وحقيقى انا كنت سعيده جدا بالتعرف على الفطاير ده
لانى ما بفضلش المقليات انا وجوزى
زى السمبوسه وغيره
والطعم لا يعلى عليه
والمكونات سهله وبسيطه ولازم الالتزام بها
اما الحشو فأختيارى وبالرغم من كده جيبتلكوا الحشو الارجنتينى المفضل
المكونات
3 كوب دقيق
1 صفار بيضه (مهمه )
1/2 كوب زبده
3/4 كوب لبن دافىء
ملح وشكرا
الطريقه
يوضع الدقيق بالملح عليه الزبده اشبع الدقيق الاول بالزبده
وبعدين عجنتين بصفار البيض وبالمناسبه المره التانيه قلت يعنى البياض حيعمل اه
والله لحطاه يعنى البيضه كامله
والنتيجه بالصفار افضل وقررت ما افتيش فى حاجه مالياش فيها
واخيرا انزل باللبن الدافىءواعجنهم قليل ليتمازج المكونات
واريحها 10 د
وافرده رقيق خالص
واحشى اللى انا عايزاه
اول مره عملتها حشيتها جبنه وبسطرمه وانتوا عارفين التوليفه المميزه والمفضله بتاعه اى حاجه محشيه
وقفلت العجينه زى القطايف ولازم تتقفل كويس وممكن بالشوكه وهم بيقفلوها بالبياض علشان تلزق كويس
وادهنها ببيض ولبن وادخلها الفرن
تانى مره حشتها
بسجق اسكندرانى مفروم وزيتون وكان رااااااااااااااائع وحبيته اكتر من اللحمه المفرومه
وتالت مره عملته
حشيته بالحشوه الارجنتينيه
المكونات
1/2 ك لحمه مفرومه
بصله مفرومه
قطعة زبده للتشويح
2 م بابريكا
2 م شطه
1 م زعتر
1/2 م كمون
بصله خضرا مقطعه (انا استغنيت عن خدماتها)
3 بيضه مسلوقه
ملح وفلفل
زيتون اسود مخلى
الطريقه
البصل مع الزبده على النار وعليها اللحمه المفرومه تقلبتين وعليهم التوابل لغايت لما تستوى وانا زودت م ص صلصه وبقدونس مفروم
وبعد ما فردت العجينه
يوضع اللحمه وعليها شريحة بيض وعليها شريحة زيتون اسود او اخضر
واقفلها جيدا وادهنها وادخلها الفرن تستوى
واتمنى انها تكون عجبتكم
الروابط المفضلة