها صبع دحى وصبع بطاطا وصبع فليلفة وصبيع طميطم ولفي الحمة من كل جهة وبعدين اقليها وبعد اطيب اقسميها علي زوز تطلع شكلها زي السلة

هو الحق مع اللحم درت شوى دقيق وبيكنج بودر علي راس الكاشيك لاكن مادرتلهاش لا دحى ولا خبزة مرحية


هوا موضوع حنونة توا تلقي فيه القزلامة بتفصيل
http://www.lakii.com/vb/showthread.php?t=579971

هادا فطور اول امس ( بايت ههههه )
مع الشربة درت فركاسي بعجينة اللي زي القطن للاخت مينا والله عجينة تهبل الحق ودرت ملسوقه بحشوتى المفضلة



هنايا جهة البوريك


وهنايا جهة الفركاسي



والحلو درت لقيمة يادوب كملت القلي وادن المغرب حطيتها وكليناها قبل مانصورها
لاكن لقيت فاضل طروف في الصفاي صورتها هههه باش ماتقعدش في خاطركم



*************


فطورنا امس
طبعا عروسة الصفرة ولا علي راي كيتى للة الصفرة الشربه مانصورش فيها لان ديما نفس الشربة شربة العربية
درت بيتزا مربعات زي متاع شانتيل تقريبا دارتها العام اللي فات ودرت قوارب وحشيتهم كباب وطماطم ومعدنوس وطبعا عجينة القوارب جديدة عليا اول مرة نديرها ولاكن النتيجة كانت حلوة والحلو درت قطايف علي طريقه حناى الله يعطيها طولة العمر وحشيتها لوز مرحى والله القطايف طلعو قنينات الشنبير عجبوووه علي الاخر وبرغم من ان نحبهم القطايف بس ماعمري مادرتهم الا امس نستاحش فيهم علي الاخر خصوصي من ايدين حناي
المهم هادو الصور













طريقة القطايف

كوب دقيق - ملعقه صغيرة خميرة - طاسة الا شوي امية دافيه - علي راس الكاشيك ملح - علي راس الكاشيك بزار -
تخلطى المقادير مع بعض وتخليهم لين تخمر وبعدين طيبي الطبقات علي قلاية تيفال واحشي مكسرات مهروشة واقليهم وعسلي طبعا العسل متاعهم يكون فيها شوى قرفة مرحية


القوارب

طريقتهم حتستغربو شوي
بيضتين - بصلة متوسطة الحجم - 4\3 كوب حليب - ملعقة صغيرة خميرة - ملعقه صغيرة بيكنج باودر - ملعقة طعام ممسوحة كركم - ملح
تفرمى البصل في الفرامة وتزيديه البيض والحليب وتفرمى كويس وبعدين تصبى الدقيق وباقي المقادير وتعجنى بيدك لين تحصلي علي عجينة متماسكة
غطيها وخليها علي جنب لين ترتاح افرديها علي سطح مرشوش بالدقيق وقصيها دوائر كبيرة الحجم واقلي في زيت وبعدين كل دائرة اقسميها بين نصفين واحشي الحشوة اللي تبيها وتطلع زي السفينة

هادا فطوري امس شربة عربية كالعادة ماصورتهاش لان اخر حاجة نصبها باش ماتبردش ودرت فركاسي جامبو علي راي لولو و فطاير كاتشب وجبنة ومايونيز وجبنة وسلاطة جزر ومحشي والحلو كان مشيميشة ( نحسها تحمرت شوي بدت عوينة مش مشيميشة هههه لاكن والله حلوة محمرة مغرية بجد)

نبدو بالحلوو

المشيميشة


14ملعقه كبيرة حليب بودرة - 3 ملاعق كبيرة دقيق - 3 بيضات - فانيليا - بيكنج بودر - 3 ملاعق ماء
اعجنيهم وكوريهم واقلي في زيت غزير وعسلي لما تعسليهم عسليهم كويس باش العسل يخش داخل

فطوري المتواضع جداا جداااااااا اصلا الحار مادرت شي كان طاجين برقر وشربة وسلاطة مايونيز والحلو درت محنشة بالكولاج على شرف الشنبير ولما قريب المغرب قالي شنى درتيلنه لقيمة فا درتها ع السريع وجت ماشاء الله اراميشو وخدينا اللقيمة مع حليب المغرب والمحنشة مع قهيوة بعد الفطور















خبزة الكسكاس

عجينة بيتزا عادية تخليها تخمر وتفرديها وتقصيها دواير وتخليهم يرتاحو شوى واطيبي ومادا بيك اللى اطيبيها غطيها باش ماتنشفش وخلاص



لمحنشة


درتها بورق القولاش
دهنت الطبقات بسمن والزبدة وحطيت الحشوة ولفيتهم ودهنتهم من فوق بي سمن وفي الكوشة وعسلتهم طبعا قصيتهم قبل ما نطيبهم

هادا فطور اول امس كان شربة وكفتة تن وبيتزا ملفوفه ومادرتش حلو اول امس لان عندى محنشة فاضلة من اليوم اللي قبله والسلاطة درت تبولة



هادى بيتزا الملفوفه بعجينة مينا الله يذكرها بالخير

فطور امس اللي هو شربة عربية وشربة عدس ليا انى وحاجة خص نص لشنبير خاطره فيها ترا شنى ؟؟؟؟؟؟؟ ودرت طاجين ملسوقه وكبة كذابة وشوي ملسوقه مقليه حشاها السيد علي جبنة فيلادلفيا وبطاطا مقلية والسلطة درتها سلطة جزر والحلو درت لقيمة ودرت مهلبية ولي اول مرة لسحور عادتا كان بندير ندير كاسترد بس امس درت مهلبيه بس ماصورتهاش لان انى كنت نقرا في قراءن في الدار التانية والجماعه كلوها كخخخخخ














و اخيرااااااااااااااااااااااااااااااا
بكبوكى




طاجين الملسوقه
خودى طاجينك وادهنية بشوي زيت او زبدة وديري فيه ورق الملسوقه من تحت ومن الجناب وبعدين دهنت القاع ( فوق طبقة الملسوقه طبعا ) بهريسة عربية وفوقها بطاطا مكعبات مقلية وفوق منها دجاج قطع صغيرة مسلوق او من غير سلق وتشوحيه في بصل وزيت وزعتر وفلفل اسود وبعدين جبنة مبشورة او شرايح وتضربي دحي وتصبي فوق الحشوة ورشة زعتر وبعدين حطي ورق ملسوقه تانى ونزلي الملسوقه اللي في جناب الطاجين واضربي دحية وصبيها فوق الملسوقه وحطي في الكوشة لين اطيب وخليها تبرد شوي وقصى وصحتين عليكم


كبتى الكدابة
تاخدي توست محولتيله الحاشية وتحطيها في ست البيت وتفرميه لما يتفتت صبي عليه شوي حليب حكة وشغلي الماكينة لين يبدا عجينة وبعدين شكلى واحشي ايي حشوة تبيها واقلي في الزيت