سلام خاص للناس الحلوين ( بنت النيل )

**اربقية** · 22-11-2001, 10:41 PM

الاخت الفاضلة بنت النيل لو سمحتي بلاامارة عليك ان تكتبي لي احسن طريقة لطبخ الفول
لاني صراحة الطبق المفضل لدي

**بنت النيل** · 18-01-2002, 10:18 PM

أربقية أنا مش عارفة أقول لك ايه

كل اللي أقدر أقوله لك اني متأسفة جدا جدا جدا جدا
،،،،،،،،، و الله أنا ما شفتش موضوعك غير النهارده و أنا باتصفح ركن المقبلات و السلطات ،،، مش عارفة أقول لك ايه ولا أعتذر لك ازاي ،،،،،،،، بس كل اللي أتمناه انك تعذريني و تسامحيني...............

بالنسبة للفول أنا مش عارفة بالظبط انتي عايزة طريقة تدميس الفول ولا طرق تقديمه ،،،،،،،،، عامة أنا هاكتب لك كل حاجة عن الفول من طأطأ لسلاموا عليكم.........

أولا تدميس الفول:
بتجيبي فول يملأ ثلث قدر التدميس تغسليه كويس و تنقعيه في الماء حوالي 3 ساعات و بعدين تحطيه في القدر و ممكن تضيفي عليه قليل من الأرز أو العدس الأصفر و تملي بقيت القدر ماء مغلي و تحطي القدر على النار لحد ما يغلي كويس و بعدين تهدي النار و من وقت لآخر تبصي على الفول لو لقيتي الماء نقص تزوديه و هكذا لحد ما يستوي الفول تماما ( ممكن يستغرق حوالي 3 ساعات) و ممكن تضيفي قليل من البيكنج باودر بعد ما تحطي الفول على النار بساعة لأنه بيساعد على سرعة النضج بس أنا شخصيا مش بافضل الطريقة دي .......

ثانيا طرق تقديم الفول:
فول بالزيت و الليمون:
تحطي الفول في الطبق و تضيفي عليه قليل من ماء الفول و بعدين تحطي زيت يغطي وش الطبق و تعصري عليه نص ليمونة و تحطي ملح وفلفل و كمون حسب الرغبة و ممكن اضافة معلقة طحينة و شطة ناعمة و يقدم الفول صحيح أو يهرس بالشوكة حسب الرغبة.....................

فول مقلي بالطماطم و البقدونس:
تجيبي بصلة متوسطة و تفرميها ناعم ،،،، 1 فلفل أخضر مقطع قطع صغيرة ،،،، 1 فلفل أخضر حامي مقطع قطع صغيرة جدا ،،،، فصين ثوم مفرومين ،،،، 2 طماطم متوسطة مفرومة ،،،، بقدونس مفروم ،،،، نص ليمونة ،،،، ملح وفلفل و زعتر اذا حبيتي ،،،، و طبعا الفول و شوية زيت...

تحطي الزيت على النار لحد ما يسخن و بعدين نحط البصل و الفلفل الأخضر و نقلب لحد ما يبقى لون البصل ذهبي نضيف الثوم و بعدين الطماطم و نتبل بالملح و الفلفل و الزعتر و نخليه على النار لحد ما تتسبك الطماطم ( يتبخر الماء اللي فيها و تبقى زي الصلصة ) و بعدين نضيف البقدونس و الليمون ثم الفول و نقلبه كويس و نخليه لحد ما يغلي الفول و نهرسه بالشوكة و بعدين نقدمه..................................

فول بالبيض:
نحط الزبدة في الطاسة و لما تسخن نكسر فيها بيضتين و نقلبهم و بعدين نحط الفول و نقلبه مع البيض و نتبل بالملح و الفلفل و الشطة و نخليه يغلي و نقدمه..............

طاجن الفول بالبيض:
نعمل الفول بنفس طريقة الفول المقلي بالطماطم بس نزود الطماطم شوية يعني نخليهم مثلا 4 حبات طماطم و نستغنى عن الليمون و نخلي الفول صحيح و بعد كده نحط الفول في طاجن مناسب لكمية الفول و نكسر على و ش الفول بيض حسب الرغبة و ندخل الطاجن الفرن لحد ما يستوي البيض و نرش على و شه ملح وفلفل و نقدمه........................

