في ليل بارد
بتنساب فيه الأحاسيس الدافية
فيه ضحكات العشاق وابتساماتهم قناديل
وفيه الأشواق جمرات وقادة
دخلت نسمة دافية
وفتحت الشباك وغزلتني معها
وصرت قصيدة بدوية رددها الصدى
في صحرا بعيدة
في مدينة بالحضر مسكونة بلارواح
لفها الضباب
وعلى بابها العالي غبار
غبار ورق الدهب
وبنت صغيرة طفلة لوحتها شمس الغروب
عم تركض بالزوايا
عم تلعب بلعبة قطن مابعرف مين جابها
ولا بعرف ليه هالبنت رغم كل منظرها العفوي الطفولي شدتني
في بير بنص المدينة بس مافيه مي
طالعة منه دقات عود ناعمة
وطعم المي حليب مخلوط بشهد
وشربت من هالبير وما ارتويت
وفجاءة اطلعت وما لقيت هالطفلة بس
انتظر
لسة صوت ضحكها مرات بيشدني للشمال
ومرات صوت انين بكاها بياخدني للجنوب
ومرات بيخطرلي اني سامعتها بتهمسلي تعالي
ومرة صوت غناها اخدني للغرب
ولقيتها قاعدة بحضن فارس مهيوب
تيابه بيض
ومهرته لونها اسود وواقفة بباب الخيمة
والخيمة مقابيلها جمر ماخطر ببالي انو رح يشعل قلبي ويغليه قبل
مايغلي دلة القهوة
ومرات هالفارس كان يدلل هالطفلة بكل الحنان الرجولي الي عنده
ومرات كان ينهرها ويقسى عليها ويتغلى بكل مابقلوب الرجال من جبروت
وكنت المح بعيونه حنان غريب
واسال نفسي كيف بيخلط الحنان بالقسوة كيف بيجمعهم بحجة الخوف على هالطفلة ومرات اعذره
ومرات اعزله
وبيوم من الايام الفارس ركب مهرته
وسافر ووعد هالطفلة انه راجع
وطفا الجمر تحت دلة القهوة وشعل الجمر بضلوع هالطفلة وشعل براكين بضلوعي
وارتمت هالطفلة بحضني
وبنار الجمر ودموع الشوق وغبار الدهب وضباب المدينة الي ساكنة بالحضر
بهاك المكان الي فيه البدو والحضر عاشوا بوقت واحد
بهداك الزمان الي فيه كل الاضداد مجتمعة
غفينا انا والطفلة
ودبنا ببعض
ولما صحيت لقيت نفسي
مجرد
نجمة