الحقونى عمود فى الجنب مالوش اى لازمة؟؟؟

السلام عليكم اجمل ناس فى الدنيا

انا اختكم الجديدة و بقالى زمان باتمنى انضم ليكم اتمنى ان تتقبلونى معكم و لكم منى جزيل الشكر

انا اشتريت شقة جديدة و لسه ما وضبتهاش بس عندى مشكلة ان فىنصف الريسبشن على الجنب عمود كبير الفرق بينه و بين الحيطة اللى وراه حوالى متر و تم بناء جدار منه للحيطة من ناحية واحدة يعنى اصبح عندى من جنب الشمال للعمود كانه حيطة عادية بس من الجنب اليمين كان عندى كهف عميق شوية ( يعنى حته داخلة من الجنب ) مثلا تخيلو الشكل معايا كإنك عاملة مكان مثلا تحطى فيه زهرية كبيرة اوى و حواليها حيطة محوطاها مثلا اهو ده الشكل. اتمنى انى اكون عرفت اوصف كويس انا مش عارفة استغل الحتة دى ازاى و هى فى نصف الريسبشن يا ريت افكاركم و لكم منى جزيل الشكل.

وعليكم السلام واهلا بيكي معانا
بصي بقي يا سيتي انت عاوزه تقولي ان عندك حته زي الغرفه بس صغيره ومن غير حيطه رابعه صح ولا لا واذا كان لا ارسمي الشكل وابعتيه عشان نقدر نفهم كويس
بس مبدئيا ممكن تحطي حاجه من الاتنين يا مدفاهتدي ايحاء بالحميميه والراحه يا نافوره صغيره تديكي حيويه وبهجه
وبرضه هستني توضيح

انا سعيدة جدا جدا بردك عليا يا بندقة كلك زوق

فعلا يا حبيبتى انتى وصفك سليم بس حجمها صغيراوى يعنى حجم مثلا اد خطوة مثلا يعنى يا دوب تكفى ارفف فوق مثلا او فازة من الحجم الكبير و بعدين فيها مشكلة انه فى النصف من الريشبشن لكن لازقة فى الحيطة على بعد عرضها فقط فاهمانى يعنى ما تنفعش دفاية لان الضلع الناقص فيها مش فى وش الريسبشن لا على الجنب يعنى يبان من ناحية واحدة اما الناحية التانية حيطة عادية. و كمان مش عارفة اعمل ديكور للعمود مع العلم انى ناوية اعمل الارض باركيه. ارجو الافادة مع جزيل شكرى و جزاك الله عنى خيراً

يفضل اختى رسم المنطقة بالعمود لتوضيح الفكرة

هل فكرتى بعمل دولاب خزين صغير مقفول وتنسيق ديكوره ؟

ميرسي اوى لردك يا شذى

فكرتك لطيفة بس المشكلة هايبقى ديكوره ايه اللى باين ادم الناس و انا نفسي ارسمه بس مش عارفة ازاى و لو قدرت اصوره هابعتهولك ضرورى.

ميرسي حبيبتى كلك ذوق

مشكورة

اهلا اختى و مبروك عليكى الشقة و ربنا يملأها ليكى خير و بركة ....

لو اللى فهمته صح ممكن تبطنى الحوائط التلاتة بمرايات

و تعملى فى السقف اسبوطات نور هتعطى منظر حلو من انعكاس النور على المرايات

و المرايات فى منها اشكال مربعات صغيرة بيكون عليها رسومات او اسماء الله الحسنى

و بتتلصق على الحائط...و ممكن تخلى الحائط اللى فى الوش مرايه و تعملى رفوف من الجنب للجنب

يا رب تكونى فهمتى قصدى و تضعى عليها ايات قران او اى انتيكات على الرفوف الزجاج

انا شفتها عند واحدة صاحبتى و ما شاء الله عليها شكلها حلو اوى...يا رب اكون قدرت افيدك

ممكن لو عملتى المساحة دى دولاب تعملى الباب بتاعه مرايات هتعطيكى وسع و مساحة

n2salah
لو اللى فهمته صح ممكن تبطنى الحوائط التلاتة بمرايات

و تعملى فى السقف اسبوطات نور هتعطى منظر حلو من انعكاس النور على المرايات

عجبتني كثيرا فكرة الاخت و يمكن ايضا اضافة حوض زرعه على

الحوائط جميعها من اسفل بحيث ياخذ شكل حرف U


فكرة اخرى

لما لا تهدي الحائط الاخر الملتصق بين العمود وحائط الرسبشين

بحيث يكون العمود فقط قريبا من الحائط الاساسي ..وقتها تستطيعي وضع

عمودين قصرين من الجبس و تعلقي ستارة انيقه

تربط بين الثلاث اعمدة

صف من احواض الزرع و اسبوتات اضاءه

و هذا تخطيط اتمنى ان يكون واضح

اولا مش عارفة اقول ايه لرقتكم كلكم انا حسيت اناى قاعدة مع اصحاب غاليين و بيساعدونى ميرسي ليكم جدا جدا

فكرة صديقتى n2salah فى بالى و عجبانى بس تفتكرى ان دى تنفع حتى لو كانت المساحة غويطة شوية و يا ترى الاقى عندك صور تساعدنى و ميرسي جدا جدا لردك الرائع عليا.

اما حبيبتى behappyمش عارفة اقولك ايه على اهتمامك و حتى الرسمة بس فى عندى مشكلة صعب تتحقق اولا صعب ارجع اهد تانى لانى ما صدقت خلصت هد حاجات كتيرة فى البيت و ان شاء الله هاخد رايكم فى كل ركن فى بيتى و لما يخلص هاصوهولكم باذن الله و تانى حاجة حبيبتى ان على يمين العمود و شماله فى شباكين كبار اوى عرضهم مترين للواحد و كل واحد فيهم هاحط عليه ستارة و العمود ده فى النصف بينهم فياريت لو فى حاجة تانية اقدر استفيد منه لو ارفف او اكسسوار او ديكور بالصور هابقى سعيدة جدا و تسلمى يا غالية.

بالنسبه للرسمة اللى عملتيها انا هاستعين بيها بالفعل انى اخد رايك فى العمود نفسه كمان هل اعمل فيه ديكور معين او لون معين او احط عليه حاجة و تبقى شكلها ازى و على فكرة رسمتك حلوة و الحتة الغويطة اللى قولت عليها هى من جهة اليمن من الرسمة حتة مفتوحة كده و الناحية الشمال حيطة عادية فاصبح فى فجوة بين العمود و الحيطة من ناحية واحدة.

مع حبي للجميع