مساعدة: أنواع اللحم المفروم

السلام عليكم
أنا عضوة جديدة وتوني متزوجة
ما عندي أي خبرة بالطبخ بس حابة أتعلم
و أول سؤال عندي هو شو أنواع اللحمة المفرومة وشو استخداماتها؟

يعني من خلال المواضيع شفت عدة انواع
لحم عصاج
لحم هبرة
لحم بفتيك

شكرا

اهلا بيكى نورتى المنتدى وان شاء الله حتستفادى منه كتير اوى
بصى يا ستى دى مش انواع لحم مفروم دى طرق طهى يعنى مثلا:
العصاج ده عباره عن لحمه مفرومه بس بتحمرى بصلة مبشوره الاول فى الزيت حتى تصبح ذهبى وبعد ذلك نضيف اللحم المفروم ونقلبها شويه لغاية ما يتغير لونها الى البنى بعد كده نضيف فلفل اسود وملح وبهارات وقرفة صغيرة وممكن مكعب مرقة لحم وشويه ماء صغيرة وتهدى النار عليه لغاية ما تستوى اللحم العصاج ده بقى بيستخدم فى حشو الفطاير والمكرون بشاميل والجلاش والرقاق وحاجات كتير.

اللحم الهبره دى على ما اعتقد يعنى لحم صافى خالى من الدهون سواء كان لحم مفروم او قطع لحم هبره يعنى ميكونش فيها اى دهون الى لونها ابيض.

البفتيك ده بقى نوع لحم بشتريه من عند الجزار تقوليله عايزه بفتيك بيبقى عباره غن قطعة لحم مستطيله وسمكها رفيع وبنتبلها بملح وفلفل وبهارات وماء بصل (بصل مبشور يعصر جيدا باليد لاستخراج الماء منه) وعصير ليمون وخل قليل ونتركها تتبل شويه ساعه ممكن وبعد كده نجهز دقيق فى طبق وعليه فلفل اسود وشويه بهارات وطبق تانى فيه بيض مضروب وعليه شويه لبن وشوية زيت وملح وفلفل وطبق تالت فيه بقسماط وبردو عليها بهارات وفلفل وثوم بودره لو عندك ونضع اللحم فى الدقيق لتغطيته ثم البيض ثم البقسماط ونضغط عليه كويس بعد كده يوضع فى طبق ويغطى ببلاستيك ثم يدخل الفريزر حوالى ساعه علشان يتماسك البقسماط و يخرج للتحمير فى زيت غزير بس مش سخن اوى متوسط الحراره ويحمر لغاية ما يبقى ذهبى الللون وبيتقد البفتيك مع بطاطس محمره او مكرونه وسلطه او ممكن عمله ساندوتشات مع مايونيز وكاتشب ومخلل.

بس كده يارب اكون افادتك واى سؤال انا فى الخدمه وربنا يهنيكى مع زوجك وان شاء الله تبقى اشطر طباخه

الاخت سماح فيها البركه ما شاء الله عليها

ربنا يخليكى يا ام شادى ويبارك فيكى احنا نيجى ايه جنبك

تسلمين اخت سماح.. كفيتي ووفيتي
جزاك الله خيرا عزيزتي
وشكرا اخت ام شادي على الرد