ممكن تساعدونى فى تنسيق شقتى؟

**m_hala** · 08-01-2009, 07:05 PM

سلام عليكم ورحمة اللة وبركاتة
من فضلكم ممكن تساعدونى فى تنسيق شقتى لان انا محتارة جدا
انا شقتى 3غرف وريسبشن و 2 حمام
3 غرف وحمام جنب بعضم و فى ممر بيوصلهم بالريسبشن والحمام التانى انا هعمل الغرف واحدة غرفة معيشة وواحدة غرفة اطفال وواحدة غرفة نوم مش عارفة بقا السيراميك بتاع ال3 غرف لازم يبقا شكل بعض ولا كل غرفة لون انا عايزة احس الالوان كلها قريبة من بعض
انا كنت بفكر اعمل الحيطان بتاعت غرفة المعيشة بنفسجى فى رمادى واوضة النوم بتاعتى احمر فى ابيض بس غرفة الاطفال مش عارفة لحد دلوقتى اعملها اية والحمام عايزة اجيبله سيراميك احمر فى بيج الطقم لونه بيج

والربسبيشن مش عارفة برضة اعمل لونة اية هحط فى انترية وصالون والسفرة و طقمالحمام بتاعة لونة رمادى بفكر اعمل سيراميك الحمام رمادى فى بنفسجى علشان هو وغرفة المعيشة يعتبر قصاد بعض بس الممر بيفصل منهم

والممر المفروض السيراميك بتاعة يبقا زى الريسبشن ولا الاوض

على فكرة انا غرف النوم بتاعتى مش كبيرة اوى غرفة المعيشة اللى كبيرة شوية فمش عارفة الالوان دى مناسبة فى الغرف الصغيرة ولا لا؟

انا عارفة انى طولت عليكم بس ممكن تساعدونى نفسى شقتى احس الوانها كلها ماشية مع بعض بس حاسة انى اللى بفكر فى دا مش صح انتم اية رايكم؟

**ghdghoda** · 08-01-2009, 07:49 PM

و عليكم السلام و رحمة الله و بركاته

اهلا بكِ اختى m_hala معانا فى المنتدى

بالنسبة لاستفساراتك حبيبتى ..

بصى يا عسل
اولا احنا لازم نعرف اية ألوان الأثاث عندك
و دة هيساعدنا اكتر فى احنا نقترح عليكى الوان الدهانات لكل غرفة
و كمان غرفة نوم الاطفال ياريت تحددى لنا الاطفال اولاد ولا بنات و ماهى اعمارهم ؟؟

بالنسبة للسيراميك للريسيبشن و الممر
فيفضل يكونوا من نفس الارضية
و دة خاصة اذا كان الممر هيظهر من الريسيبشن

والربسبيشن مش عارفة برضة اعمل لونة اية هحط فى انترية وصالون والسفرة

لون كل منهم هو اللى هيساعدك على اختيار لون الحائط
و طبعاً فى الحالة دى يفضل ان الوان اثاث الثلاثة يكون متناسب مع بعض

اما بالنسبة للغرف الداخلية
فمش لازم يكونوا بنفس الاستايل او اللون
ممكن كل غرفة يكون لها طابع خاص لوحدها
و فى نفس الوقت يكون الشكل العام للشقة متناسب

و ان شاء الله يفيدك الموضوع دة

•,.·´₪ عـالـمــ الألـوان ₪.,¸,• و { ذوقـك و اخـتـيـاراتك لـمـنـزلـك }(صيفنا ابداع)

فى انتظارك اختى لتحديد ألوان الأثاث

..

**m_hala** · 08-01-2009, 08:01 PM

متشكرة يا اخت ghdghoda على ردك السريع هو مبدائيا انا لسة معنديش اولاد لان لسة متجوزتش الشقة ان شاء الله شقتى اللى هتجوز فيها ولسة بنجهزها ولسة مجبناش اثاث بس بفكر اجيب غرفة المعيشة بيج فى رمادى واوضة النوم بفكر اجيب بنى غامق بس اوضة الاطفال برضة لسة مش عارفة
والاثاث بتاع الريسبشن اعتقد برضة هيبقا بنى فى بيجات

**ghdghoda** · 08-01-2009, 08:30 PM

العفو حبيبتى لاشكر على واجب ..
و مبروك اختى و الله يتمم لكِ على خير
و تتهنى فى الشقة يارب

غرفة المعيشة بيج فى رمادى

اختيارك جميل و هادئ
و لكنى افضل ان يدخل لون معاهم ثالث فى الاكسسوارات
ويكون لون قوى يلفت النظر اليه لينعش جو الغرفة

و زودى من الاضاءة
و وزعيها داخل الغرفة و ركزيها على بعض قطع الاثاث

ممكن تستخدمى اى لونين من الاتنين للحائط
البيج او الرمادى
و كمان تقدرى تدخلى معاهم اللون اللى اختارتيه للاكسسوارات
سواء فى دهان جدار من الاربعة
او من خلال wall art

يتبع ..

