حبيباتي جزاكم الله الف خير علي دعاءكم لي
اللي حصل معايا ومع ابني كان صعب عليا قوي انا في غربة وربنا من عليا بالحمل بعد شهر من زواجي والحمدلله كان حملي ميسر بعون الله وكنت اتابع هنا وكل شيئ كان تمام وبعد الشهر السادس سافرت مصر علشان أولد عند اهلي وكان المفروض اولد يوم 16/8 ولكن جاءتني الام الولادة وولدت يوم 16/7 يعني قبل ميعادي بشهر كامل وكان ادم حبيبي وزنه الحمدلله 2500 جم ولكن الدكتور اداله حقن مضاد حيوي كتير وقال لانه مولود بدري بس احنا مرتحناش لكلامه ورحنا لدكتورة تاية قالت اعملوله ايكو لاني سامعة صوت مش مظبوط في قلبه وعملناها وطلع حبيبي عنده 3 ثقوب في قلبه بس طمنتني انهم ان شاءالله هيقفلوا من غير علاج مع الوقت صحيح خفت عليه قوي بس كنت مطمنة المهم انه برده بدأت تجيله الصفرا من تالت يوم والدكتورة اديتله دوا شراب وفي الاعادة طمنتني انه احسن الحمدلله من ناحية الصفرا يعني ده كان في خامس يوم من ولادته حبيبي في اليوم الرابع والخامس كان نايم علي طول ومكنش بيعرف يرضع مني فكنت بشفط اللبن بالشفاط واديله بالببرونة او المعلقة في اليوم السادس سبحان الله صحي وكان كويس قوي وسهر معايا كتير واخد لبن يمكن اكتر من اللي شربه من ساعة مااتولد وفي اخر السهرة حبيت اديله نص ملعقة الدوا ويادوب يا روحي اخد نقطتين راح رجعهم ووراحم شوية لبن والولد بقي وشه اسود بجد ازرق غامق قوي افتكرته شرق مني خبطه علي ظهره خفيف زي مابيقولوا لمدة ثانيتين يمكن لقيته زي ما هوا يا حبيبي جريت علي ماما وبابا اصحيهم اتفزعوا لما شافوه عرفت ان دي اخر لحظة هيكون معايا فيها جرينا في الشارع زي المجانين عالمستشفي وكان قبل الفجر لكن ربنا اراد ولما وصلنا الدكتور قال قلبه وقف ساعتها حسيت الدنيا كلها انتهت وان الفرحة مش هشوفها تاني والله ما عارفة ايه اللي حصل ان كان شرق مني ولا علشان حاولت اديله الدوا بالعافية لانه كان بيكبه اعتقد انه مكنش بيعرف يبلع كويس بس برده ده قضاء الله الغريب ان بعد حبيبي ما توفاه الله بساعتين يمكن والله اعلم يمكن بمجرد ما مات الولد الناحية اليمين من خده ورقبته كانت لونها ازرق زي ما يكون الدم محبوس تحت الجلد وكنت شايلاه وببوسه وحطيت ايدي علي راسه لقيت سبحان الله بروز جامد في راسه بالطول كان عظم بارز بطول الراس
دي حكايتي بالله عليكم تدعولي بالصبر انا ساعات بحس اني هتجنن وبدعي ربنا بالصبر استغفر الله العظيم مفكرتش للحظة ان ممكن يروح مني وبدري قوي كدة ربنا يعلم كان مالي عليا دنيتي ازاي من ساعة ما بدأت احس حركته في بطني
بالله عليكم اللي عنده تفسير علمي للي حصل يقوللي وبرده ده قضاء الله وقدره
رد مع الاستدلال
الروابط المفضلة