اللي ما يسافرون برى المملكة ...وين يروحون؟؟؟

أنا من الناس اللي ما أطلع برى السعودية أبدا
بس بصراحة ما أدري وين أروح في العطلة
ودي أسافر لكن محتاره وين أروح؟؟؟

حياك الله اخيتى

مملكتنا الحبيبة غنية بالاماكن الجميلة بل من يعرف قدرها يستغنى عن السياحة الخارجية..

يكفيك زيارة للعمرة والذهاب الى المدينة المنورة ...هذى بحد ذاتها متعة

اردت التسوق واماكن الترفيه عندك جدة والدمام بحر ووناسة

حبيت الجو اللطيف والغيوم والمطر روحى الطائف ومرى بالباحة والنماص وانزلى على ابها المصايف ...

جو خيالى تشعرين بمتعة وراحة>>>اسالى مجرب

واى اسئلة انا مستعدة

الأخت العزيزة

الكروان غنى..........
أهلا بك وسهلا وأشكر لك ردك .......

بالفعل مكة والمدينة شرفهما الله من أفضل الأماكن وإذا رحتي هناك ما ودك ترجعين
بس ما فيهم أماكن للتنزه ...يعني اللي بتروح بأطفالها بتظلمهم
لأنهم بيتضايقون هناك....ما فيه شي يوسع صدورهم

أما جدة والدمام ما أدري كيف الناس يروحون لهم في هالحر الشديد والرطوبة
بصراحة الجو هناك ينكد عليك كل السفرة

أما أبها والطايف معك حق الجو خيالي وروعه مره بس فيها وصاخة وريحة
وعدم إهتمام ولا تنسيق ولافيها أسواق حلوة ولا مطاعم
ومنتزهاتهم ما تلقين فيها مكان تقعدين فيه من الزحمه
أنا ودي أدور لي أحد ساكن في الطايف ويعلمني وش الأماكن الحلوه
وما فيها زحمة مره عندهم

انا العام الماضي رحت الطايف وفيه اختلاف عن بأبها( حنا من كم سنة وحنا نروح لأبها )
أبها أوسع وفيها أماكن أكثر للتمشية من الطائف
الطايف فيها منتزهات كثيرة وتصلح للعايلة الواحدة
وأبها تصلح للعوايل الكثيرة
أبها أنظف من الطائف
سكن الطائف أحسن بدرجة من ابها
أسواق الطائف أحسن من أبها
بالنسبة للسكن اولي تتارين الاماكن البعيدة عن وسط البلد أنظ وأرخص وأشرح وأفخم حنا سكنا العام في منطقة الفيصلية سكن فخم ومرح جدا
مع تنمياتي

انــا صـــراحـه ماراح نســـافر هذي السنه
وبنجلــس فـي ربــوع الريــاض.....نروح للعمره ان شاء الله...وبــــس
لان مــاحس في المملكه شئ يشــوق تروحين له...جده والشرقيه حلــوه بس مو بها الاجواء يعني باوقات ثانيه..
لان اختـي ام خوله صااادفه.لا نظااافه ولاااشئ الحمدالله..
تحوم الكبد بس تخسرك على اشياااء تقررف من جد!!

يعني ماادري على ايش الناس طايرين بها لانها شهبـــااااء وقديمــه ما بعد تطورت ماااادري ليه؟؟(وحده منقهره وطفشاانه)

الموضوع حلو وبصراحة يحمس الواحد للمشاركة

أنا شخصياً اشوف الرياض روعة ....اسواق على الكيف ...والشاليهات من ابدع مايكون ....

وجوها ذا الايام رايق....وعاصمة بلادي من حسن للاحسن برعاية ولدها البار سلمان ....

وحبي للرياض كل يوم يزيد وغلاها باقي للابد ...

صافي الود
والله إني رحت لأبها مليانه وصخ وريحة
إذا قارنتيها بالطايف هي أنظف بس السبب فرق المساحه بين المنطقتين
ولا والله كلها حوسه.......لازم تدخلين جو البر وتبعدين بين الجبال عشان تلقين مكان نظيف؟؟؟؟

أما الأسواق كلهم يحومون الكبدبس الطايف أفضل عند المقارنه فقط لا أكثر

والسكن وما أدراك ما السكن دفع فلوس والله ماشفت ولاسكن يستاهل اللي دفعناه فيه...


توتي24
زين لقيت أحد مثلي والله إني أفكر إن القعده في البيت أصرف
خساير وما نلقى شي يستاهل؟؟؟؟

noura....
بالله عليك كم تجلسين في الطريق لين توصلين الشاليهات
زحمه ....والشوارع متوقفه وتفتيش وحاله....
وفوق كل هذا حر يصلخ الجلد...وكتمه ...والله يستر ما يغطينا العج والغبار بعد
................................

