مصر بشكل جديد و اتمنى تعجب

بسم الله الرحمن الرحيم
انا عضو جديد بالمنتدى و قد اعجبنى هذا المنتدى الخاص بالسياخه و السفر لحبى الشديد للسفر و ثانيا لتعلق عملى بمجال السياحه فى مصر و بالطبع كان لابد لى ان اكتب عن مصر و كان لابد ان اقرأ ما كتب عنها قبل البدايه فى الكتابه ووجدت كثير من الاحوه و الاخوات قاموا بالواجب و زياده مع كثير من الصور الرائعه و لذلك قررت ان اكتب عن مصر بشكل ارجو ان يكون مختلف عما كتب من قبل إن شاء الله
بس لى تعليق على بعض تجارب الاخوه و الاخوات اللى زارو مصر و لان كل واحد بيكتب حسب اللى شافه هو طبعا و كمان اللى عاش فى مصر غير الى بيجى زياره و يمشى هخلى التعليق بعدين شويه و خلينى ابدا اتكلم عن مصر من البدايه
اولا أصل كلمه مصر ليه اكتر من راى و هو انه نسبه الى مصرايم احد ابناء سيدنا نوح عليه الصلاه و السلام او ان الاسم مصر بمعنى البلد او الارض اما الاسم بالانجليزيه egypt فاقرب الاراء انه مشتق من كلمه مصريه قديمه (حوت كا بتاح) بمعنى بيت المعبود بتاح و تحورت الكلمه الى (كابتوه) و بقيت بعد كده كبتوس او قبطوس حسب النطق اليونانى و هى الى اخدوا منها كلمه ايجيبتوس او ايجيبت و كلمه قبطى يبقى كده معناها مصرى مش معناه مسيحى و لما دخل الاسلام مصر و كان اهلها مسيحيين أصبحت الكلمه تتطلق عليهم فقط .
اما عن اسم مصر زمان ايام الفراعنه كان ليها اكتر من اسم منهم (كمت ) بمعنى الارض الخصبه و دشرت بمعنى الارض المحصنه.
اما عن اسم مدينه القاهره اللى بناها جوهر الصقلى القائد الفاطمى للخليفه المعز لدين الله حسب اقوال المؤرخيين ان العمال وقفوا عشان يرموا اساس المدينه و كان معلق حبل عليه اجراس عشان يعطوا اشاره بدء العمل فيقال ان غراب او طائر وقف على الحبل و ضربت الاجراس و كان فى نفس الوقت كوكب المشترى فى الافق فقالوا ( القاهر فى الطالع ) و سميت القاهره تيمنا باسم الكوكب
و بمناسه القاهره انه لما انتهى العمل فيها دخلها الخليفه المعز لدين الله الفاطمى ليله الجمعه يوم 5 رمضان و خرج الناس يستقبلوه بالفوانيس والشموع و من هنا جت فكره فانوس رمضان اللى الاطفال بيلعبوه بيه فى مصر و يقولوا وحوى يا وحوى اياحه و دى اصلها فرعونى و معناها عشت عشت ايها القمر .
اما عن اسماء باقى مدن مصر زى الاسكندريه دى طبعا معروفه انه نسبه للاسكندر الاكبر او المقدونى و خططوا المدينه وقتها بالدقيق عشان تقدروا تعرفوا القنح كان متوافر فى مصر وقتها قد ايه.
اما بورسعيد نسبه الى الخديوى سعيد و الاسماعيليه نسبه الى الخديوى اسماعيل و نشأوا مع حفر قناه السويس
اما مدينه الفيوم فاصلها مصرى قديم بايم و تحولت الى فايم و حولها العرب الى الفيوم و معتاها البحيره او البحر
عشان بحيره قارون اللى هناك و الاقصر ده اسم عربى لان العرب لما دخلوا وجدوا ان المبانى فيها اشبه بالقصور فسموها الاقصر لكن اسمها القديم طيبه او ثيبس و اسم مدينه اسوان مشتق من كلمه قديمه سون او صون بمعنى السوق لانها كانت مركز تجارى بين مصر و السودان قديما
دى اسماء اشهر المدن فى مصر تقريبا و ان كان فى اسماء كمان كتير اصلها قديم او ليها سبب للتسميه .
ارجو ان الموضوع يكون مفيد و ان شاء الله المره الجايه يكون فى جوله جديده عن الاهرامات باعتبرها اشهر حاجه فى مصر تقريبا
اما تعليقى عن السياحه و الثقافه السياحيه فى مصر و بحياد شديد فعلا فى قصور عندنا فى النقطه دى لكن للاسف لان بعض الاخوه العرب من بعض الدول لما بيجوا مصر بيهتموا باشياء معينه و طبيعى يلاقوا هنا فى مصر ناس من نفس نوعيتهم يساعدوهم و من هنا نشأت فكره غلط عند بعض المصريين ان كل العرب كده و بقى كل همهم ياخدوا منهم فلوس و خلاص ,كمان نشأت عند بعض العرب فكره انه كل المصريين بتوع فلوس و ممكن كل حاجه تكون بالفلوس و بيتعاملو بالمبدأ ده
تانى حاجه لازم اللى يروح مكان يكون عارف هو رايح فين و هيعمل ايه مش يسيب نفسه لسواق تاكسى يوديه و يجيبه و خلاص و لازم يعرف و بصراحه شديده ان اى مكان السائق بياخده فيه بياخد عليه عموله من المكان و ده نظام معروف فى كتير من الدول , يعنى فى مصر لو راح مطعم او عشان ياجر شقه او القريه الفرعونيه او اى اوتيل عادى او حتى خان الخليلى السواق بياخد عموله
يبقى المفروض انى اروح المكان اللى انا عايزه و مش عيب انى اكون عارف و اسيب السواق ياخد العموله بس اكون فاهم الموضوع , مش السواق هو اللى يقنعنى ان المكان ده كويس و خلاص
مثلا فى القريه الفرعونيه لو حد بيحب يروح بتختار البرنامج اللى انت عايزه مش اللى يتفرض عليك بالمبلغ الاجمالى و خلاص
و من الطبيعى انه فى كل مكان فى الكويس و فيه السيىء لكن انا مقدرش انى اتكلم او انكر شهامه المصريين فى اى وقت و خلى اى واحد يجرب فى موقف يقف فيه فى الشارع و يطلب مساعده بجد او لو اتعرض لموقف لا قدر الله
ارجو ان كلامى يكون واضح و ميزعلش حد و انه لو فيه مشكله عندنا لازم نناقشها بوضوح و صراحه و السلام عليكم و رحمه الله

