السلام عليكم ورحمة الله وبركاته

بكل عفوية.. وبروح مرحة ... يروي الشاب الغزاوي كيف يقضي يومه خلال الحرب...
أترككم معه..!!
يقول:

كنا نشوف أغلب القصف على التلفزيون .. هلقيت صار قدامنا مباشر
طول الليل الدنيا تضوي وتطفي.. زي الألعاب النارية..
بس العالم الألعاب النارية عندها من الأرض للسما.. إلا في غزة.. من السما للأرض..
هيهم وصلوا تل الهوى.. يعني بشيكل بكونوا عنا.. مش بشيكل ونص حتى..
أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة..
ومستغربين اني قاعد عالنت.. على أساس إنو الدنيا حرب لازم أضل قاعد ألطم..


تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار..
مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..
ما علينا.. الحلو في الموضوع انه شلومو بتبين حنيته في وقت الحرب .. بقولك حفاظاً على رفاهية الشعب.. اعطونا تلت ساعات تهدئة في اليوم.. الواحد يعمل فيهم اللي بده اياه..
وأحلى ما فيهم انهم مشكلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة..
وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..
والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..
اليوم قعدت أفكر أفكر ايش أعمل.. لقيت احسن اشي أعمله اني أنام.. عشان الجو بكون هدوء وفش صوت قصف (نسبياً) ..
لأنه طول الليل صوت القصف وصوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح..


طول ما الواحد قاعد وهوة بسمع يا صوت صاروخ قريب.. يا بعيد.. يا بحس بهزة.. وبدينا نسمع مناطق غريبة صاروا يقصفوها..
مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد)..
طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده..
شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني..
الأعمار بيد الله.. الواحد عنده يقين انه كل شي بأمر الله.. عالرغم بإنه الواحد بطل يخاف زي أول لما يسمع صوت صاروخ..
بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..
دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"..
بس هالمقولة بتنطبقش عالصواريخ.. ولا ايش رأيكم..؟


أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية..
كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واحد بقولك جيش الدفاع الاسرائيلي..
ويطلع الشب بحزرك انه يكون عندك سلاح.. أو تتعامل مع واحد من المقاومة..
بس اليوم حسيت انه فش إلا تلفونا بكل غزة.. مسكتش وهوة يرن..
- ألو السلام عليكم...
- وعليكم السلام..
- معك فلانة من ليبيا.. الله معكم.. الله ينصركم.. الله يقويكم..
- تسلمي يا حجة.. إدعولنا..
- الله ينصركم ويحفظكم..
- يلا سلام عليكم..
- وعليكم السلام..
هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..
ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..


لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور..
بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..


طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة.. وهية رياضة براميل الميا..
أول ما أفتح عنيا على طول بمارس الرياضة اليومية.. بطلع على سطح الدار بتفقد البراميل.. وقديش ضايل ميا.. طبعاً عن طريق الدقدقة على البرميل..
الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه ..


أنا لقيت حالي لهلقيت عايش قلت أكتبلكم أحكيلكم عن وضعنا.. بكرة يمكن أكون عايش بس مش قادر أكتب.. أو مش عايش من أصلو..
إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..
ولو ضل معكم وقت.. إدعولي أصير غني..


ونشوفكم على خير..

*****

وصلني عبر الإيميل من مصدر موثوق فأحببت مشاركتكم به..
طبعا الكلام باللهجة الغزاوية وربما تكون بعض الكلمات غير مفهومة
فلا تخجلوا من طلب المساعدة للترجمة

وما رأي أخواتي الغزاويات بأن نجعل هذا الموضوع لسرد يومياتنا في الحرب فكل بيت فيه على عدد أهله قصصاً وحكايا

::

حمد لله على سلامتكم يا الغدير انتِ وكل الاخوات ..

لا حول ولا قوة إلا بالله
هههههههههه
شر البليّة ما يضحك ..
كان الله في العون
دمتِ بخير يا غالية ..

::

وعليكم السلام ورحمة الله وبركاته
منورة ياقلبى . وأنا أقول الجميل بيعمل إيه فى الإخاء
شفت اسمك منور هنا
قلت أشوف إيه الحكاية

طبعا الكلام باللهجة الغزاوية وربما تكون بعض الكلمات غير مفهومة
فلا تخجلوا من طلب المساعدة للترجمة

أجمل شئ والله
نتعرف عليكم من قرب
بدى تعلمينى اللهجة الغزاوية
مشان لما آتى عندكم ما تكتشفوا أنى غريبة
:

وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..

أكيد... الله يثبتكم
أذكر إحدى الأخوات زارت الجرحى بالمستشفى
وصارت تبكى بكاء شديد .
والأخت الغزاوية تهدئ فيها
وتثبتها وتصبرها ..

دمتِ فى حفظ الله

الحمد لله على سلامة اخوااتنا بغزة
والقصة جميلة ومعبرة
ومثل ما بنقوووول
هم بيضحك وهم بيبكي
هههه
كان الله في عونهم

بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..

