* وصفة متميزة*اليالنجي الحلبي مختلف تماما ( الأسبوع الشامي )
السلام عليكم ورحمة الله
اليوم جايبتلكون وصفة خاصة بأهل مدينة حلب الواقعة في شمال الجمهورية العربية السورية
اليالنجي أو ورق العنب بالزيت عنا مختلف عن باقي الدول المجاورة بل وحتى باقي المدن السورية
الأخت الغالية بسمة نزلت وصفة في غاية الروعة على هالرابط عن طريقة اليالنجي بباقي المدن
بالنسبة إلي أنا بحب اليالنجي بكل أشكالو فطعم الحموضة اللي بيميزو بيخليه بالنسبة إلي و لكتير من الناس ( و خصوصا الستات ) من ألذ المقبلات الشامية و اللي لا تؤكل ساخنة أبدا
ما رح طول عليكون وندخل عالمقادير
رح نحتاج لورق عنب ( ممكن ينعمل بالسلق و الباذنجان و ورق الملفوف )
2\1 كيلو رز مصري ( قصير الحبة )
2\1 كوب زيت زيتون
2 حبة بصل مفرومة قطع صغيرة
2\1 كوب دبس رمان
2\1 كوب ماء
كمشة جوز مفروم ناعم ( إختياري )
تشكيلة من التوابل الآتية
2\1ملعقة كبيرة نعنع يابس
2\1 ملعقة كبيرة قرفة مطحونة
2\1 ملعقة كبيرة ملح
2\1 ملعقة كبيرة سكر
2\1 ملعقة كبيرة فليفلة حمرا ناعمة ( بابريكا )
2\1 ملعقة صغيرة بهار ( السبع بهارات )
بعد ما نقي الرز بغسلو منيح و بتركو ليتصفى تماما من الماي ( ما في داعي أبدا لنقع الرز )
بها الأثناء بدبل البصل بزيت الزيتون على نارهادئة حتى يدبل ويصفر لونو بنضيف عليه الرز بعد ما نتأكد من أنو تصفى من الماي و منقلبو بالزيت والبصل لحتى نحس أنو رح يبتدي يلزق بالطنجرة
منضيف عليه تشكيلة التوابل ومنحرك لمدة دقيقة
وبعدها منحط عليه نص كاسة المي ومنغطيه وعلى نار هادية شي 5 دقايق بس كل شوي بحركو حتى ما يعلق إلى أنو تنشف الماي كلها بطفي عليه و بحط دبس الرمان و الجوز وبحرك وبتركو ليبرد وهيك صارت الحشوة جاهزة
منحط الحشوة على ورقة العنب و منطوي عليها الأطراف الجانبية و منلف الورقة متل ما منعمل محشي ورق العنب
( بعتذر لأني ما صورت هالخطوة )
بعد ما ننتهى من حشو ورق العنب برتبو في الطنجرة ( أنا بحب حط شرايح بطاطا تحتو مشان ما يعلق )
بحط عليه طبق مقاوم للحرارة و بتقلو بشي تقيل نوعا ما
بغمر ورق العنب بالماي وبحط معه ملح حسب اللزوم و ممكن شوية دبس الرمان وبتركو على نار هادية جدا لحتى يستوي ( ممكن ياخد 4 ساعات و أكتر )
لما بستوي بصفي الماء عنو وفورا بقلبو على وعاء واسع وبتركو ليبرد لحتي يسهل سكبو
بعدها برتبو بصحن التقديم طبعا لونو بيكون غامق نوعا ما بسبب وجود دبس الرمان بس الطعم مممممممممم رااااائع
و صحة وهنا
عندي ملاحظتين :الوصفة الأصلية لازم يكون فيها ملعقة صغيرة قهوة ( بن أكيد رح تستغربو ) بس أنا ما بحب القهوة أبدا لهيك ما بحط
أحيانا بيكون دبس الرمان الجاهز شديد الحموضة لأنهم بيزيدو عليه شي أسمو ملح الليمون Citric Acid كنوع من الغش بها الحالة تخفف كمية دبس الرمان حسب درجة حموضتو
رد مع الاستدلال
الروابط المفضلة