الله يسلمكم هذا أول موضوع لي و أتمنى أنه ما يكون مكرر . و بأبريء ذمتي و أقول لكم أن الموضوع
م ل ط و ش لكن والله فيه تعديلات و اضافات كثيرة مني .
و أتمنى أن يعجبكم الموضوع و تستفيدون ، و بأعلمكم شيء فيه كلمات اندثرت و ما عاد تستخدم و فيه أيضا كلمات تستخدم في ضاحية من الرياض و لا تستخدم في أخرى .
نبدأ باسم الله الرحمن الرحيم :
أول كلمة نبدأ فيها هي :
تسذا : المعنى بالنسبة لي واضح يعني (( كذا )) ولازم تقولونها و أنتم مادين براطمكم .
فيذا : فيذا يعني: هنـــــا ، مثال : حطوا ردودكم فيذا تحت .
مـــــــير : بتحسبونها كلمة إيطالية . هذي و الله الورطة وش معناها ذي ، يمكن تكون فاصل إعلاني .
مثال : تتكلمين أنتِ و صديقتك عن شيء و ذكرك هالشيء بصديقة لك ثانية و فجأة تسألينها : أيه ميــر وش أخبار فلانة عساها بخير فتسولفون عنها و بعدين ترجعون للي كنتوا تتكلمون عنه عاد بكيفكم المهم انها تجي فجأة
صدز : يعني : صدق ، والله و زي كذا .
صدزية : صدقية ، حقيقية و بما معنى ذلك .
زلابة : يعني بطة ، وهذي أنا أول مرة أسمع بها و العمدة هنا على اللي كتبها ما أدري عنه .
دبوج : بس أنها شينة و إذا أحد قالك إياها تراه يسبك , و فيه أشهر منها و هي :
دلـــــخ : و هذي سبة بعد و نفس اللي فوق و معناها خبل . معتوووووووه >> حلوة معتوه <<
دجة : ما عنده سالفة .
هزع : و تنطق بفتح الهاء و الشدة بالكسر على الزاي و السكون على العين .
و معنى ذا الكلمة يعني طمن أو أومئ مفهومة إن شاء الله.
مهيب - و مهوب : تعني بالعربي : لــــــــــيس .
مثال: هذي الدراعة مهيب لتس يا نوير هذي لأختس حصيصه >> لاحظوا ما فيه تدليع بس عيارات <<
هق!وتي : و نطقها يكون أولا تنطق هق وبعدين وقفة بسطة تشهقون شهقة خفيفة و تكملون بعدين الـ ( تي )
و معنى هالكلمة : أغديـــه ، على بالي أشرح ، بس حبيت أقولكم ان غديه نفس هق وتي و المعنى : أظن و أو أعتقد . مثال : ( هق وتي أن دحيم يجي الليلة ) يعني أتوقع أن عبدالرحمن يجي الليلة . و إذا تبدلونها باغديه عادي .
توحي : تسمع ، مثال : إذا جيت تسلم على شايبن من شيبانكم تهزع على راسه ( سبق شرحها ) و تقوله مساك الله بالخير ، بيقول هاه وشو ؟؟؟؟ على طول أنت قله : أنت توحي طال عمرك .
أبووو : هذي مالها معنى صدز لكن مثال : قهرك شيء بتقوول أبوو ال........ و تقول اللي قاهرك . لكن مهيب زينة في بعض الأحيان .
كتــــــر : زي معنى حافة أو طرف ، بس هذي تستخدم في الأواني فقط . مثال : اثنين قاعدين ياكلون من صحن واحد مع بعض و الأول أخذ من جهة الثاني فيرد عليه الثاني و يقول : لا تأخذ من كتـــــــــــري .. يعني جهته )
جـغـمة : يعني رشفة أو جـــرعة .
تشلق : يعني ، ما أدري وشلون تنقال ذي ، المهم أن عكس ذا الكلمة تغط . مثال : أنت قاعد تاكل شيء في خبزة فلما تغط الخبزة راح يكون الغط خفيف و ما تاخذ كمية كبيرة ، لكن تشلق العكس إذا شلقت بالخبزة بتاخذ نص الصحن .
بصـــــرك : ترى مهيب أو مو بـــــــصر يعني نظر لاااااااااا ، بصرك تُنطق بفتح الباء و الشدة الخفيفة على الصاد و الفتحة للراء و السكون أو الوقوف للكاف . ومعناها : كيـــــــــــــــفك و براحتك .
مثال : ناديتي وحده تبينها بشيء و تعذرت هي تقولين لها أنتي ببصرك .
بــــــــــــعدي : مثال : ولد ذاكر و مستانس راح قال لأبوه : يـــــــبه خلصت مذاكر . بيقوله أبوه : بعدي ولدي
يعني المهم أنها مـــــدح .
أمحق : هذي محتارين فيها العلماء اللغويين بس إنشاء الله خيـــــــــر و بيطلعون لها تصريفات ماضي و مضارع .
و الشرح لذا الكلمة ، زي كلمة أيه هين ، مثلا واحد قاعد يشوف الأخبار و جاء بووش الله يورينا فيه و قال كلام مثل كلامه اللي أزعجنا فيه : سيحل الأمان في الشرق الأوسط قريبا ، فيرد اللي يتابع الأخبار يقول : أمحق هذا وجهي ان صار عندكم سلااااام . أتمنى أني قدرت أوصل شيء من ذا الكلمة .