ههههههههه
لاحول ولاقوة الا بالله
الله يكسرهم اليهوووووووود
غدوووورة هاي موبس لهجة غزااوية
هاي قريبة كتير من لهجتناا الطولكرمية
خخخخخخخخخخخخخخ

هلا بالغدييير

حمد الله على سلامتك حبيبتي



خخخخخخخخخخخخخخخ

شكلو الي بعتلك المذكرات بعرفو كمان هههههههههههههههههههههههههههههههههه

آآآآخ يا صبايا هي صح بتضحك بس هاد الي عن جد كان يصير وبحذافيرو .. الاخ ما قصر ههههه

وعليكم السلام ورحمة الله


ياهلا والله غدوور


يا الله ع الازمه والحرب اللي عايش فيها الا انه يحكي باسلوب فكاهي وتحسين من كلامه روحه مرتفعه

ماشاءالله تبارك الله ..


اعجبتني المذكرات واكثر شي عجبني اللهجه

ننتظر مذكرات اخواتنا نبغاها حصريه هنا مو منقوله


يسعدكم ربي



.,

كتبت بواسطة رغد الاسلام

::

حمد لله على سلامتكم يا الغدير انتِ وكل الاخوات ..

لا حول ولا قوة إلا بالله
هههههههههه
شر البليّة ما يضحك ..
كان الله في العون
دمتِ بخير يا غالية ..

::

الله يسلمك يا رغد..
فعلا شر البلية ما يُضحك..
تسلمي على المرور..

كتبت بواسطة بداية داعية

وعليكم السلام ورحمة الله وبركاته
منورة ياقلبى . وأنا أقول الجميل بيعمل إيه فى الإخاء
شفت اسمك منور هنا
قلت أشوف إيه الحكاية

أهلين عزيزتي..
انتي مش عارفة أن الإخاء كان بيتي الأول وبعدين الروضة أخدتني منه ..

أجمل شئ والله
نتعرف عليكم من قرب
بدى تعلمينى اللهجة الغزاوية
مشان لما آتى عندكم ما تكتشفوا أنى غريبة
:

تكرمي..على راسي..
لاحظي إني بتكلم بلهجتنا هلأ بلكي تلقطي كم كلمة

أكيد... الله يثبتكم
أذكر إحدى الأخوات زارت الجرحى بالمستشفى
وصارت تبكى بكاء شديد .
والأخت الغزاوية تهدئ فيها
وتثبتها وتصبرها ..

سبحان الله..فعلا الواحد من كتر ما شاف تعودنا..
وربنا الحمد لله أنزل سكينته على الناس ..

كتبت بواسطة ندى الإخاء

الحمد لله على سلامة اخوااتنا بغزة
والقصة جميلة ومعبرة
ومثل ما بنقوووول
هم بيضحك وهم بيبكي
هههه
كان الله في عونهم

ههههههههه
لاحول ولاقوة الا بالله
الله يكسرهم اليهوووووووود
غدوووورة هاي موبس لهجة غزااوية
هاي قريبة كتير من لهجتناا الطولكرمية
خخخخخخخخخخخخخخ

حياكِ الله أختي ندى..
أول مرة أعرف إنك من طولكرم..تشرفنا..
بس أعتقد بطولكرم بتختلف عنا شوي خصوصا حرف القاف بيقلبوه كاف..صح؟

كتبت بواسطة san79

هلا بالغدييير

حمد الله على سلامتك حبيبتي


خخخخخخخخخخخخخخخ

شكلو الي بعتلك المذكرات بعرفو كمان هههههههههههههههههههههههههههههههههه

آآآآخ يا صبايا هي صح بتضحك بس هاد الي عن جد كان يصير وبحذافيرو .. الاخ ما قصر ههههه

أهلين أختي..
يمكن بتعرفيه للأسف أنا ما بعرفه ..
وكلامك صحيح..الأخ شرح الوضع بالضبط وإن كان بطريقة هزلية لكن هذا الواقع وهذا في أبسط الأحوال ..

كتبت بواسطة حلى قهوه

وعليكم السلام ورحمة الله

ياهلا والله غدوور

يا الله ع الازمه والحرب اللي عايش فيها الا انه يحكي باسلوب فكاهي وتحسين من كلامه روحه مرتفعه

ماشاءالله تبارك الله ..


اعجبتني المذكرات واكثر شي عجبني اللهجه

ننتظر مذكرات اخواتنا نبغاها حصريه هنا مو منقوله


يسعدكم ربي


.,

ويسعدك يا رب..
وأنا أنتظر معكِ أخواتنا العزيزات..

السلام عليكم ورحمة الله وبركاته

الله يسعد قلبك متل ما أسعدتبينا حبيبة قلبى
فعلا والله الوصف دقيق ومزبوط
يا رب تنذكر وما تنعاد هالأيام الصعبة
الحمد لله الذى ربط على قلوبنا وانتزع منها الخوف
حتى في أحلك الظروف واصعب المواقف
نجد هناك البسمة والأمل والتفاؤل
والأهم من هذا كله
قوة الإيمان والإرادة والعزيمة
لله درك أيها الشعب البطل الصامد
بوركت وبورك أبناؤك
بارك الله فيك ياغدير
مااا زلت في انتظارك
نوم العواااافي

هاي قريبة كتير من لهجتناا الطولكرمية

خلص يا ندوش
راح ننتظر منك موضووووع
باللهجة الطولكرمية
بس لا تتأخرى علينا
وأنا مستعدة أكون المترجمة معاك

ههههههههههه
الحمد لله على سلامتكم
الله لا يعيدها من أيام