السلام عليكم ورحمة الله وبركاته
أنا عارفة إن كتير أوي أوي مننا البسبوسة عامله له عقدة فجبتلكم البسبوسة ده بجد سهلة أوي وطعمها جميل وتعملوها وانتوا متطمنين...ودلوقتي هسيبكم مع الطريقة والمقادير....ومستنية تجاربكم الجميلة كالعادة
1/2 كوب سمنة + 2معلقة كبيرة سمنة
2ونص كوب سميد ناعم (سيمولينا)...بتاع البسبوسة
1كوب سكر نوعه حلو زي سكر الأسرة مثلا
نص كوب جوز هند ناعم
1 كوب زبادي (يعني تقريبا علبتين ونص من زبادي جهينة ال110 جرام)
نص معلقة صغيرة بيكنج بودر
ربع معلقة صغيرة بيكربونات صودا ولو مش موجودة استبدلوها بالبيكنج بودر
4 معلقة كبيرة ماء (وممكن لو بتحبوا نكهة ماء الورد وماء الزهر تحطوا معلقتين ومعلقتين)
الشربات:
2 كوب سكر
1 كوب ماء
1 معلقة صغيرة عصير ليمون
أول حاجة ندهن صينية بزبدة أو سمنة
ناخد السمنة ونسخنها بس ما نقدحهاش...خدوا بالكوا
وبعد ما تسخن...نجيب طبق غويط ونحط فيه السميد
ونحط عليه السمنة ونقلب كويس جدا جدا بحيث إن كل السميد يتغطى بالسمنة وبعدين نسيب الخليط ده لمدة 30 دقيقة بحيث إنه السميد يتشرب السمنة كويس
وبعد النص ساعة نضيف على السميد والسمنة السكر وجوزالهند والزبادي والبيكنج باودر والبيكنج صودا ونقلب كويس جدا بالمعلقة...
ناخد الخليط ونصبه في الصينية المدهونة بالسمنة أو الزبدة ونسيب الخليط يرتاح تاني لمدة نص ساعة
وبعد النص ساعة نقطع البسبوسة بأي شكل إحنا عايزينه سواء مربعات أو معينات وبعدين نوزع على الوش أي نوع من المكسرات إنتوا بتحبوه...أنا ما حطيتش
فرن 180 لمدة 40 دقيقة وأول ما تطلع نصب عليها الشربات السخن ولو لقيتوا الوش ما احمرش شغلوا الشواية ثواني لحد ما الوش يحمر
تصبوا الشربات السخن ...(مهم جدا جدا يكون سخن أوي )بالتساوي على البسبوسة كلها وما تقلقوش أول ما هتصبوها هتلاقيها ما اتشربتش على طول بس بعد شوية هتشرب كل الشربات ...تسيبوها بأة لحد ما تبرد خااااااااااااااااااااااااااااااااااااالص...وبعدين أقولكوا بألف هنا وشفا
استنواستنوا انتوا رايحين فين...انتوا ما سألتونيش هنعمل الشربات إزاي ؟؟؟؟؟؟؟؟؟ هقولكوا:
تجيبوا حلة وتحطوا فيها 2 كوب سكر وكوب ماء ومعلقة صغيرة عصير ليمون كل ده هتحطوه في الحلة على النار لحد ما يغلي تقريبا هياخد 8 دقايق لحد ما يغلي وبعدين تهدوا عليه النار خالص لمدة دقيقتين وممكن لو حابين تحطوا في الآخر خالص باكو فانيليا...وبس كده
سلاااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااام
الروابط المفضلة