**ghdghoda** · 08-01-2009, 09:21 PM

واوضة النوم بفكر اجيب بنى غامق

اول اقتراح اعرضه عليكى بالنسبة لغرفة النوم
و اللى بفضله بصراحة
هو ان الحائط يكون باللون البرتقالى
بجد بيكون رائع

و كمان ممكن اللون التفاحى

و ممكن طبعاً تختارى اللون البيج

و بالنسبة لغرفة نوم الاطفال
فى رأى انك تدهنيها باللون البيج
و ضعى فيها اى اثاث عادى
او مثلا اعمليها غرفة نوم اضافية
بوضع كنبة سرير فيها مثلاً
الى ان يحين الوقت و يرزقك الله بالذرية الصالحة ان شاء الله
و اللون البيج هيكون من السهل جداً الدهان عليه بعد كدة

يتبع ..

**ghdghoda** · 08-01-2009, 09:34 PM

والاثاث بتاع الريسبشن اعتقد برضة هيبقا بنى فى بيجات

زى كدة

و دى اقتراحات اخرى

ممكن اللون النحاسى

ممكن الكاكاوى مع البرتقالى

و الذهبى رااااائع

و الزيتى مع درجات البيج والذهبى فى قمة الاناقة

يتبع ..

**ام صائب** · 08-01-2009, 09:41 PM

أهلا بك أختي هالة

ما شاء الله الأخت غدغودة الغالية قدمت افكار رائعة واقتراحات مميزة جدا
الألوان التي قدمتها الغالية غدغودة قمة بالروعة وستجعل من المنزل لوحة ديكورية متألقة ومميزة ..

بارك الله فيك عزيزتي غودي
ومبروك للأخت هالة
واتمنى لك التوفيق

**ghdghoda** · 08-01-2009, 09:52 PM

والحمام عايزة اجيبله سيراميك احمر فى بيج الطقم لونه بيج

اختيار جميل غاليتى
فانا من عشااااق الاحمر
بس ان شاء الله فى شقتى هعمله للمطبخ

اتمنى اكون افادتك اختى ان شاء الله
و بالتوفيق فى حياتك باذن الله

**m_hala** · 08-01-2009, 10:43 PM

متشكرة جدا يا اخت غدغودة انا فعلا استفدت كتير من ردك جزاك الله خيرا عايزة اقولك كمان موضوع الالوان جميل جدا.
ربنا يبارك فيك يا ام صائب وشكرا على مرورك وادعولى ربنا يوفقنى فى جوازى وفى ترتيب الشقة وتطلع حلوة.

**ghdghoda** · 08-01-2009, 11:03 PM

كتبت بواسطة ام صائب

أهلا بك أختي هالة

ما شاء الله الأخت غدغودة الغالية قدمت افكار رائعة واقتراحات مميزة جدا
الألوان التي قدمتها الغالية غدغودة قمة بالروعة وستجعل من المنزل لوحة ديكورية متألقة ومميزة ..

بارك الله فيك عزيزتي غودي
ومبروك للأخت هالة
واتمنى لك التوفيق

ميرسى ميمو حبيبتى

تسلمى لى يااااارب
و ميرسى على الوسام يا عسل
الله لايحرمنى منك

كتبت بواسطة m_hala

متشكرة جدا يا اخت غدغودة انا فعلا استفدت كتير من ردك جزاك الله خيرا عايزة اقولك كمان موضوع الالوان جميل جدا.
ربنا يبارك فيك يا ام صائب وشكرا على مرورك وادعولى ربنا يوفقنى فى جوازى وفى ترتيب الشقة وتطلع حلوة.

العفو يا هالة لاشكر على واجب
احنا اخوات حبيبتى ..
الله يوفقك
و ان شاء الله الشقة تطلع زى ما انتى عيزاها واحسن كمان