كتبت بواسطة
روني الحلوة
شوفى ياحبيبة انى عندى حشوة للبف تهبل تهبل انى ناخذ فى جينة مبشورة ونضيف عليها زعتر يابس واكليل يابس ونفرم بصل اخضر ناعم وزيتون مفروم وناخذ فى القوراب بنفس طريقة شانتال ربي يحفظها ونعبيهم بالحشوة وفى الكوشة رهيبااااااااات راهم
ومرات نطرح فى العجينة ونقصهما مربع ونبدا موتية حشوة دجاج مسلوق مع الدباير اللى تناسب الدجاج ومفترش ونخلطه مع شويا معدنوس وزيتون وجبنه ونحشيهم بيه ونسكرهم مثلث وندهنهم بالحليب ولا البيض ونرش جلجلان وعلى الكوشه طوالى
وكان تبيها حلوة شوفى الطريقة هذى خوذى تفاح وقشريه وقرشيه مكعبات وتكونى مدايرة كراميل وزيدى عليه التفاح وخليه على النار يطلق اميته على الكراميل وخليه عليه لين يذبل ماطوليش راهو فيسع يذبل التفاح وزيدى عليه قرفه وتقدرى تزيدى شويا نشا ذايب فى امية وخليه يخثر واحشي بيه المثلثات وصكريهم وبعد ماتدهنيهم رشيهم بشويا سكر مخلط بشويا قرفة بنه وصنة الحق
والا تاخذى شريحة عجينة مستطيله وتحطى عليها الحشوة ووتدهنى الجناب بالبيض وتحطى شريحة مستطيله ثانية تكونى مدايرة فيها فتحات وتغطى بيها الحشوة وتلصقيها على الاولى كويس وتدهنى الوجه وطيبيها فى الكوشه تهبل وحلوة وعلى فكرة ديمة ادهنى بالبيض ولا الحليب من بتسكريها باش تضمنى انها ماتنفتحش
والا تقطعى العجينة بقطاعه دائرية ولا قلب ولا الشكل اللى تبيه ويكون الحجم صغير وتكونى موتية نفس العدد من نفس الشكل لكن تفتحيه من الوسط يعنى تخرمية وتلصقى الشريحة الكاملة بالمخرمة بالبيض ولا الحليب وتطيبيهم فى الكوشه وبعدين الفتحى اما تعبيها شكلاته وترشى لوز او تعبيها ريكوته وتصبى شويا عسل حقانى ولا تعبيها جبنة عليها شويا زعتر
وفى طريقة ثانية انى الحق نحبها وتعجب فيا واخذتها من منال العالم نقصها مربع ونكون موتية شرائح تفاح نحط التفاح بعد مانعصر عليه عصرة ليم باش مايسودش ونرش عليه قرفة ونحطه فى وسط المربع ونطيبة فى الكوشه وبعدين نسقيها بشووووووووويا عسل حقانى ونرش شويا لوز حلوة وخفيفة
وكان تبى حاجات ثانية نعطيك ياحبيبة وان شاء الله كنت نقدر انفيدك حتى بشويا
وعلى فكرة كل اللى عاطيتهملك مجربتهم وعلى ضمانتى
الله يبارك فيك يا حبيبة و يجعله في ميزان حسناتك
بعون الله راح ندير من الوصفات الحلوة هذه .... لأني فعلا خاطري اندير حاجة بعجينة البف
الله يحفظك يا حبيبة
كتبت بواسطة
نوسة*
السلام عليكم
ما شاء الله على صفراتكم كل وحدة احلى من التانية
كيتي مبروك على تميز الملف ومنها للاحسن ان شاء الله
اني ديما متابعتكم لكن للاسف ما نعرفش ننزل صور
واليوم درت فطوري رشدة وشربة وبوريك و الحلو قطائف
لان زوجي العزيز ما يستغناش عليهم قريب يوميا اندير فيهم
وصحة شريبتكم كلكم...
أهلين بنوسة شرفتي و آنستي يا حبيبة
و بارك الله فيك ... التميز لينا كلنا يا حبيبة
رد مع الاستدلال
الروابط المفضلة