العصيدة اليبية يا ليبيات........!!!!!!!!!!!

**أم أنس السلفية** · 31-05-2007, 09:57 PM

السلام عليكم.....
نبي طريقة عصيدة كويسة و ناجحة درتها كم مرة بس يطلعلي يابس شن السبب......
كليتها مرة عند وحدة الله يبارك يدوب في فمك!!!!!!
قولولي كيف انديرها........خاطري فيها ليييين خلاص..

**om_banat** · 31-05-2007, 10:08 PM

حبيبتي انتي ممكن تحطي في مقادر الدقيق اكتر شويا ..
ولكن الفكره الممتازه في العصيده هي

انك تكتري الماء اللي تبي تطبحي فيه العصيده وبعدين تاخدي منه حجم كاس مليان ..وتحطيه علي حنب وبعدين تحطي الدقيق يطبح وتكملي التعصيد وبعدين ترفعيها علي التار مره تانيه وتضيفيلها كاس الماء اللي اخديته في الاول وتنزلي مره تانيه وتعصدي ..تكون عندك عصيده تدوب في الفم؟....
انشاء الله اكون افدتكي

**أم أنس السلفية** · 31-05-2007, 10:32 PM

بارك الله فيك حسبت لو زدت الدقيق ييبس اكتر حنجربها ان شاء الله.........مشكورة

**om_banat** · 31-05-2007, 10:42 PM

نعم اختي انتي لوزدتي الدقيق تبيس .. انتي خلي الدقيق اقل من الماء اشويا ..

**جنـ أم ــى** · 01-06-2007, 03:54 PM

شوفي بما انك متعرفيهاش كويس ننصحك انك تكيلي الدقيق والميه يعني اتحطي طاسه ميه وفيها شويه ملح وزيت او زبده وبعد متفور اتحطي طاسه دقيق وبعد متعصدي اتزيديها ميه مغليه وترجعيها على النار وبعدها عصديها كويس وان شاء الله تزبط معاك ميه ميه

**وعود الخير** · 01-06-2007, 09:57 PM

شكرا لكن فقد تعلمت منكن طريقة عملها

**om dania** · 01-06-2007, 11:56 PM

والله انا اندير فيها بلامكيال وبعد ما انعصدها المرة الاولى نرجعهاعلى النار وانحط الماء الفايرة الاخذيتها من الاول انوطى النار عليها وانخليها اطيب على مهلها وبعد ما تشرب الماء وتنشف انعصدها مرة تانيه وانشالله اديريها واقوليانا شن صار معاكى

*** الفالحة *** · 02-06-2007, 12:33 PM

مرحب اختي ام البنات
حتى انا زي البنات اندير فيها من غير مكيال ، نحط المية وفيها شوية زيت وملح ونخليها لين تفور وبعدين نصب الدقيق ونحركها على الغاز شوية
وانزلها وانعصدها المرة الاولى بااااااااااهي يعني ما نخليش فيه كراكيب تدقيق ( وهذة أهم خطوة في علك العصيدة باش تطلع باهية ...
ونرجعهاعلى النار ونصب الماء يلي خديته من المرة الأولة وأنوطى عليها النار
ومرة مرة نحرك وانخليها اطيب على مهلها وبعد ما تشرب الماء وتنشف انعصدها مرة تانيه
وحتى تعرفي انها طابت وكويسة والا... لا ...

خدي طرف بين يديك وامرسية بأصابعك لو قعد يتكركب زي المستكة وما يتلصقش يعني خلاص طااااايبة

نزليه وفرغيها في قصيعة مدهونة بشويه زيت واعلكيها كويس وكركبيها بالشكل المعروف
جربيها واقوليلنا كيف جاتك .... صحيحة

**طيـــف** · 02-06-2007, 01:40 PM

الشكر موصول للاخوات يل افادونا فيها

**sevenseas** · 03-06-2007, 12:18 AM

السلام عليكم ورحمة الله وبركاته
انا طريقتي زي ام جنى .. ناخد طاسة اميه ونحط فيها ملح زيت وخليها علي النار لين تغلي وبعدين انحط طاسة الدقيق ونعصدها كويس وماتخليش فيها دقيق وبعدين نزيدها امية مغليه ونحرك لين تنشف الميه وبعدين نعصد تاني تجيك كويسة باذن الله وجربها وقولينا