اخواتي وحبيباتي الله يمسيكم بالف خير
الله يجزاكم الخير عمشاعركم الطيبة وسؤالكم عنا ودعائكم الدائم لنا
ادعولنا يا اخواتي,,,احنا تعبانين كتير
الموت والخراب بكل مكان
نظرات الناس حزينه كلها هم وتساؤلات محدش عارفلها اجابه
كل ليلة بنام واحنا قاريين قران وناطقين الشهاده ,,,حاسيين انه بكل لحظه ممكن نكون هدف للكيان الصهيوني
نفسيتنا تعبانه وولادنا تعبوا كمان
حرام والله حرام هالصغار يموتوا وينحرموا حقهم بالحياة والفرحه
حتى بيوم العيد قصفوا اطفال كانوا بالشارع بيستنوا دورهم عشان يلعبوا بالمراجيح
ولادي طول النهار ماسكين فيي كل ما اطلع من الاوضه بيصييروا يعيطوا
حتى الصلاة لما اجي اصلي ببعت لحد يقعد معه عشان اعرف اروح الحمام اتوضأ
لا اكل ولا رضاعه ,,,,ضعفوا كتير
كل كلامهم عن اليهود وكيف خايفين يموتوا من القصف
والله والله تعبنا
انا مش عارفه الناس الي راحت بيتوها وولادها كيف ممكن يكملوا حياتهم
من وين بدهم يبدوا
الي مات مات شهيد وكسب الجنة ان شاء الله
بس الناس الي وراه ايش تعمل ,,,يا الله لو تعرفوا كم طفل تيتم,,,كم طفل ماتت امه
الي ماتت امه بيقطع القلب لانه ابوه مصيره يتجوز,,,ابن عمي دكتور وكان يحكيلنا حاجات بتقطع القلب
صحيح انتوا اهل الخليج والعرب كتر خيركم
وديما بتدعمونا ماديا ,,,بس لامتى يا ناس
لمتى حنضل هيك,,حياتنا رعب
انا ساكنه بالطابق الخامس وكنت اشوف من بعيد الاشتباكات بين المقاومه وبين اليهود
حسبي الله عليهم هما مرتبين هالقصه من زمان
الشباب ال3 الي حكوا انه حماس خطفتهم,,ميتين بحادث سير بتل ابيب واليهود اي شي بيستخدموه لمصلحتهم
اتهموا حماس ,,مع انه حماس نفت وصرحت انها ماعملت هاشي وانها لو خطفتهم كانت حتعترف
بعدها خطفوا الطفل محمد ابو خضير عمره 13 سنة ربطوه وضربوه وحرقوه حي ,,شربوا البنزين غصب عنه وولعوا فيه النار
واستكتروا علينا نرد عليهم ,,وبدت الحرب
لي صديقه من حي الشجاعيه ,,حكتلي انهم كانوا يمشوا والناس ميته ومرميه عالارض وكانت حفيانه مش لابسه شيس برجليها,,,قعدت عند ناس قرايبها والها اكتر من 4 ايام ما غيرت ملابسها حتى الداخيله بهالحر
سامحوني انا بفضفض معكم
استنوني بكلام تاني
وتنسوناش من الدعاء أمانه عليكم
الروابط المفضلة