بنات أنا مقهوره مرررررررررررررررررررررررررررررررررررررررررررررررات ومرات
ليش ما عندنا أماكن حلوة ومتنزهات تفتح النفس
في الأماكن اللي جوها حلو
الطايف ......أبها......الباحه.....شمال المملكة
عندنا أجواء رررررررررائعة في المملكة
ولكن نفتقر للنظافه والإهتمام والتنسيق

اللي ما يسافرون برى المملكة ...وين يروحون؟؟؟
انا بقولك يا ام خولة يقعدون ببيتهم
هو فية مكان ينراحلة الله يخلف غير مكة والمدينة الله يشرفهم.

حرررررررررام عليكم يا بنات

والله في اشياء حلوه مرررررررررره انتم وينكم عن العالم

صحيح الجو ما يساعد لكن ما ننكر ان في شي حلووووووو

الرياض فيها منتزهات ومهرجانات وجده فيها غير هذا مخيم البحر ومهرجانات إنشاديه حلوه مرررررررررره

وابها احلى واحلى ما يحتاج نقول

والطائف جو ومنتزهات خطيررررررره

يعني في كل مكان شي خيال

المملكه حلووووووه وبس

شكرا ام خوله على هذا الموضوع ..............فعلا محتاجين نعرف بعض بالاماكن الحلوه والاسواق وغيرها



شوفي حبيبتي انا من النوع الي يصيف في المملكه فقط

في ايام الحر نروح الطايف

الردف ابعدي عنها ......انا ما ادري شلون مسمينها حديقة .........وكمان حديقة الحيوان رائحة لا تطاق

عندك القريه الخضراء حلووووووووووووووووووه مساحات خضراء وجلسات وكباين للي يبغى يجلس براحته

نظامهم مميز فيها جلسات عربيه

وجلسات كراسي ويقدمو الشاي والقهوه بالدله والبريق

احس لهم طابع مميز

المكان ملموم يعني ما تخافي على اطفالك لا يضيعوك....... يروحو ويلعبو على راحتهم فيها العاب خفيفه مثل الي في السدحان لكن مساحاتة المنتزه واسعه ....وفيها متحف على قده ......يعني ما فيها ازعاج وبنات قلة حيا

وفيها الخدمات المعروفه الي هي الوجبات السريعه

وكمان فيها مطاعم توصل الاكل لحد كبينتكم وتاكلو على راحتكم

انا اعتبر لها طراز مميز غير المنتزهات الي شفتها كلهم

وتجي عندهم مهرجانات وبرامج التلفزيون الي ترفع الضغط .....لكن انتي تقدرين تتجاهليهم


الشقق في الطايف على اربع ميه ويمكن فيه اقل ................لكن ما تلاقين النظيفه

اخذناها من سنتين جدييييييييييييييييييييييييييييييييييييده واخذنا نفس الشقه العطله الي بعدها ...........شي لا يصدق تقولين هذي لها ثلاثين سنه مسكونه من كثر ما هي مندمره

الاسواق ....صراحه كلها عاديه لكن كل سنه يفتح جديد ......لكن تبون رايي الشخصي انا ما حبذ ادخل السوق لان الرجال يكرهون طاري السوق موت...... فاحسن ما تضايق زوجها عشان ما يكره التمشي ...وينكد عليهم عيشتهم ....................صراحه الي تدخل عشان تاخذ تنوره او شنطه او اكسسوار وهو في كل مكان ..............ما لها داعي ذا الحرمه ...........................الا اذا كان فيه حاجه مميزه ما راح تلاقيها الا هنا
او رخيصه يعني السعر في المدينه هذي اقل .....ولا بلاش من التسوق







منتزه الحدبان احسن حاجه فيه عروض الدلافين هذا رايي الشخصي وكمان فيه التلفريك

الالعاب متوفره للاطفال وفيها حيوانات للركوب وفيه اماكن مخصصه للشوي

كنت اروح له .........السياره تدخل بعشرة ريال

والاكواخ مجانا لكن في السنوات الاخيره صارت بخمسين ريال وحطو فيها تلفزيونات

وانا عن نفسي ماني من الي يجلس الليل والنهار وبنشر ملابسه ..............ما شاء الله عليهم ذا الناس يحللون فلوسهم
انا ممكن اجلس اربع ساعات واحس الخمسين كثيره

واذا كنتو من الناس الي يحبو الستر الواجد لازم تاخذو معاكم( رواق) الي هو الشراع عشان تسترون بعضه

والله اني في الفتره الاخيره ما عاد رحت له


نجي لمنتزه الكر السياحي





اذا فيه لو وحده متابعه معاي راح اكمل وكمان انتو عطونا الي عندكم