حبوباتي في منتدى لك والله اني احبكم واحب المنتدى بقوووووووووووة.
اليوم حبيت اشاركم تجربتي مع العجينة السريعة ولا أحلى. ولا أظن أن وحدة راح تجربها مرة وبس, بالعكس, ماراح تعرف تعجن إلا بهالطريقة, لأن نتيجتها مذهلة.
البداية كانت في بيت عمي لمن زرت زوجته قالتلي عليها وقدمت لي معجنات (فطائر, بيتزا,....) مسويتها بالطريقة هذي, الصراحة شغل صح, وأنا جا في بالي أن أيدينها احترافية مو السبب العجينة, عاد أنا أختكم صار لي وقت ما استمعت نصيحتها ثم مرة انزنقت وتذكرت العجينة السريعة حقت أم إبراهيم وقلت اليوم يومك ولا بعده, وصارت ايديني بعد كذا احترافية مثل أم إبرهيم -إلا شوي-.
ومن ذيك اليوم وانا ما أعرف أعجن إلا بهالطريقة.
طولت عليكم السالفة والان اترككم مع الطريقة:
بنفس مقاديرك للعجينة:
في كأس الخلاط ضيفي الموية والخميرة وشغلي,
ثم ضيفي السكر والملح والزيت والحليب أوالسائل المفضل لديك,
خليها بعدها شوي ثم ابدي بإضافة الدقيق شوي شوي للكاس لين ما تحسين انه خلاااااص الخلاط ما راح يتحمل,
خليها شوي بالخلاط يعني ثلاث دقائق,
سكري واسكبيها في الاناء اللي بتعجنينها فيه راح اتلاحظين انها دفأت شوي ثم ضيفي باقي الدقيق واكملي العجن بإيديك.
عاد خليها على جنب, ربع ساعة بالكثير, ما يمديك تسوين الحشوات إلا وتلاقينها تقولك أنا صحيت عطيني فطوري والا برجع أنام.
الخلاصة: إن كاس الخلاط هو السر وبصراحة كنت حاطة في بالي ألات العجن الكربائية الي يستخدمونها الشيفات, وشفت أنواعهم بالسوق وكنت مترددة شوي لأن أحجامها كبيرة وتاخذ حيز ودخل, طلع, امسح, يعني عبالة شوي وكثر ألات. لكن بعد اللي صار لي لغيت الفكرة كلّش.
اتمنى أنكم تستفيدون وتدعون لي وايا أم إبراهيم.
واللي تجربها تقولنا وش صار معها.
الله معكم,,
الروابط المفضلة