بنات اسكندرية طالبة مساعدتكم

**سارة ممتاز** · 30-10-2008, 01:02 AM

شوفو يا بنات انا فكرت فى حاجة وبدات انفذها من فترة قريبة
وهى عمل الماكولات الجاهزة
بس الناس اللى بيطلبو منى عددهم بسيط
وعايزة اسالكم ازاى اوسع النشاط واكسب زباين جدد
وايه اللى ممكن اضيفو لليستة المأكولات
بصو انا بعمل الماكولات دى وياريت تقولو رايكم باضافة اصناف جديدة
اكلات للعزومات
ديك رومى محشى بالرز او غير محشى
بط مشوى بالذبدة والبقدونس
فراخ محشية
فراخ بانيه
فراخ فى صنية بالخضار
فراخ مشوية
واللحوم بقى قصتها طويلة شوية
موزة ضانى
فخدة
لحمة محمرة
حمام محشى فريك او رز او مشوى
طاجن السبيط بالخلطة
سمك بورى مشوى بالزيت والليمون
سمك بانيه
رز بالخلطة _ رز بالخضار _ رز بالشعرية _ رز بسمتى _ رز صيادية _ رز عادى
مكرونة بالبشاميل _مكرونة بالصلصة البيضاء _ مكرونة اسباكتى بالخضار او سى فود _ مكرونة عادية بالصلصة واللحمة المفرومة
شوربة لحمة _فراخ _ حمام _ كوارع
ده غير الطواجن والخضار المشكل والملوخية والبامية
شوفو اضيف ايه على دول
وتفتكرو ايه الاسعار المناسبة اللى ممكن تخلينى اكسب زباين اكتر
بالله عليكم ما تنسو
منتظرة ردكم

**سارة ممتاز** · 30-10-2008, 02:00 AM

8 يدخلو الموضوع ومحدش حتى يضيف صنف واحد او حتى كلمة تشجيع

**شط اسكندرية** · 30-10-2008, 03:27 AM

مبروك عليكى حبيبتى المشروع
بس اولا لازم اسعارك تبقى المكسب يعنى مش كتير ولما يجربو ويتعودو عليكى تبداى فى تنزيد الاسعار شوية شوية دة اولا
ثانيا لازم تختارى اكل صعب شوية على الستات العاملات اللى بياخد وقت وانت مش كاتباة مثلا زى

المحاشى ورق عنب كرنب فلفل كوسة باذنجان
وخصوصا المنبار لانة بياخد وقت

ممكن تعملى الكوارع والفتة
ولو بتعرفى تعملى فطير مشلتت والكسكسى علية اقبال شديد

اما وسائل النشر
ممكن تعملى اعلان فى الوسيط
وعن طريق المعارف والاصدقاء
ممكن تكتبى فى مواقع النت وتديى رقم تليفونك على الخاص
فى جريدة اعلانات اسمها يلا مزاد ممكن تعملى اعلان
ممكن تروحى لاماكن الاسر المنتجة وتسيبى عنوانك

يارب حبيبتى اكون افادتك بشى
وموفقة ان شاء الله

**ام بودى2** · 30-10-2008, 04:18 AM

السلام عليكم

اختى القائمة ما شاء الله حلوة و

لكن يا ريت تضيفى النواشف والفطائر البتكون فى المناسبات ذى السمبوسة وكدة

وربنا يكرمك ويوفقك

وعلى فكرة خدى حقك وضعى نسبة ربح معقولة وربنا يكرمك

**sumayya** · 30-10-2008, 12:27 PM

اربي يوفقك يارب

**شيمـاء** · 30-10-2008, 08:55 PM

حبيبتي انتي نسيتي الحلويات والكيكات بانواعها ودي طبعا بتاخد وقت ومش كل السيدات بتظبط معاهم
دي مهمه ماتنسهاش
وكمان القلقاس والخرشوف والمهضوم وغيرم من الاكلات
وربنا يوفقك يارب