LinkBack URL
About LinkBacks
اللقافه وما تسوي
انتشرت اشعة الشمس في ارجاء السماء و داعبت الافق الارجواني وحلقت الاطيار <----- اقول عطينا اللي عندتس بس
في يوم من الايام لبس ابوي نعاله بيطلع فسألته ( يبه وين بتروح ؟ ) قال ( بروح سوق الخضرة ) قلت( وشو سوق الخضرة هذا يا بابا <---- يشين السرج ) قال ( هذا مول جديد توهم فاتحينه فيه بلايز وتنانير ويقولون بيفتحون فيه سينما في الدور اللي فوق ….. اللهم لك الحمد والشكر .. سوق الخضرة هو سوق الخضرة يابقرة بعد ما يبيله شرح ) قلت ( انا ما عمري شفته يا ابوي ودي اروح معك ) قال ( يا حبكم للسوقه ولو ان ما فيها الا بطاطس )
وبعد الحاح ودندرة رحت مع ابوي سوق الخضار وليتني ما رحت حرررر و ريحة خياس وزحمة وزبايل فقلت لأبوي ( انا مليت ابي مكان اجلس فيه الين تخلص:حزين: ) قال ( شوفي هناك في الزاويه فيه كوفي شوب وجمبه فيه انترنت كافيه .. .. وش اللي ابي مكان اجلس فيه ؟ اربضي فيذا ما هنا الا تسذا ) شفت لي اقرب صندوق وجلست عليه ومادريت الا يجيني ذاك البزر ويقول قومي عن دكاني.. قلت أي دكان الله يصلحك قال هذا اللي انتي فيه دكاني قلت هالحين قطعة ذالصندوق دكانك ؟ قال ايه قلت تكفى فارق تراها واصلتن معي قال طيب قومي عن الدكان قلت منيب قايمة قفل الدكان علي وجب الشرطه<--- تفرر به زود قام سحب الصندوق من تحتي وطحت على الارض وعورتني الطيحة واعصب عليه بغيت اذبحه وبصراحه المسأله مهيب مسألة صندوق المسأله مسألة مبدأ <--- اقول على شحم بس ... واشوته برجلي بأقوى ما عندي ويطير الشبشب وما دريت الا بذالفلاشات واثر الدعوى فيها صحفيين في سوق الخضرة موصيهم رئيس التحرير على شوي برشومي <----- رئيس التحرير في الثالث الله يهون عليه ويوم شافوا الهوشه وهات يا تصوير طبعا انا لملمت احشائي المتبعثرة <----- تعد نعالها جزء منها وانحشت لأن شكلي في الصور وانا ارجفه يفشل .. ورجعنا للبيت .
وبعدها بكم يوم جلست في شرفة منزلنا احتسي القليل من القهوة واتصفح الجرايد المحليه <--- الا قولي كنت ادغ رز فوق الجريدة
.. والقى ذالخبر في صفحة المحليات ( اشتباك في سوق الخضار بين فتاة غريبة الاطوار وطفل صغير ) واناظر والا صورة رجلي وانا اشوت البزر طالعه في الجريدة . . انصدمت وخذت الجريدة وشققتها عشان ما يشوفونها اهلي وتاصل فضيحتي جلاجل ويمكن ابوي بسم الله عليه يروح فيها لو درى ان صورة رجل بنته طالعه في الجريدة ومهيب بعيده يتخلون عنه الجماعة
وارجع للبيت قريرة العين مرتاحة البال
وادخل المنتدى والقاهم منزلين موضوع في منتدى الصور عنوانه ( صورة اشين رجل في العالم لا تفوتكم !! ) وادخل الموضوع والاها رجلي ومكبرة بعد
واقرا الردود : واحد يقول ذي مهيب رجل ذي طيارة F15
والثاني يقول تحمدوا يا شباب لا يعاقبكم ربي
والثالث يقول انبسطوا فيه اشين من رجلكم وقفلوا الموضوع الموضوع وقالوا نرجوا من الاعضاء انهم ما يحطون صور شينة لهالدرجة وتنافي الذوق العام
ومن بعدها عرفت ان الصورة انتشرت في الانتر نت واني ما عاد لي حيله .. وانه لازم اعلم اهلي قبل لا يجيهم الخبر من برا
ومن بكرى لقيت اهلي كلهم متجمعين ينتظروني وقال ابوي شفتي جريدة اليوم ؟ وبعدها انهرت وقمت ابكي بحرقة وقلت والله مهوب مني قسم هم اللي صوروني .. سوو بي اللي تبون حطوني تحت كفر وافحطوا ..احبسوني بغرفة لين اموت .. بس ارجوكم ارجوكم سامحوني قسم بالله مالي ذنب باللي صار<---- وانسدل الستار .
لكن ردة فعل اهلي كانت غريبة.. كانوا مبسوطين وقال ابوي ( شوفي الجريدة بس ) والقطها من يده واشوف العنوان (( فنان تشكيلي ايطالي يعجب بأبهام رجل فتاة سعودية )) واروح ادور التتمة واخيرا لقيتها (( الفنان التشكيلي دانييلو يرغب في رسم ابهام الفتاة المجهولة في سوق الخضار ويدفع ما قيمته مليون ريال لمن يدلي بأي معلومات عنها ))
والقى واحد كاتب (( انها لمدعاة للفخر ان يصل ابهام فتاة سعودية الى العالمية ))<--- حسيت اني المنتخب عقب هالكلمة..
