اولا:خطواتى زى شخبوطه بالظبط وبجيب السمنه من الشرقيه
لكن بزود مع السمنه وهى بتسيح شوية ملح صغيرين علشان تستحمل التخزين
وبعد اذن شخبوطه اخدت صورتين منها
ومع الاستمرار فى التقليب حتى تصل الى
ولو تلاحظوا السمنه بتاعت شخبوطه فى الصوره التانيه او وانتوا بتقلبوا السمنه فى الصوره الاولى لونها مائل للخضار او فسدقى
ومع اللون ده بتتأكدى انها سمنه جاموسى
لكن لو اللون اداكى على اصفر بتكون بقرى
وقصدى من المعلومه ده ان السمنه الجاموسى اغلى واطعم من السمنه البقرى وفى ناس بتخلط التنين على بعض وتبيعهم على انها جاموسى
وبعدين بأصبر على السمنه شويه وهى بتسيح
مع التقليب المستمر علشان ماتتحرقش من تحت (المرته) وطبعا النار منخفضه
والخطوه اللى شخبوطه بتعملها مع الزبده
نضعها على نار هادئه مع التقليب الجيد
حتى يتبخر منها اللبن تماما
وبيكون لونه اصبح احمر خفيف
بتخاخذى السمن ولا تاخذى ما فى القاع
بنسميها فى مصر مورته
انا بعملها مع السمنه بالظبط و المرته ده هى اللى بتعمل المش عندنا فى مصر
ولما تحبى تخزنى السمنه لازم تكون العلبه ناشفه تماما
ثانيا:حنتكلم عن اسباب نجاح وفشل الكحك والغريبه والبسكوت
فى الاول انا حأضع سؤال واجابته انتوا عارفينه وده الرد على السمنه الساخنه والبارده
السمنه لما بتكون ساخنه بتكون العجينه سايبه
فأنت مضطره انك تزودى الدقيق
والدقيق لما بيزود بينشف الحاجه اكتر
مش معنى كلامى ان حاجتى ناجحه وحاجات النواعم فشله علشان معيار الدقيق عندهم اكتر
لأ الموضوع كله ان لكل شيخ طريقته
ولكل واحد المقادير اللى اعتمدها وغالبا بتكون من الست الوالده
الا وان كانت اجتهادات لما هو افضل
- اتفقنا ان الزبده وهى ساخنه بتكون محتاجه دقيق اكتر طيب امته استخدمها بارده من التلاجه وامته استخدمها بحرارة الغرفه استخدم السمنه بارده من التلاجه لما يكون معيارها كتير
يعنى لو حستخدم 2 كوب دقيق عليه 1كوب سمنه او 1 ونص لازم تكون ساءعه من التلاجه واستخدمها بحرارة الغرفه لما تكون مقدارها معتدل مع الدقيق يعنى لو 3 كوب دقيق عليهم كوب سمنه مثلا
- الغريبه بتاعتى كانت 2 كوب سمنه عليها 3 كوب دقيق يعنى السمنه اكتر من النص بالنسبه للدقيق فلازم السمنه تكون من التلاجه والخفق يكون سريع علشان ماديهاش فرصه تسيح وبعد خلط المقادير بتاعتى بدخلها التلاجه تانى نص ساعه او بعفر ايدى بالدقيق وانا بشكلها ولو الخليط سايط ومشعارفه امسكه خالص بسبب ان الدقيق فيه رطوبه يكون الحل زلال بيضه مع السمنه والسكر ولكن بعد خفقهم كويس وينزل عليهم سرسوب وسبب ان مقدارى كتير فى السمنه انى عايزه اكل غريبه مش بسكوت
- يكفى مسح الصاج بالزيت مسسسسسسسسح فقط علشان حلوياتى ماتفرشى يعنى عليه لمعة الزيت مش ملمسه
- لازم الفرن يكون ساخن جدا على الحراره المطلوبه علشان ماديش فرصه لحلوياتى انها تفرش فى الاول
- فى مقادير معينه بتكون محتاجه زلال البيض فقط والسبب تقدرى تكتشفيه من خصائص المارنج وخصائص المارنج انها هشه ومشناشفه وبتدوب فى الاكل
- اضافة صفار البيض فقط بينشف الحاجه اكتر فى الاكل
- تزويد السوائل زى اللبن والمايه اكتر من اللازم بينشف الحاجه اكتر فى الاكل زى الدقيق بيخليها مبلطه
- فى انواع من البسكوتات بعد ما بتحطى معيارك المظبوط من الدقيق بتحسى انك لازم تزودى دقيق تانى فالحل الافضل انك تزودى نشا وبرده علشان مايبلطش البسكوتات فقط
- واخيرا التزمى بالمقادير
- والدقيق لازم يكون كويس خالى من الرطوبه لانه بيكون سبب من اسباب الفشل وطرد السمنه منه
واتمنى ان اكون انا وشخبوطه افدناكم
الروابط المفضلة