(( أقووووووول لو أبو الأسود الدؤلي و لا سيبويه عايشين ما أدري وش بيجيهم , يمكن أقل شيء في شهار ))
يدربي : يعني : يدحرج ، مثلا إذا قلنا عن واحد : يدربي رويسه . يعني يدحرج راسه . و يدحرج راسه يعني : عايش مع الناس ولا يدري وين ربي حاطه .
كنادر : يعني جــــزمـــــــــة أو حــــذاء الله يكرمكم . و ما أدري من وين ماخذين هالكلمة
زبيريات : نوع من النعال (( الله يكرمكم )) و هــــــــو أحسن مبيد فعال للحشرات و الصراصير و الظواطير ( سيأتي شرح هذي الكلمة الآن ).
الظواطيـــــــــر : لها معاني كثيـــــــــــــرة ، وهي : أبو بريص ، بعرصي أو وزغه كلن يختار اللي يفهم .
سرسري أو ســـــــــربوت أو سريبيت كلها تعني : داشــــــــــــــــــــر أو صايع في الشوارع و هو أسرع واحد يطيح في التتن اللي هو الدخان .
بـــــــــــــــــرندا : كيف الحال ؟؟ ما أدري وش بلاهم سموه برندا ، الظاهر علشان أول من شربه في الرياض كان بردان و معه انفلونزا و مزكم قال برندا .
محلي : ترا ذا الكلمة مو محلي يعني وطني لاااااااااااا تنطق بدون الشدة على اللام و معناها : مصدي ( من الصدأ ) أو قديم.
يـــــــــا خزيـــــاه : أكثر من يقولها العجز الله يخليهم لنا و يطول في اعمارهم . و هي بمعنى : واعيباه تجي هالكلمتين في حالة الفشيلة أو الحياء .
و من أشياء العجز عندنا : الديرمة أو الديرم وهي خشـــــبة يحطونها بين الشفايف و يفتحون و يسكرون عليها إلى ان تتلون الشفايف بلون أحمر زاهي ( يا عيني على الكشخة ) و اللي تبي أرسلها من هالروج الحلو ما عندي مانع بس بشرط تعطوني قيمته . يكفي أنه ما له مدة انتهاء و بعدين روج العصر الحجري .
يصطــــــــر : يعني يكفخ أو يصفق أو يصفع . مثال : تهدد واحد قله ترى باصفقك كف ولا ترا باكفخك . على طول ينحاش .
السواني : روحوا للجنادرية و تعرفونها ، مهوب تروحون الفيصلية و تفشلونا . و هذي الله يسلمكم البعارين اللي تعمل في إخراج الماء من البئر .
سماط : لا تروحون للجنادرية ، لا روحوا لمحل أواني و قولوا له عطنا سمــاط بيعطيكم سفرة أكل .
دارسين : خشب يحطونه في الطبخ يمكن أنه عود . لا أمزح أخاف الحين تحطون العود في الطبخ معروف أنه هو القرفة .
نـــنــتـــسب : باعلمكم وش لون تنطق أول ، تنطقون النونين بسرعة مع بعض ثم توقفون لمدة ثانية و تقولون تسب بسرعة . المعنى من هالكلمة : يعني نغرف الغداء أو نحط الغداء .
مراصيع : و فيه رواية أخرى رصع .. هو نفسه بس بطريقة ثانية ، و يسمونه احيانا مصابيب .
تِرم تِرم : هذا فيلم كرتون من أول يسمونه تِرم تِرم ، و الحين صار أسمه النمر الوردي و عيال النعمة سيمونه بينك بانثر . سبحان مغير الأحوال .
عــــــــــوافــــــي الله : هذي الكلمة عقدت البزارين كلهم دائما تستخدمها الأمهات لتخويف البزران إذا بغوا يطلعون الشارع في الليل و يقولون لهم : تــــــــرى بتجيك عوافي الله .
و البزران : الأطفال الصغار .
وشذا : يعني ما هذا what is this ؟
لابد : ننطقها مع بعض مو معناها لا بد يعني يجب لاااااااااا ، معناها مختبأ أو قاعد و هو مسوي شيء غلط مثال لذلك : وراك لابدن فيذا و أنا أدورك من صباح الله .
رد : يعني طـــــــرف أو سكر . و مثالها : ردي الباب يعني سكري الباب .
خــــــــــوش : وذي وشلون أشرح معناها ، لا تحسبون أنها كلمة تخوف لا عادية .
صدوا للبر : عبرة تدل على التعجب ، ما أدري وش معناها بالظبط .
الحوي : الحوش و الفناء اللي يكون في وسط البيت ، هذا من أول يوم كانت البيوت فيها في الوسط زي المساحة الصغيرة لكن الحين تغيرت الحال الحمدلله .
هون ، أو هونت : وتنطق بالشد على الواو و تعني : مثلا واحد كان ناوي يطلع لمكان أو يسافر و صار له شيء و هون .
مــــــــــيده ، أو ميدها : مو ميد المحل ، لا هذا معناه : وش رايكم نضرب مثال أصرف :
مثلا واحد شاف اخو صديقه و سلم عليه وقاله : قل مـــــــــــــيد أخوك أني أسلم عليه و مشتاق له .
زدر : قدر اللي ينطبخ فيه .
أنقلع + أذلف + فارق + طس = (go away)!
أمصع : المصع المعط بأقوووووووووى شيء . مثال : أم تقول لولدها تعال ولا ترى بامصع أذانك .
و ختــــــــتم بحـــــمد الله و فضـــــــــله
متى تبغون الأختبار ؟؟
أتمنى أن يكون عجبكم .
.
الروابط المفضلة