>>>>في ضيـــافة أم أيمــوني<<<<<

السلام عليكم ورحمةالله وبركاته

مضيفتنا اليوم
مضيافة
مشهورة باطباقها
بصراحة احياناً يدي تمتد محاولة لخطف بعضا منها
نصفها سوري ..لذا سنستمتع ببعض الأطباق السورية الشهية

اطلت الحديث ...
لكن.....
مضيفتنا بانتظارنا

أم أيموني......
نحن على وصول...
و
السلام عليكم ورحمة الله وبركاته.

بالانتظار يا ام ايموني

يلا نحن في الانتضار

الصبر يا اخواتي
فام ايموني تعد لنا سفرة معتبرة

في الانتظار .

أهلا وسهلا بضيوفي الكرام .. راح تشرفوني اليوم ..بس يارب سفرتي البسيطة والمتواضعة تعجبكم وتنال على رضاكم ..

بعرف إني جوعتكم .. بس معلش عشان أحلل سفرتي ..

شرفتوني كمان مرة ويلا ع السفرة قبل ما يبرد الأكل ..

هاي شكل السفرة ..



طبعاً لازم أول إشي يكون ع السفرة التمر .. وهاد نوع التمر إحنا بنعشقوا لأنو طري وطيب وبيقولو معسل (بيطلع منو دبس) وعليه سمسم محمص ويانسون ..



وثاني شي مافي بعد عصير قمر الدين على سفرة رمضان.. وأنا بعملو إما بجيب قمر الدين الشرحات الجاهز وبنقعو أو بنقع حبات مشمش وبعملها عصير قمر الدين ..

طبعاً بنقعوا قبل بيوم في ماء ساخن وبحط معو نص ملعقة سكر كبيرة وثاني يوم بضربو بالخلاط حتى يتجانس إذا بدو ماء بزيد وبحط عليه ملعقة صغيرة ماء الزهر بيعطي نكهة طيبة ..



المقبلات .. طبعاً السمبوسة والسمبوسك والسبرنغ رولز ....إلخ دايما لازم يكونو مزينين السفرة.. وهاي السمبوسك شغل إيديا وحياة عينيا وبالشام بيقولولها برك .. عاملة منها باللحمة والجبنة والبطاطا المهروسة ..



مقادير العجينة:
3 أكواب طحين - 3 ملاعق كبيرة زيت ذرة أو دوار الشمس - رشة ملح - نص ملعقة بيكنج باودر - نص ملعقة صغيرة بودرة الثوم - 1 بيضة - كوب (مش مليان ماء فاتر)

الطريقة :
تعجني المقادير كلها مع بعض كتير منيح .. ثم تقطيعها عدة قطع وتكوريها كور وتبلشي ترقي كل كورة بالشوبك وبالقطاعة (يعني يكون حجمها وسط) قطعي وحطي الحشوة وسكريها زي القطايف وممكن تعمليها زي الصورة أو تسكري أطرافها بالشوكة ..

الحشوات:
1- باللحمة (بصل مفروم /لحمة مفرومة/بهارات -ملح-مكعب ماجي-فلفل أسمر/ صنوبر مقلي ويعصجو على النار )
2- جبنة فيتا ( الجبنة مع زعتر (تبع الأكل اللي معو سمسم) مع شوية سماق ورشة زيت زيتون)
3- البطاطا ( بطاطا مسلوقة ومهروسة تقلب مع بصلة على النار وشوية كزبرة ناشفة وملح وفلفل أسمر وكمون ولازم طعم الكمون يكون ظاهر)..

الحمص..

كتير طيب ع الفطور وإحنا كتير منفضل يكون ع السفرة .. وعندنا مطعم مشهور كتير بيعملو وبيحط معو بصل وزيتون . فأنا بحاول أعمل زيو بس يمكن الشكل نفس الشي بس الطعم مش ممكن يطلع زيو من كتر ماهو زاكي ..



والبصل لازم يكون مع الحمص وإلا ما ينبلع..



مقادير الحمص:
كوب حمص منقوع ليلة كاملة مع نص ملعقة صغيرة بيكربونات الصوديوم
ربع كوب طحينة
ملعقة كبيرة أو أكثر عصير ليمون (حسب ما تحبو حموضتها)
فص أو 2 ثوم مدقوق
شوية ملح - شوية كمون
ماء (عشان تطري الحمص)

الطريقة:
نسلق الحمص مع شوية ملح حتى يستوي منيح ونحتفظ بشوية من مية الحمص
هلأ بالخلاط نهرس الحمص مع الثوم والليمون والملح والطحينية ومية الحمص وكمون حتى يصير قوامة متماسك (انا بحبو شوي طري) ..يقدم مزين بحبات الحمص وزيت الزيتون..

الفتوش..

سيد السفرة الرمضانية .. كتير إحنا منفضلو عن باقي السلطات وأنا بعملو بطريقة كتيييييييييير طيبة وبتشهي وبصراحة .. مميزة



يمكن يكون الشكل عادي بس المكونات رهيبة.. وهي

المقادير: (إنت على كيفك وحسب الكمية)

بقدونس - نعناع- بقلة - فليفلة حمرا/برتقالي/صفرا/خضرا - خيار - خس إفرنجي (وهاي أول ميزة) - رمان مفروط (وهاي تاني ميزة) - شيري توميتو (البندورة الصغيرة) وهاي ثالث ميزة - فجل - بصل أخضر ..

الصلصة :
ثوم مدوق - دبس رمان - ملح - كمون - سماق - زيت زيتون (حركيهم منيح وحطيهم على الفتوش) ورشيه الخبز المقلي ..

الشوربة..

