السلام على الفتيات الناعمات
كيفكون صبايا صارلي يومين مو صاححلي أدخل عالدردشة ملهية لهوة غير شكل بأبني الصغير أنس ولي على ألبي كتير مرضان يمكن هاي أشد مرضة مرت عليه لحد الآن و بين الدكاترة و التحاليل والتصاوير الله لا يوريكون اللي أنا فيه و لا يمرضلكون أولادكون و لا يمرضكون يا رب
اليوم نوعا ما الولد شوي صحصح و نزلت حرارتو إن شاء الله ما ترجع تطلع
هلأ أنا آعدة جنبو و هو عم يشوف أفلام كرتون ألت لشوف الأخباؤ عندكون

سلامة قلبه ابنك يا رينو شو القصه ان شاء الله بسيطه
الله يشفيه ويعافيه
الحمد لله حتى الان غزه ما فيها لانها محاصره ممكن مصائب قوم عند قوم فوائد
لانا بحصار ما في سفر ولا شي ما انتقلت هالعدوى مش ناقصنا والله ربنا عالم بالحال
وانا سمعت انه اليانسون مفيد لكل شي وربنا الساتر والحامي

آمين يا رب يا سوسن والله هو الواحد صار متوسوس والاولاد كمان حيتعقدوا من التعليمات ههههه

اليوم قالت لي بنتي.. اذا رحنا نغسل ايدينا وفتحنا الحنفية وايدينا وسخة طيب مو بدنا نسكرها بعد ما نغسل؟؟ يعني بترجع تتوسخ هههههههه

قلت لها ما شاء الله عليك سؤال رائع.. عشان هيك بالمدرسة افتحي الحنفية بورقة محارم ههههه

حبيبتي مو المدرسة مش كويسة وما بيهتموا بس اذا بس مرشحة لا يعطى اهتمام بينما لو في حرارة ساعتها بيبدا القلق..
هون بالمدرسة وزعولنا منشورات وقايلين على القليلة 3 عوارض يكونوا مجتمعين حتى يشكوا بالامر لا قدر الله,,,


سوسن هاي نوع من النبتات يلي ممكن تساعد بتخفيض فرصة التقاط البرد الى اكثر من النصف..

اتفضلي اقرأي عنها وعن خصائصها الطبية..

http://en.wikipedia.org/wiki/Echinacea



رينو الف سلامة يا رب عليه وان شاء الله ربي يعافيلك ياه ويشفيه يا حبيب ألبي والله مرضة الاولاد الصغار صعبة وبتكسر القلب

هلا رندوش حبيبتي الله يفك عنكم هالحصار عن قريب بجاه هالإيام الفضيلة
و الله حبيبتي الظاهر أنو أنس مصاب بفيروس قوي نازل على أمعاؤه حرارتو مرعبة و تحاليله سيئة بالبداية كان التشخيص زائدة بس بعد التصوير البطني أكدولي أنو مو زاية بس حالة إلتهابية شديدة اتخيلي عم بعطيه نوعين من إبر المضادات الحيوية عم بخلطون مع بعض و بعملو الإبرة و يا حرام شو بيتوجع كتير تقال و فخدتو الصغيرة شو بدها تتحمل ما بعرف بس الحمد لله اليوم حاسستو شوي أقضل من مبارح يا رب يصرف عنو المرض و عن كل مريض

أهلا لبنان كيفك حبيبتي الله يحمي أولادك وأولادنا جميع و كل المسلمين
ما شاء الله لا قوة إلا بالله بنتك واعية و فهيمة يحميها ربي التوعية أمر كتير ضروري بهيك حالات بس يا ترى التوعية لازم تبدا من الصغار و لا الكبار المصيبة من كام يوم كنت عم بحكي مع شخص عندو انفلونزا وحالتو تعبانة فلما حذرتو أنو ما يتهاون بالحالة اللي عندو و أنو لازم يكون تحت المراقبة ضحك علي و اعتبرني مهووسة الله يصلحنا

السلام عليكم ورحمة الله وبركاته

كيفكم يا قمراااااااااااات


رندوشة انتو عندكم خماسين احنا عندنا سيول و امطار غريبة مش وقتها ابدااا
و عملو تحديرات كتير في التلفزيون و لسة مش مبينة اخرتها الوضع مش مطمن
ربنا يلطف فينا و يرفع غضبه عنا يا رب

لبنان ماشاء الله اطباق شهية سفرة دايمة و عامرة ان شاء الله
و موشوع متعوب عليه تسلم الايادي


سونة احنا الجه عندنا زي ما قلت غري بو بيخوف و صاير سيول
مع ان مش موسم هيك شغلات هلآ هون
الله يلطف فينا و الله بيتخوف الشغلة يبعد عنا و عنكم الشر
و ربنا يبعد الامراض عنا و عنكم و يحفظلك الاولاد
لسة متوقع حالات اكبر في فصل الشتا و ربنا يحفظنا جميعا


رينوووووو يا قلبي كتيييييير زعلت على انس
الف الف سلامة عليه الله يعينك يا رب ويشفيه و يعافيه و ما يشوف شر
كتير و الله تدايقت صعبة عالاطفال
ربنا يشفيه و يعافيه بس اتأكدي من التشخيص حبيبتي اهم شي
الله يشفيلك اياه و يحفظه هو و اخواته
مبارح لسة اجيت في بالي قلت رينو زمان ما طلت
طمنينا عنه يا غالية

و ربنا يحفظنا و يحفظ اولادنا و احبابنا من كل سوء ياااا رب

تسلمي أنجي كلك زوء حبيبتي...


يا جماعة فتل راسي وانا عم افتل على موضوع كريمة الثوم من دون بيض...

بتذكر وعود طبقته بس ما عم لاقيه ولا بعرف هو لمين!
حدا عنده خبر؟

رينو سلامته انس الف سلامه
الله يحميهم الصغار
ما في اصعب من مرضهم
ضلي طمنينا عنه


لبنان شكرا على ارابط

انجي الله يلطف يا رب
هي رسائل من رب العالمين و ما حدا سامع

لولو انا عندي وصفه
لحظه و بتكون عندك

يسلمو حبيبتي

عبالي اعمل شيش طاووق واعملها جنبه..

اليوم عندي شوربة كريم الخضار وشوربة عدس
لسا من مبارح قالب لوف السمك والسلطة البولندية
وطالعت من الفريزر قعطع صدور دجاج جاي عبالي اعملهم أما شيش طاووق بالفطر أو صيني .. لنشوف