انا يا جماعة للأسف جديدة في دخول المطبخ
رغم اني متزوجة من ثلاث سنوات
المهم مش هطول عليكوا
حبيت اعمل ناصحة ادام زوجي الحبيب
وقولت بس اعمل كيكة حلوة وطعمة ولذيذة عشان يفطر بيها يا حبيبي قبل ما يروح الشغل
المهم حضرت المقادير اللي قالتلي عليها صحبتي لما اكلت منها وعجبتني مووت وهي كالاتي :
2 كوب دقيق
ا كوب سكر
اكوب لبن
3 بيضة
معلقة كبيرة بيكنج باورد
ثلث كوب زيت
معلقة صغيرة فانيليا
طريقة التحضير التي فشلت مني وياريت لو حد عرف يقولي احسن والله عملتها مرتين ورمتها ذي ما هي
1- دهنت الصينية بطبقة خفيفة من الزبدة والدقيق عشان يعني ما تلزقش " وياريتها كانت لزقت اريح "
2- ضربت البيض واللبن والزيت والسكر والفانيلا في الخلاط
3- حطيت الدقيق على البيكنج باودر ووبعد اوضعه بالتدريخ على الخليط السائل " اللي خرج من الخلاط "
4- بعد إنتهاء وضعت جميع المكونات في الصينية
5- دخلت الصينية الفرن اللي كنت مسخناه من قبلها على درجة حرارة 180 ووضعتها في المنتصف عشان الكيكة تطلع طعمة ولذيذة ومستوية " اهئ اهئ اهئ "
6- استنيت ساعة الا الثلث ووالله ما فتحت الفرن خالص قبلها عشان الكيكة اللذيذة ما تهبطش ولما فتحت الفرن لقيت الكيكة شكلها استوى وحمرت تمام بس بصراحة ما كنتش مرتفعة كانت منفخة من بعض الاماكن ووضعت شوكة في المنتصف للتاكد من تمام النضج وطلعت الشوكة ذي القشطة ونضيفةروحت قولت خلاص يا ام نوراي يا عسل الكيكة اتعملت واستوت وهتبقى تحفة
7- طفيت الفرن وسبت الكيكة جوا عشر دقايق عشان ما تهبطش
8- خرجت الكيكة ولاحظت انها مش عالية قوي وحططتها على الرخامة وقلت استنى عشان تبرد عشان ما تتفرفتش مني وانا بقطعها " اصل انا ناصحة جدا "
9- واليكم الفاجعة التي تعرضت لها مرتين وانا اقطع الكيكة الي ماناش نصيب ان نكلها لغاية دلوقتي وهي ان الكيكة سمكها رفيع قوي وكمان من جوه كأنها مقسمة الى طبقات وطعمها بشع مش بس وحش
10 - بس جوزي صراحة اقترح اقتراح تحفة ان احنا نخدها البحر ونعلب بيها طبق طائر على الاقل نجري بنتنا شوية.
معلش طولت عليكوا بس بجد انا مضايقة جدا وياريت لو حد يعرف السبب يقولي وللعلم :
1-جميع المكونات كانت بدرجة حرارة الغرفة وكلها طازة
2- يوجد عندي صاج بالرف الاوسط للفرن وليست شبكة
3- صحبتي قالتلي ممكن العيب في البيكنج باودر " انا استعملت نوع اسمه الرياض وعلبته بيضة ومكتوب عليها باللون الازرق "
الروابط المفضلة