شوربة خضار مع دجاج وشوفان.. بصراحة نصها شفتو مرة والباقي من عندي (يعني عملت عليها إضافات كتير)



مقاديرها:
زبدة - بصل مفروم - بروكلي مقطع صغير - حبات فطر مقطعة صغيرة - ذرة مفروطة - شوفان -دجاج مسلوق ومنتف- مرق الدجاج المسلوق - حليب وكريمة - ملح - فلفل أسمر - أعشاب عطرية (حبق-ريحان-زعتر-روزماري) - عصير ليمونة

الطريقة:
نحمي الزبدة في طنجرة صغيرة ونحط عليها البصل والبروكلي والفطر والذرة ونقلبهم .. ثم مرق الدجاج والحليب والكريمة ونتركهم يغلو شوي بعدين الدجاج والشوفان وآخر شي الأعشاب العطرية .. ونحط الليمون ونتركها تغلي غلوة ونطفي النار عليها ...

الطبق الرئيسي ( اللي قبل كلو كان نقرشة)..

فتة الدجاج ..

وأعتقد مافي حدا هلأ ما بيعرف فتة الدجاج لكن تختلف طريقتها من شخص لآخر ..



المقادير:
دجاجتين مسلوقين وعليهم جميع بهارات السلق (قرفة/ورق غار/الحبة الحلوة/مسمار/هيل /يانسون/فلفل حب/ملح /ماجي مكعبين ) مشيول عنهم الجلد والعظم
2 كوب أرز بسمتي مغسول ومنقوع ومطبوخ مع بصلة صغيرة ومرق الدجاج المسلوق ..
رغيفين خبز مقطع مكعبات ومقلي
5 علب لبن زبادي أو 1 كيلو
3 فصوص ثوم كبيرة
1 عصير ليمونه
3 ملعقة كبيرة طحينية
مكسرات مقلية (كاجو-لوز-صنوبر)
بقدونس مفروم
كوب من مرق الدجاج المسلوق

الطريقة:

في الخلاط نضع اللبن والثوم والليمون والطحينية وشوية ملح ونضربهم منيح حتى يصير عندنا زي عصير اللبن ..
هلأ في جاط التقديم بتحطي الخبز المقلي و بتسقيه بماء الدجاج.. ثم نضع فوقه الرز الأبيض المطبوخ مع بصلة وبتصبي عليه اللبن بحيث إنو يغطي الزر ويبلبلو منيح .. هلأ صفي الدجاج فوق الأرز وزينية بالمكسرات والبقدونس .. وبس كتيرسهلة .. صح !!

الكفتة..

عشان السيد أيموني ما بحب طبخات اللبن عملتلو كفته عشان الأفندي ياكل .. والله جيل آخر زمن



مقاديرها..
1 كيلو لحمة مفرومة - 2 حبة بصل وسط مفرومة ع الناعم ع الآخر - 2 حبة ثوم مدقوق - نص ضمة بقدونس مفروم - شوية كزبرة مفرومة - ملح /فلفل/بهارات/كمون/قرفة - بندورة مقطعة دوائر ..

الطريقة :
نخلط جميعاً ما عدا البندورة ونرصها في صينية ونحط عليها البندورة كزينة ونضعها بالفرن حتى تنضج وتنشف ميتها (بس هون نشفت ميتها كتير ..الكفته نفسها نشفت شوي) ...




شو ... لهلأ كيف سفرتي .. شبعتو ولا لسه .. يلا خلو مكان للحلو والقهوة......

ريتو صحة وألف هنا ياربي .. يلا إتفضلو على الصالون حتى نتقهوى ونتحلى ..

بالعادة بحب أعمل قهوة الهيل العربية .. بس القهوة التركية أوجه .. وبعدين هاي قهوتي واصلتني فرش من سوريا وقلت لازم اشربها لحبايبي بنات لك ..

وشوفو كيف لسه بخارها بيطلع .. حتى دولة القهوة (ركوة القهوة) من الشام .. عليها طعم للقهوة مش طبيعي وعن جد غير باقي الركوات حتى زوجي ما صدق إلا لما ذاقها وعن جد حس بفرق الطعم ..



وهاي الحلو يا حلواااااااااااااااااااات .. عيش السرايا .. طريقة هنودة مع إحترامي لطريقتها بس انا هون غيرت شوي ..حطيت التوست كامل بس حمصتو وسقسقتو بالقطر .. وعلى الوجه حطيت قرفة مع المكسرات.. وخليط القشطة حطيت بدال النشا طحين.. وشوية ماء زهر....



وهاي مع القهوة ..



وهاي بعد التقطيع وشو كيف طرف التوست مبين .. ويلا يا حلوات هاي قطعتها والبيت بيتكم إنت مش غرب كل وحدة تقوم وتاخد صحنها مع قهوتها...



وهاد رابط الطريقة للغالية هند..

•°• H!ND: ملف حلوياتي الرمضانية // مصور ومتجدد :: تابعوني :H!ND•°•


وريتو ألف عافية .. آنستوني وشرفتوني .. وبالله عليكم اتعيدوها .. ويا مليون أهلا وسهلا ..

ما شاء الله على سفرتك يا أم أيموني

كل اكلاتك طيبه وزاكيه

ويجعلها سفرة دائما عامرة

ما شاء الله تبارك الله سفره معتبره الله يديمها دايما
اكل طعامكم الابرار وصلت عليكم الملائكه وذكركم الله فيمن معه
ما شاء الله روعه وان شاء الله بدي اساوي البرك لان بجد ما بنسى طعمتهم لان كل نزله على سوريا لازم اكل منهم
وبعدين مره صديقتي عزمتني على مطعم مشهور بالحميديه اكلت فته عنده يا سلاممممممممم
مابعرف اذا بتعرفي من زمان
بس سفرتك روعه والصحون بجننووووووو