الثاني كاتب (( تطلعات المرأة السعوديه تبدأ من اخمص قدميها ))
قال ابوي حنا لازم نطمر لأيطاليا الحين عشان ذالرسام المهبول يرسم اصبعتس قبل لا يهون.. انهالت الدموع من عيوني وقلت ( كذا يبه تبيعني للي يسوى واللي ما يسوى .. اشوف طلعت السماحة يوم صارت الدعوى فيها فلوس ) قال ابوي ( اقول يا بنيتي لا تتحمسين واجد .. تراه مايبي الا ابهامتس ولا بغاه الا من شوفتن فيه يعني لا تنبسطين .. وبعدين هذي مهيب فلوس هذي مليون ريال .. تدرين وش معنى مليون ريال يعني اربعين الف صندوق طماط من )
قلت ( كله من سوق هالخضرة هو اللي جاب لنا هالمصايب)
قال ( ولمي شنطتس بس وتراي منيب رايح معتس روحي انتي واخوتس لاني والله مابزيتس فيذا فابزاتس لحالتس في ايطاليا ) وطاروا بي في العجه وخذوني لروما ويوم وصلنا معرض دانييلو والا فيه بنات وش كثرهن جايات يقولن هذا اصبعنا بنات اللذين وبعد ما دققوا لقوا ان الاصبع اللي في الصوره ينعفط اكثر من العادي ومحد قدر يسوي ذالحركة الا انا فعرفوا اني انا صاحبة الاصبع الاصلية :صقعه: .. وقاموا روشوا اصبعي ولمعوه ودهنوه بفازلين تجهيزا للرسم وحطوه على كنبه حمرا طويلة عشان يسترخي .. وقال لهم اخوي ( والله قسما بالله لو رسمتوا شي ورى مفصل الاصبع اني لاخذها واهون ) قالوا (اقول تكفى يا زينك ساكت بس من زين ذالبنت عشان نرسمها والله لولا الحيا انتسان جبنا جلال وغطيناها لا تحوم تسبد الرسام وترانا ما رسمنا اصبعها الا من شينه) و بعدها بكم من ساعة صارت اللوحة جاهزة. . وجت وحدة وسوت لاصبعي مساج عشانه تعب مسيكين <---- عالم تقدر البني آدم من راسه لاخمص قدميه
وعُرضت لوحة اصبعي بعد قليبي :دمووع: في المعرض وحققت شهرة عالمية وكتبت عنها كل الصحف وجميع المجلات المختصة بالفن برضه ارسلوا نسخ للمدارس عشان يقولون للصغار شفتوا اللي يمشي حافي وش يصير له .. ومن بعدها كل الشركات الايطاليه دقوا علي .. ذاك المصمم يبي يحط صورة ابهامي على فنيلة واللي يبي يخليه شعار لحملته الانتخابية واللي يبون يحطونه على صندوق جمع تبرعات عشان الناس ترحمهم.. واللي يبيني اسوي دعاية قصاصة اظافر .. وكله كوم ويوم قال آلباتشينو ( ان الابهام المرسوم في لوحة دانييلو يدخل القليل من البهجه الى نفسي :بوصة: ) عقبها قامن الايطاليات يرسلن لي ايميلات يقولون وش نظامتس الغذائي عشان تصير اصابعهن مثلي
وادري انكم ملقف تبون تشوفون الصورة بس معصي:
وقبل ما نرجع للرياض سمعنا ان اللوحة دخلت المزادات العالمية وان واحدن ثور سايمها بخمسين مليون. وانهبل اخيي وقال ( الحين اللوحة تسوى خمسين مليون وذا لاعبن علينا ومعطينا مليون بس !! .. ما فيه رجعه للرياض الا واللوحة معنا هذا اصبع محارمنا مهوب لعبة في ايدي العابثين و المغرضين والذئاب البشرية:اعرابي: ) قلت ( يزينك ساكت ) ياخيي متى ماهتويت صرت سمح ومتى مابغيت صرت حقنه ) قال ( عسى ما خمبقت واجد ) قلت ( الاوالله ) قال ( شوفي دبري لنا خطة نسرق اللوحة من المعرض ) وفكرت اني اروح للمعرض اذا راح دانييلو لصلاة الاخير وادخل كأني بودع اللوحة اللي مرسوم فيها اصبعي.. واجيب معي لوحة ثانية فيها صورة اصبعي يوم انه صغير عند الدزليب على اساس اهديها لدانييلو .. همن بخفة يد مني ابدل اللوحتين وبعدين اطلع واقول للحارس خلاص انا ابرجع بعدين اذا جا دانييلو من المسجد.. بس ان عيال اللذين من يوم لمست اللوحة ادهرت الدنيا انذارات وتصككت البيبان وطبوا على الشرطة :شجع: و قالوا ( اونو دوس تريس اولي اولي اولي )<----هذا الاجنبي اللي تعرفه .. وكلبشوني ونطلوني انا واخوي في السجن .. بس ابشركم ان شاء الله انها بتنحل .. لأن فيه فنان تشكيلي جا يزور خويّه في السجن وشاف اخوي وقعد يتفكر في خشمه .. والظاهر انه جاز له ووده يرسمه .
وبس هذي قصة اصبعي عاااااااااااد وش رايكم فيها
رد مع الاستدلال
فديــــــــتكــــــم كـــــــلكـــــــم
يَ رب
الروابط المفضلة