بسم الله الرحمن الرحيم
حبيباتي رجعت لكم اليوم ومعايا تطبيق لبسكويت في منتهى الروعة أخذته من العضوة الرائعة
om arafa فكرته جديدة ومش دارجة ممكن تفاجئي بيه ضيوفك وتهديه لأحبابك وإنتي واثقة من تعليقاتهم عليه
وحبيبتي
omarafa كانت حاطة طريقته في الملف الليبي الرائع اللي موجود بهالرابط
نتمنى من جميع العضوات الاطلاع على هالملف لأنه فيه وصفات رائعة وجميع العضوات الليبيات باذلات مجهود رائع فيه يشكرن عليه ....والليبيات بكل تواضع ربات بيوت ومبدعات في المطبخ وأكلهن صنة
(يعني رائحة
) وبنة
(يعني لذة
) وإبداع
(معروف معناها هههه مش محتاجة ترجمة
) ....وأعتقد وصفاتنا تشهد بذلك في جميع أركان مطبخ لك
....
طريقة البسكويت تجدوها بهالرابط في الرد رقم 198
وقبل كل شئ وبعد شكري الجزيل للغالية omarafa يسعدني نشكر الغالية حبيبة الكل ماما الاء ...لأنها ساعدتني بهالوصفة بدون ما تعرف ...لأنها حاطة في الملف طريقة عجين يستعمل بصفة عامة في أي وصفة لبسكويت يغطى بالشوكولاتة ... استعنت بيها في هالبسكويت ...وهي:
1 كوب زبدة/ 1 بيضة / 3 ملاعق كبيرة نشا / 3 ملاعق سكرناعم / 1ملعقة صغيرة بيكنج باودر / ...مايعجنهم من الدقيق حتى تتكون عجين لين متماسك يسهل فرده وتشكيله ...
مع مراعاة الزبدة تكون لينة بدرجة حرارة الغرفة (((نتمنى من جميع العضوات يوضحن في وصفاتهن حالة الزبدة سايحة والا لينة ...لأن وصفات كثية خربت مني من هالسبب )))
واترككم مع الصور
واسمحولي نقدم هالقطعة لصاحبة الوصفة الرائعة omarafa ونقول لها ألف ألف شكر البسكويت رائع طعم ورائحة وشكل يشرف قدام الضيوف والصور تشهد بذلك...وربي يجازيكي كل الخير لأني استفدت جدا منه ...واعتمدته عندي من الوصفات المتميزة ...ويجازيك المولى علي كل وحدة تديره من حبيباتنا العضوات وتستفيد بيه
ونتمنى تشوفي تطبيقي وتردي عليا في أقرب فرصة ممكنة ...لاني افتقدتك الفترة اللي فاتت في المنتدى ولعل المانع خير ..
واكيد القطعة الثانية للغالية حبيبة الكل ماما الاء ...اللي يعجز اللسان علي شكرها وتقدير مجهوداتها معانا ...وربي يجازيك كل كل الخير علي روح العطاء اللي عندك..اللي من النادر وجودها عند الناس توة
واكيد التزيين حسب رغبة وذوق كل وحدة ...أنا عن نفسي ...كيف ماشفتو في الصور نحب البساطة بصفة عامة في كل شي ....بعد ما غطست البسكويت بالشوكولا ...عملت خطوط بالشوكولا البيضاء ...وحطيت 2 خرز فضي فرنسي عبارة عن حلوى صالحة للاكل ...
نضحككم شوية ...كان عندنا ضيوف وقدمت لهم هالبسكويت كان من بينهم وحدة كبيرة في السن ...قالت لي يابنيتي نشيل هالخرزات هههه والا تشيليهم لي هههه...أكيد طمنتها وأكلت قطعة قبلها هههه
ربي يخلي لنا الناس الكبار اللي كلهم بركة وتصرفاتهم عفوية وكلها براءة
عارفيني نحبكم وأول مانجرب حاجة وتعجبني نجري نحطها في منتدانا الرائع لكِ...ونستنى منكم الردود ...وأكيد الدعاء ليا ول omarafa و ماما الاء
الوصفة مكتوبة باللهجة الليبية واعتقد إنها مش صعبة واجد ...عموما نتمنى من غير الليبيات اللي يجدن صعوبة او عندهن أي إستفسار على التفاصيل تسألني وأنا تحت امركن جميعا
الروابط المفضلة