السلام عليكم ورحمه الله وبركاته
وحشتووووووووووووووووووونى يا حلوات بقالى شهووووووووووور كتير منزلتش وصفات فى جميع الأركان وطبعا السبب الرئيسى هو الحمل والولاده ولله الحمد رزقنى الله بطفلتى رحمه ربنا يبارك فى نور ورحمة ويرزق الجميع بالذريه الصالحه
اللهم امين
ندخل فى الموضوع طبعا والدتى الحبيبه ربنا يديها الف صحه وعافيه شرفتنى لمدة شهرين كاملين وكانوا احلى شهرين فى حياتى
وطبعا متعتنى انا وزوجى ونور بأحلى الأكلات المصريه اللى بنفتقدها
والنهارده حقدم لكم القرص الفلاحى من أيد أمى الحبيبه بالتفصيل الممل
خليكم مع امى ومقاديرها المظبوطه 100%100 باذن الله
المقادير لعمل كيلو واحد
كيلو طحين
كوب الا ربع زبده ساخنه
نصف كوب قشطة فلاحى
كوب حليب دافئ
نصف كوب ماء دافئ
ملعقه شاى خميره
ملعقه شاى سكر
توابل القرص (ينسون شمر سمسم مسحوق رائحه الكعك )
ذره ملح
الحشو
(اختيارى)
ممكن جبنة او عجوه
الطريقه
نذوب الخميره مع السكر فى نصف كوب الماء ونتركها تتفاعل وترتفع
نضع الطحين ونعمل حفره ونضيف التوابل المذكوره مع الملح ونضيف السمن الساخن ونبس باليد جيدا الى ان يتشرب الطحين السمن
نضيف القشطه ونعجن ثم الحليب وممكن العجينه تحتاج حليب نضيف ربع كوب على حسب ونعجن
طبعا ماما لا تعترف بالعجان اطلاقا بتحب تعجن بايدها
وهنا بعد العجن
نترك العجينه ترتاح عشر دقائق قبل التشكيل ونبدأ فى تكوير العجوة وتجهيز الجبنة للحشو
وطبعا الصور شارحة نفسها
فى ناس بتحب القرص مدهونه بصفار بيض وسمسم وفى ناس بتحبها ساده والدتى عملت النوعين
وده النوع السادة
نتركها تتخمر حوالى ساعه وتخبز فى فرن على درجه 180 لمده 15 دقيقه ويحمر الوجه
وده شكلها من تحت لونها وردى جميل ماشاء الله
وده شكلها من الداخل
طبعا تحفظ فى علب محكمه الغلق
طعمها راااااااااائع جدا جدا ومثالى للفطور جربوها بطريقه ماما ان شاء الله تعجبكم
واتمنى تدعوا لوالدتى بالصحه وراحه البال
الى اللقاء فى وصفات اخرى من يد امى الحبيبه
والسلام عليكم ورحمه الله وبركاته
الروابط المفضلة