ابغى مساعدتكم في بناء بيت العمر
السلام عليكم ورحمة الله وبركاته
حبيبات قلبي ومصصمات منتدى لك
ابغى مساعدتي في تصميم بيتي بيت العمر إن شاء الله
وياليت اذا كان عندكم افكار ثانيه تذكروها لي
وانا راح اقول لكم على الافكار اللي عندي وإن شاء الله المساحه تسمح وتساعد على تنفيذ ما أريد
واكون لكم شاكره ومقدره وجزاكم الله كل خير
انا ياطويلات العمر عندي ارض وابغى ابني فيها فيلا
وتكون مكونه من دورين وملحق هذا لنا فقط
اما الدور الارضي ابغاه معزول للإيجار بمدخل خاص فيه بجزء من الحوش يكون لهم
ويكون مكون من 5 غرف او 6 غرف مع صاله او صالتين واربع حمامات اكرمكم الله ومطبخ ومستودع
الحين راح ابدأ ببيتي الخاص :
الدورالأول :
حيكون لإستقبال الضيوف ومكون من 4 صوالين وصاله كبيره مع 3 دورات مياه بمغاسل خارجيه حتكون من الرخام بإذن الله
ومستودع مع مطبخ وتكون مساحة المطبخ 5 * 5
وابغى اعمل في نفس المطبخ السفلي دخله صغيره بباب ويكون مثل المطبخ الصغير وخاص بالقلي والطبخ فقط
وله حوض صغير وخزانه صغيره وشفاط على الحوش وطبعا راح اسوي كيشاني للارضيه والاسقف عشان المطبخ الرئيسي يجلس نظيف يارب تكون الفكره واضحه
طبعا ابغى اعمل درج دائري او نصف دائري يصعد للدور الثاني فقط ( لقسم غرف النوم )
ويكون شكله حلو ماأحب الدرج المعتاد ويكون من جنب االصاله للي تحت
لأن الملحق راح يكون درجه من المطبخ السفلي يعني درج جانبي اخرصغير للخدم ويكون مرورا بالمطبخ العلوي الى الملحق يعني مايمر من وسط قسم غرف النوم
وعشان الدرج الدائري يكون لنا فقط دون طلوع ونزول الخدم منه وحتى ناخذ راحتنا و تاخذ الخادمه راحتها من دون مرورها من وسط البيت
والدور الثاني :
راح يكون 4 غرف نوم
غرفة نوم رئيسيه بجناح خاص لها بحمام وجاكوزي وغرفة ملابس
و3 غرف نوم اخرى غرفتين للبنات بحمام خاص لهن
وغرفه لولدي بحمامها
بالاضافه الى مستودع ومطبخ صغير
بالإضافه الى غرفة غسيل خاصه فينا وتكون الغرفه تسع لثلاث غسالات مع تصريف لها ومكان للنشافه وتهويه لها
وصاله طبعا للمعيشه مع جزء لصالة الطعام
وطبعا الملحق راح اخلي فيه غرفتين وحده للشغاله بحمامها اكرمكم الله وغسالة ملابس لها
والثانيه راح اخليها مكان للكوي مع صاله صغيره ومستودع كبير
وابغى السطح يكون من الخلف يعني الغرف يكون مدخلها من الامام على الدرج عشان يكون بعيد عن الشمس والغبار
بالإضافه الى مصعد يكون من الدور الاول الى الملحق مرورا بالدور الثاني خاص بنا
نجي لمواصفات الارض ومساحتها واتجاهها
المساحه للارض 625 متر
على واجهتين شماليه شرقيه على شارعين
شارع 20 وشارع 16
طبعا الحوش راح اسوي ديوانيه لزوجي لإستقبال الرجال بحمام ومغاسل خارجيه خاص فيهم
وغرفة للسواق مع حمام ومطبخ صغير ومدخل غرفته راح يكون من الشارع
اتمنى الفكره تكون واضحه وياليت اذا كان فيه شئ غير واضح الاستفسار قبل عمل المخطط واذا كان فيه افكار اخرى عرضها قبل التنفيذ
وجزاكم الله كل خير
كتبت بواسطة *حواء ثقيف*
الروابط المفضلة