اليوم قلت خلي نلحق باقي الصور متاع السفرات اللي مانزلتهمش و تخلط عليا الحال ماعادش عرفت وين اللي نزلوا و وين اللي مانزلوش يعني لو لقيتو شيء متكرر معليشي العتب علي العمر خخخخخخ

طبعا السوائل مية عادية و مية غازية و لبن و عصير sunquick و اي نوع عصير ثاني اني حبيت البلو بيري مع الموز مش عادية طعمته و نحب عصير العنب و التفاح حتى هم نموت فيهم باش لما اضيفوني تعرفوا شن تقدمولي خخخخخخ



هذي سمكة موسى مشوية بالفرن مع بطاطا بوريه
و اللي مايعرفش سمكة موسى انقوله شكلها سبحان الله غريب اتخيلوا يابنات عيونها الاثنين على جانب واحد و من تحت ملساء يعني هي نص حوتة مش كاملة
و فيه قصة تروى عن هذه السمكة انه سيدنا موسى لما انشق البحر التقط هذه السمكة و اكل نصفها و ررد النصف الاخر للبحر فلهذا هي نصف حوتة
توة لما انزل رابط الاكلة انزللكم صورها من الجهتين سبحان الله



و هذ الكبة المقلية جتني حلوة و رائعة و خاصة اضفتلها توابل الكبة الجاهزة حتى هي ان شاء الله حنزللكم صورها بس نفضى نتدكر يومها قليتها في اخر لحظة لانني روحت شوية امخر للحوش و الوقت اضغط عليا بس الحمد لله صار منها خخخخخ



حمص بالطحينة طبعا مع الكبة كانت و اني من اول رمضان درت كمية و حطيتها بالفريز يكون اريح بهلبة

و هذي بيتسا عادي خخخخ لو لاحظتوا اني في سفري اللي فاتت مافيش بيتسا لانني و زوجي مش من انصار البيتسا برمضان هلبة مش عارفة علاش بس اختي لما تجيني تجيبلي معها زي ما لاحظتوا فيومها قلت خلي نغير الجو و انديرها و درت كمية بالزايد و قمتها بالفريز باش لو خش عليا حد في يوم فجاءة نلقاها بالسحور و فعلا الحمد لله كان ما توقعت خخخخخ



و هذي الاصابع بالجبن مش عادية حلوة حلوة زي ما تشوفوا فيها فتلكتها شوية



و درت معاهم رز بالخلطة و لحم مشووووي



الشاورمااااا



طاجين ضولمة زعميتك ما بتش انكثر قعدنا يومين ناكلوا فيه خخخخخ
اكيد لاحظتو صونية شربة عدس هدي لبنت اختي ماهو قعدت عندي الاسبوع الاخير من رمضان و علي قد ما نطيب ماتبيش تاكل تنقش تنقيش حتى اكتشفت انها تحب شربة العدس فبديت انديرلها فيها الحمد لله شربتها خخخخ



و هدا ميني برقر بصراحة جاني مش عااادي بكل خفيف و ان شاء الله حنوريكم من الداخل لاني قصيته باش يبان في الصورة غير توة الصور مش علي الجهاز خخخخ

هذا عصير الليمون بقشوره نزلته قبل و ان شاء الله حنزله ثاني بصراحة منعش مش عادي بالصيف و ايام النوووو بس ياخسارة ما صورتاش للاخير ههه يعني يادوب بالخلاط مرة ثانية ان شاء الله





عصير قمر الدين ام ام ام يهبل

هذه الحلويات
سليلات يالكستر و النوتيلا




و هدا كب كيك بقطع الشوكولاته



تطبيقي لحلى الجوزية للغالية حبيبة زوجها بس ما جتنيش شاربه عسلها من الداخل و لما سالت حبيبة زوجها قالتلي لازم تتعسل بعسل سخون و هي سخونة
بس حلوة تى لو العسل من برة بس خخخخخ
عندي ملاحظة للبنات لما تقلوها مدابيكم اول ما تحطوها في الزيت حطوها علي الوجه اللي فيه العسل منظرها يطلع احلى



القطايف بالزبيب و المكسرات اندير فيه بالفرن مانقليش فيه و يقعد مقرمش الي ماشاء الله ما يشلفطش خخخخخخخخخخخخخخخ



الدونات لكن درتها قلوب الدونات ههههه



محلبية بالقرفة و المكسرات



محلبية بالشوكولاتة

و توة جينا للعيد و سنين دايمة

هدي صفرة الحويتات المقلية و البصلة و درت شوية كفتة مع رزيزة بالخلطة و صادف عندنا ضيوف يومها خالي و مرته ونسونا علي السفرة
و طبعا سلاطة خس و حمص بالطحينة
فيه منو يبي الحوت بارد سبحان الله و اني و مرت خالي نبوه سخون فحطيت الباقي بالفرن حتى يسخنوا شوية خخخخ




و هدي الفطيرررة يم يم يم درت معها القلايا بس الصور مازال مش جاهزات اتخيلوها انتم بس تخيلوا خخخخخ





اني الفطيرة طبعا انطيب فيها علي بعضها الورق مش بالوحدة يعني نحط و نقلب و نحط فطيرة ثاني و نقلب و هكدا ليين نكمل الفطاير كلهم مع بعض

و هدي الحلويات ان شاء الله تعجبكم

درت المقروض و البكلاوة متاع زينب محمد ربي يبارك فيها و يحفظها من كل شر
و درت من نفس عجينة البكلاوة المحنشية اللي هي نفسها زمالة القاضي و هدا اللي فضل منها خخخخ

على فكرة درت حتى كعك حلو بس الحق ينقال مش مية مية مرة ثانية لو طلع احسن ان شاء الله انزله













و كل عام و الجميع بخير
و من العايدين الفايزين

و يارب يحقق اماني الكل
و يرحم الكل
و يغفر للجميع
و يحنن قلوبنا جميعا علي بعض

و نلتقي ان شاء الله علي الخير

و السلام عليكم و رحمة الله و باركاته

الله ياحنون تسلم ايديك يارب
ماشاء الله على الحلوات والصفيرات اللي يحلو العين
فصفصت الصور وتفرجت على مهلي ربي يحط ايديك فى الجنة ويرزقك بللي تتمني يارب
تعرفي خشيت على امل نلقي حد مش قادرة انخش للمنتدى ومانشوفش موضوع السفرة الرمضانية
ان شاء الله كل عام وانت بخير ونشوفو حلاوات نفاسك يارب
وبانتظار جديدك ياحبيبة

الله عليك ياحنونه الصفر كلهم ايهبلو
ربي يناولك مافي بالك يارب وكل عام وانتي بالف خير
الاء الله علي الحلوات اتهبل ربي يونسكم ببعض يارب
وكل عام والبنات بالف خير يارب

السلام عليكم ماشاء الله ياحنونه كل حاجه احلى من التانيه الله يحفطك يا غاليه وينولك الافى بالك اللهم امين اومشكوره على المعياده الله يفتح عليك لكن نبى طريقة اصابع الجبن منطرها بيشهى والسلام عليكم