امبارح عملت الكيك دة ياجماعة وبجد والله العظيم طلع وهميييي
بصوا انا اخدت فكرته من صورة شفتها وحاولت اطبقها واعتقد اني الحمد لله نجحت في تطبيقها بنسبة كبيرة ان شاءالله مرة علي مرة تتظبط اكتر بس كنت واخداها تحدي مع نفسي
شوفو الشكل الاول عشان تفهموا الشرح
الاول عملت كيك شاتوه الشوكولاتة عادي جدا بالطريقة المعتادة هقولها في الاخر للي ميعرفهاش عشان يبقي الشرح وافي
وبعدين جبت الكيك بعد ماطلع مالفرن واستهدي شوية مش نسيبه يبرد لاء لازم نشتغل فيه وهي دافية
هنجيب كباية فيها ماية سخنة ونحط فيها السكينة الي هنشتغل بيها
وهنقطع راق متوسط السمك من وش الكيك لا تخين ولا رفيع
الخطوة الي بعدها اننا نفرغ قلب الكيك كدة
هنعمل دة ازاي؟؟
هنحدد بالسكين من الابع جهات بس مننزلش لاخر الكيك من تحت عشان متتفتحش من تحت دة مهم جدا ونقطع قلب الكيك نصفين او اكتر وبعدين نشيل القلب دة بس نحاول منفتفتوش يعني نحاول نشيلها بلوك قطعة علي بعض بكدة فرغنا الكيك من القلب وممكن في الاخر نشيل الزوائد بالمعلقة
ناخد الكيك ونحطه في القالب الي خبزنا فيه الكيك بس بعد مانكون فرشناه بالبلاستيك الشفاف
وهنجيب الكريمة الخطيرة نحشي بيها الكيك كدة(المقادير بعد ماخلص الشرح)
عاوزين بقي نغظي وش الكيك عشان نغطي الكريمة فيه طريقتين
1)نحط وش الكيك الي قطعناه في الاول بالراااااحة خالص
2)نغطي بقلب الكيك الي طلعناه عشان كدة قلت نحاول نحافظ عليه قطعتين او تلاتة او حتي اربعة كبار ودة الافضل لان القلب بيبقي هش وطري اوي مش زي الوش
انا للاسف وش الكيك اتفتفت معايا معرفتش اغطي بيه ومكنتش مطلعة القلب سليم فكان مفتفت عندي فحطيته كدة وحاولت اضغط عليه بالمعلقة كويس اوي
ونقفل البلاستيك علي الكيك كويس اوي وندخل الكيك التلاجة 3 ساعات انا دخلتها الفريزر شوية وبعدين التلاجة
ممكن نسيبها من بالليل للصبح
نطلع الكيك بقي من القالب باننا نشد البلاستيك بالراحة خالص ونقلب الكيك يعني نخلي القاع هو الوش والعكس
ونشوف لو فيه زيادات في قاع الكيك(الي هو وش الكيك) نحاول نشيلها ونكحتها بالراحة بالسكينة
نكون جهزنا صوص الشوكولاتة المعتمد عندي مش بيغيروا ابدا ونضيفه علي وش الكيك وندخلها التلاجة تاني تسقع وتؤكل باااااااااااااردة
بس بجد جناااااااااااااااان طعمها خيالي
شوفو الكريمة رهيبة ازاي
مقادير الكريمة:
2 باكو كريم شانتيه او دريم ويب
تلات اربع علبة قشطة
معلقة ونصف كبيرة كاكاو خام
تلات اربع معلقة : معلقة صغيرة نسكافيه
و شوية سكر بودرة
وندوق المهم طعم النسكافيه يبقي ظااااهر لو محتاج نزود شوية كمان نزود بس شوية شوية عشان ميمررش
نعملها ونسيبها في التلاجة شوية قبل مانحشي بيها الكيك ممكن نعملها اثناء خبز الكيك في الفرن او من قبلها بوقت كمان
نضرب الكريم شانتيه كويس وبعدين نضيف بقية المكونات
صوص الشوكولاتة:
كوب الا ربع زبدة
ربع كوب كاكاو
كوب سكر بودرة....او حسب الرغبة
كوب: كوب الا ربع لبن
انا بعمله بدون التقيد باي مقادير
كيك الشاتوه:
كوب ماء
كوب سكر
نصف كوب زيت
4 م ك لبن بودرة
4 م ك كاكاو خام
نضرب كله في الخلاط حتي يمتزج جيدا ناخد من الخليط دة حوالي تلات اربع الكوب انا اخدت هنا نصف كوب لاني مش عاوزة الصوص دة
وبعد كدة نضيف علي بقية الخليط 2 بيضة وفانليا ونضرب تاني في الخلاط واخيرا نصب الخليط في طبق عميق ونضيف تدريجيا 1 كوب دقيق عليه 1 م ك بيكنج بودر
الصوص الي طلع بقي من الشاتوه ممكن تفتفتوا شوية بسكوت شاي سادة وتسقوهم بشوية لبن مش كتير وتصبوا عليهم الصوص دة وتلفوهم اسطوانة في ورق فويل وعلي الفريزر علي طول بيطلع طعمه حلو جدا
بس كدة اعتقد اني وضحت كل شئ بالتفصيل بجد انا بقالي ساعة ونصف بكتب وبحمل صور مش عاوزة منكم اكتر من دعوة
ربنا يحفظلي زوجي واولادي من كل سوء
جربووووووووها اولا شكلها جديد والي يشوفها ميعرفش معمولة ازاي وثانيا طعمها خطيييييير الكريمة مع صوص الشوكولاتة عاملين ميكس يدوووخ
والطبق دة مني لكم
</B></I>
الروابط المفضلة