اهلا بك اخي الفاضل ....

السفر لحبى الشديد للسفر و ثانيا لتعلق عملى بمجال السياحه فى مصر

اكيد بنتوقع منك و بنسعد بالجديد و المفيد سواء في السياحة في مصر او غيرها من مدن العالم


شكرا لك على المعلومات القيمة

وان شاء الله مفيد مستفيد معنا

أهلاً بكم في المنتدى..

لازم اللى يروح مكان يكون عارف هو رايح فين و هيعمل ايه

تماماً..

جزاكم الله خيراً على المعلومات الجميلة و النصائح الواقعية..

دي ام الدنيا يا راجل

فعلا هي ام الدنيا وهي رائعه

اخوي ياليت تعطينا الاماكن السياحيه في القاهره لاني ناوي ان شاء الله اروح مصر

يمنع وضع ايميلات

السلام عليكم أخى الفاضل
الأماكن السياحيه فى مصر كتير طبعا و المهم تروح المكان المناسب لك و لمن معك و اختار من الاماكن التاليه و انشاء الله تستمتع فى مصر
1- الأهرامات
و هرم سفاره المدرج و لكن المنطقه شبه صحراويه و مشمسه جدا يعنى اذا فيه اطفال بلاش احسن تروح او لو مش هاوى الاثار
2- المتحف المصرى فى التحرير و فيه غرفه للمومياوات
3- برج القاهره و ممكن تكون زياره ليليه و تتعشى فيه
4- حديقه الازهر و فيها مطاعم جيده جدا و المنظر رائع أو حديقه المريلاند فى مصر الجديده و دى فيها عروض دولفين و طبعا الحسن و خان الخليلى و منطقه الازهر
5-قلعه صلاح الدين و فيها جامع محمد على و المتحف الحربى و متحف الشرطه
6- دريم بارك فى 6 اكتوبر و طبعا دى اكتر لو معاك اطفال لانها مدينه ملاهى
7- القريه الفرعونيه فى شارع البحر الاعظم و بتتفرج فيها على حياه الفراعنه و ممكن البرنامج يشمل جوله بمركب كبير فى النيل و ممكن تاخد برنامج القريه فقط
8- رحله بمراكب شراعيه فى النيل و اعتقد انها افضل من المركب الكبير و تركبها من المعادى او التحرير
9- قصر البارون فى مصر الجديده و لكن لا اعرف مغلق او مفتوح للزياره حاليا
10- مراكب عائمه للعشاء او الغداء الباشا و نيل كريستال و غيرها
11- زياره للاسكندريه لمده يوم او يومين 0( المنتزه -قلعه فايتباى- مكتبه الاسكندريه - زنقه الستات)
12 - زياره فى يوم لمدينه الفيوم و بحيره قارون
أما عن السهر و الخروج ليلا فى القاهره سيتى ستارز مول فى مدينه نصر او جنينه مول أو كارفور
ان شاء الله تشرف مصر و تحت أمرك فى أى استفسار او لو تحب تزور اماكن تانيه زى الغردقه و شرم الشيخ و تحب العطس فى البحر الأحمر او تزور الساحل الشمالى او سيناء