فول بالحمص:
بنعمل نص المقدار فول و نصه حمص و نجيب الفول و الحمص نخطه في الخلاط و نحط عليهم فصين ثوم و عصير ليمونة و ملح و فلفل و شطة و زيت زيتون و نضربه في الخلاط و نقدمه.....................

فول بالزبدة:
تحطي الفول في الطبق و تسيحي معلقتين زبدة أو أكثر على النار لحد ما تتفكك و تحطيها على الفول و تتبليه بالملح و الفلفل و الشطة و تقدميه..........................

يا رب تعجبك طرق الفول دي و ألف هنا و شفا يا أربقية ،،،،،،،،،،،، و سامحيني ...........

**ذيــبــ2002ـه** · 18-01-2002, 10:22 PM

ما شاء الله عليك بنت النيل انت طباخه واحنا مانعرف
تسلمين

**بنت النيل** · 18-01-2002, 10:32 PM

تسلمي لي يا ذيبة ،،،،، يا رب بس يعجب أربقية........................

**اربقية** · 19-01-2002, 12:03 PM

الاخت بنت النيل كفيت ووفيت وماقصرت لكن احسن طريقة بالنسبة لي الفول المدمس العادي
عشان تفتكري لما ازورك تعمليه لي مع الكشرى بالدقة
اما انت اختي حمل 2002 انا راح اعمل ابطبق وانت معزومة عندي بمناسبة تغيير الاسم
واذا خلص الفول انا غير مسئول

**بنت النيل** · 19-01-2002, 12:11 PM

تسلمي لي يا أربقية ،، الحمد لله أن الفول عجبك

يا ريت بس ما تكونيش بتقولي كلام بس و تيجي تزوريني فعلا و أنا أعمل لك طبق فول ما حصلش.........
أما عن الكشري فأنا و أعوذ بالله من كلمة أنا باعمل طبق كشري ما تقوليش لعدوك عليه ،،كل اللي داقوه دعوا لي ،، فيا ريت تشرفيني بالزيارة.........

**MISS_CHEF** · 20-01-2002, 01:55 PM

السلام عليكم ورحمة الله وبركاته

تسلم ايدج على الطبق العالمي
انا تذوقت الفول من وحده مصرية وطلع احلى بكتير من المعلب
بس شو الفكرة من وضع العدس
وهل ممكن عملة والاحتفاظ به ...بدلا من عملة كل يوم ..بعيد عنك كسالى

ونحن بانتظار دروسك ...واطباقك المصرية

**بنت النيل** · 20-01-2002, 02:09 PM

أهلا و سهلا بmiss-chef نورتيني ،،،،،،،

بالنسبة لسؤالك فالفكرة من اضافة العدس انه بيخلي لون الفول فاتح و كمان بيخلي ماء الفول سميك شوية و بالتالي بتبقى النتيجة حلوة،،،،،،، لكن ممكن الاستغناء عنه لو مش بتحبيه........
أما بالنسبة للاحتفاظ بالفول ،، ممكن تحتفظي بيه في التلاجة من يومين لتلاتة ،،،،،، أما لو عايزة تحتفظي بيه أكتر من كدة فممكن تحطيه في أكياس و تشيليه في الفريزر و تطلعيه قبل ما تعمليه بشوية......
يا رب أكون أفدتك ،،،،،،،،،، و بالهنا و الشفا............

**( ام ايمن )** · 24-01-2002, 07:10 PM

تسلم بنت النيل الرائعة على اطباق الفول الشهية على فكرة في وصفات كتير نفسي اتعلمها منك حضري نفسك يا عسل

**ام وديمه** · 24-01-2002, 10:29 PM

الله الله على اهل الفن .......بصراحه طرق غريييبه واكييييد لذييييييذه تسلم ايديك يا بنت النيل وربنا ما يحرمنا منك.......وزودينا من الأكل المصري الرهييييب .....