ياسعود

[

ياسعود لايشغلـك سنـك وكبـرك

يمديك تلحق مـن حياتـك مداهـا

صبرك على الايام يابـوك صبـرك

باكـر وعقبـه ينكشفلـك خفاهـا

دامك صغير أغنم من العمر صغرك

تـرى حياتـك صفوهـا مبتداهـا

وان طال بك يابهجة العين عمـرك

لابد تشـرب مرهـا مـع حلاهـا

لاشك انا بوصيـك كانـك بتـدرك

- وصيـة قلبـي لقلبـك حكـاهـا

أعلم ترى الاسلام هو عصمت أمرك

والديـن ملجـا للنفـوس وذراهـا

كانك حفظته في جهـارك وسـرك

افلحت في دنيـاك واللـي وراهـا

وكانك عطيته يارجى العمر ظهـرك

افلست لو مالـك يعـادل حصاهـا

وابليس لايغويك خذ منـه حـذرك

والنفس داوم كبحها عـن هواهـا

وان زلت الاقـدام والجهـل جـرك

عوّد ترى العـوده حميـد جزاهـا

واحذر من الغلات يابـوك واتـرك

من لايعرف المخطيـه مـن قداهـا

وان جاك تبـاع الهـوى لايغـرك

من يقـرب الجربـا حـري بذاهـا

افحص ومحص معدن الناس وافرك

حتـى تميـز طيبهـا مـن رداهـا

واحذر دواليـب الهـوى لاتفـرك

خضرا اللدن لاتنفتـن فـي بهاهـا

اختر من زحول الرجاجيل صهـرك

واظفر بذات الدين واتـرك عداهـا

وصى بها اللي سيرتـه ماتغتـرك

نبراس نـور العلـم والحـق طـه

لي شفتها سرتك وان غبت ستـرك

تحفظك في مالـك وتحفـظ ظناهـا

تمشي على طوعك وتامـر بامـرك

الديـن هذبهـا وحبـك شـراهـا

وان حسها في بعض الايام هجـرك

ماغثتك فـي اللغـو حلـو نباهـا

تصبر معك وتعيش حلـوك ومـرك

درة وفـا ياحـظ منهـو خـذاهـا

واعلم ترى اخوانك زهابك وذخرك

لي كشرت دنيـاك وادبـر صفاهـا

عنزبهـم يابـوك ظهـرك وازرك

واحذر تخالـف جمعـم وتعصاهـا

يصعب مع الجمعا على الغير كسرك

ويكثر مع الفرقـا عليكـم غثاهـا

ولاتمنع الارحـام وصلـك وبـرك

تـرى القطيعـه للعشيـره فناهـا

حذراك مـن نـار الجفـا لاتحـرك

والوصـل جنـه والمحبـه جناهـا

والبر نفعه يوم نشـرك وحشـرك

اما شفـع فـي الذنـب ولامحاهـا

واعلم ترى بالعلـم يـزداد قـدرك

والجهل لقلـوب الخلايـق عماهـا

نور مع أهل العلم والـراي فكـرك

واروح تزكـي لازكـى مبتغـاهـا

واصبر ترى بالصبر لوطال تـدرك

ماتشتهي والنفـس تلحـق مناهـا

واعلم ترى عيبـك يغطيـه تبـرك

والنـاس ماذمـت كريـم عطاهـا

لامن عطاك الله من المال فاشـرك

غيـرك تـرى دنيـاك ذل هواهـا

لاخير في مال يجي منـه شـرك ؟

مد اليميـن وعنـد ربـك رجاهـا

لاصـار مالـك عاجـز لايـسـرك

وش ينفعك لاصرت باقصى ثراهـا

وان ماقدرت المال فالقـل عـذرك

افزع بحسن الخلق تكسب رضاهـا

واحذر يغرك زوم نفسـك وكبـرك

بالك علىالمحتـاج لحظـه تباهـا

ترى غناتـك لـو تدبـر وفقـرك

في كـف وهّـاب بعلمـه قضاهـا

لاتضمن أنـه يـوم يعطيـك بـرك

كـم رزق نفـس مدهـا وابتلاهـا

واياك تفشي سر غيـرك وسـرك

اقضب لسانك واحفظه عـن لغاهـا

ترى الحياه أسرار والناس خبـرك

ماكامـل الاربهـا اللـي بـراهـا

بادر بخيرك وامنع النـاس شـرك

والصبر نعـة حـظ منهـو لقاهـا

وان جاك منهـم هرجـة ماتسـرك

فاحلـم لعـل الحلـم يـردع أذاهـا

بعض الخاطا راعيه ياخـذ ويـدرك

اصفـح لعلـه جاهـل ماوعـاهـا

تراك لمـن زرت لحـدك وقبـرك

والنفـس لبـت داعـي مانساهـا

واستعرض الحيين يابـوك ذكـرك

كـل هـرج بعلومـه الـي كناهـا

أمــا تـقـول الـنـاس لله درك

والاتـروح الـروح ماحـد بكاهـا

والخير كله فـي صلاتـك ووتـرك

كانك تبـي جنـات عـدن وهناهـا

واعلم ترى فرعك وجذعك وجذرك

من واحـة عذبـن ثراهـا وماهـا

جدك وخالك ساس مجدك وفخـرك

يا سعود سيرتهـم تراهـا تراهـا

سيرة هل التوحيد حـذراك تتـرك

منهاجهـا واليـوم جـوّد عراهـا

بيتين شع منهـا نـورك وفجـرك

واشرق على خد الجزيـرة سناهـا

يا سعْد من هـو للمناعيـر مـدرك

يحمي عقيدتهـم ويضـرب عداهـا

كم طوعوا بالسيف عاصي ومشرك

والـدار بالاسـلام شـادوا بناهـا

سادوا وساد الدين أرضك وبحـرك

وراياتهـم تخفـق بعالـي سماهـا

نهرين سالن مـن هضابـك لبـرّك

منها الصحاري علـل الله ضماهـا

يا علني يا ابوك مـا اذوق حـرك

زبـدة كلامـي كلمتيـن وغطاهـا

اودع مآثرهـم مغاليـق صــدرك

واتبع خطاهم واترك اللـي جفاهـا

ذا حبهـم والحـب طبعـه يحـرّك

مشاعري يا سعود لي من غشاهـا

وسلامتكم .....................


للشاعر الامير# خالد بن سعود الكبير


ايش رايكم فيها

قصيده راااااااااائعه وفيها حكم من ذهب

قصيدة رائعة جداً, حوت دررً وحكماً تختصر على العاقل لها الكثير.

سمعتها من الأمير في أحد البرامج, وهي لابنه سعود ذي ال12 عاماً, عندما كان متحفزاً ومتمنياً أن يكبر, كعادة الأطفال دائماً!

أعجني أيضاً, تواضع الأمير الجم!!

بارك الله فيك على النقل!!