السلام عليكم ورحمة الله وبركاته

نواعمى الغاليين يسعد مساكم
من فتره قصيره كانت قطه من القطط سألت عن الشراب وهى الاخت engmarwa2005

واتلاقيت كتير من النواعم الصغنونه ده مشكلتها فى المطبخ مع الحلويات الشرقيه
فحبيت اسهل المواضيع شويه بأنى اعمل موضوع عن الشراب احتمال لو فهموا تكاته معدش يكون عندهم مشكله

خلينى اقولك يا مروه علشان نسهل المواضيع
بصى يا ستى

الشراب هو مايه وسكر وليمون
واجابه على سؤالك اهمية الليمون علشان ميرجعش الشراب يسكر تانى
يسكر يعنى يعمل حبيبات سكر لو سبناه فتره سواء وضعناه على حلويات او لم نضعه

فى الشراب بالذات صعب تخدى من حد فتره زمنيه معينه علشان تعمليه لانه بياخد على النار وقت حسب كميته

تعالى معايا واحده واحده الاول متقلقيش من المعيار انا بحب اعمله بزياده واسيبه للاحتياط عندى
حطيتلك يا ستى 5 كوب سكر مع 5 كوب ماء على النار مش هى ده معاييره لكن اناعايزه اوصل معاكى انك تفهمى تكنيكه ولو فهمتيه مشحتحتاجى تسألى عنه وعن انواع الحلويات

المهم اول ما غلى عصرت عليه ليمونه

وبعد عشر دقايق اخدت نقطه بحطها على اى سطح بارد جنبى لو تلاحظى انها فرشت زى المايه ولو اخدتيها بصبعك حتحسى ان لزوجتها ضعيفه جدا
طبعا ده ملهوش علاقه بالشراب وده واضح فى الصوره الاولى
ماتقلقيش غيرتلك الطبق وجيبتلك حاجه غامقه

وبعد اقل من نصف ساعه اخدت نقطه تانيه بطرف المعلقه
وحطتها على السطح البارد
الاقى النقطه بدأت تلم شويه يعنى ماعدتش سايله زى الاول واخدتها بصبعى الاقى ملمسها لزوجه لينه
وهى كده استوت
ولما تخديها بالمعلقه تنزل من المعلقه متصله

رايحه فين لسه استنى

سيبتهالك كمان ربع ساعه على النار
وعملت زى كل مره
يا ستار يا رب
النقطه نزلت مجلزمه ولو اخدتيها بايدك حتمط معاكى من تقلها
هى ده بقا المرحله اللى لو حطتيها على حلويات
ممكن تلوقى بها راس اللى جنبك (محجره)

متخافيش كده مابزطش
فكيتها بشوية مايه واستخدمتها

خلاص اتكلمنا عن مراحل الشراب
نتكلم عن استخدماته
الحلويات عندك نوعين
يا اما حلويات لازم تشرب الشراب بتاعها كله
فده لازم يكون شرابها خفيف وسخن زى البسبوسه والكنافه والبقلاوه
وغالبا معاييره بتكون
معيار السكر عليه نفس معيار المايه
يعنى لو كوب سكر عليه كوب مايه ونص ليمونه
وتغلى لغاية لما توصل للملمس الناعم وانت حتعرفى بنفسك

يا اما حلويات محتاجه انها تكون مغلفه بالشراب فقط ومقرمشه من بره وطريه من جوه زى بلح الشام والقطايف والعوامه

وده بيكون شراب تقيل وبارد
يعنى لو 2 كوب سكر
عليهم 1 كوب ماء
ونص ليمونه
وبرده اسيبه يغلى لغايت لما يوصل للليونه المطلوبه
ومشمعنى انه تقيل انى اسيبه يتقل على النار
لأ مجرد ما برد حتلاقيه تقل لوحده لان فى الاصل سكره اكتر من مايته

لان لو الشراب خفيف وساخن وحطيتى فيه بلح الشام مثلا
حيشرب الشراب بالهبل وبلح الشام حيطرى جدا
واول ماتكليه حيغرقك عسل
وده مشمطلوب

وبالنسبه للمهلبيه انا معيارى كوب اللبن عليه م ك نشا
وعلشان مهلبية الكنافه لازم تكون تقيله شويه علشان تكون متماسكه فزودى المعيار قليلا

مروه بجد بجد اتمنى ان اكون ساعدتك حتى ولو بالقليل
بالرغم من انى كلامى كتير عن مكون مايستهلش
لكن للاسف ممكن المكون ده يفسدعليا صنيه محترمه وتتساب فى ارابيزى هه

للاه يا محسنين لللاه
كلمه قليله تمنع بلاوى كتير ه

تسلم الايادى ياعسل
وكل عام وانتى بخير

جزاك الله خير الف شكر تسلم ايديك

رائع مشكوره برنسس لك

ما شاء الله عليكى حبيبتى
شرح كافى و وافى جزاكى الله خيرا
شطوره حبيبتى صورك واضحه و شرحك ممتاز
جزاكى الله الجنه و نعيمها و اطعمك من ثمارها

ايه ده يابرنسس

شرح بالتفصيل الممل

بارك الله فيك
الكثير بيسألوا على طريقة القطر و انتِ كفيتي و وفيتي

بعطبكب العافية

برنسس العسل

تسلم الايادي على الموضوع يلي اكيد حيفيد كتير من الصبايا

يعطيك العافية يا عسل يا شربات انت

مش معقووووووووووووووووووووول

كل دة ؟؟؟؟؟
انا مش عارفه اشكرك ازاى بجد
انا مبهووووووورة
تعبتى نفسك واشتغلتى وصورتى وحملتى الصور
احرجتينى بذوقك
جزاك الله خيرا
وجعله فى ميزان حسناتك
والله مش عارفه اقولك ايه

بس بجد بجد تدريب عملى كانك واقفه معايا فى المطبخ
فعلا كان مشكله المشاكل بالنسبه لى مع انه مثل ما بتقولى ملوش لازمه

ان شاء الله هاعمل قطايف وارد عليكى
والمرحله القادمه
هى الكناااااااااااااااافه
ومرة اخرى جزاك الله خيرا
واسفه على تاخرى فى الرد عليكى