ما هى طريقة عمل المحوجة

**ساسوسى** · 10-09-2009, 10:00 PM

السلام عليكم ورحمة الله وبركاتة
كل عام وانتم بخير .... رجاء منكن اخواتى الفاضلات من تعرف منكن طريقة عمل المحوجة تشرحها بالتفصيل مع المقادير الحقيقة انا دورت عليها على النت لقيت كل اللى موجود بيتعمل بالبيكنج باودر والعسل الأسود والطريقة دى على ما اتذكر لم تكن امى بتعملها وكانت بتستخدم النشادر معاها على اسس انها بسكويت فمن منكن تعرف تلك الطريقة ياريت تشرحهالى وربنا يجازيها خير وهبقى اديها حتة .....

**ام البنات ** · 10-09-2009, 11:40 PM

اول مرة اسمع الاسم الصراحة
لكن بما انك قلت انها بسكوت
فاتمنى يكون ده طلبك

✿* حلى متميز*✿بسكويت النشادر (بالتفصيل)خطوة خطوة

✿* حلى متميز*✿بسكويت بالنشادر والكاكاو

●•°حلى متميز°•● بسكويت النشادر (بسكويت العيد)

**ساسوسى** · 14-09-2009, 02:15 PM

جزاك الله خيرا أختى الكريمة ......والحمد لله استطعت ان اصل للوصفة التى اريدها بفضل الله وعملتها وطلعت النتيجة هايلة والحمد لله وكان ودى اصورها وانزلها للموقع بس ما أمكنش ... سأوضح المقادير والطريقة عساها تفيد أحد.والصراحة سبب اصراري على البحث عنها هو اننى لسه والدة جديد وزهقت من شرب الحلبة وكان نفسي فى المحوجة جدا لفوائها .
المقادير
كيلو دقيق
ربع كيلو محوجة بتجيبيها من العطار وهى مشهورة فى مصر معرفش بقى معروفة فى البلاد التانية وهى نفس خلطة المغات اللى بتتشرب فى الولادات الجديدة .
ونص كيلو سكر مطحون
وكوباية ونص زيت
معلقة نشادر
معلقة بودر وفانيليا
4معالق سمسم كبيرة
ماء دافي لعجن
الطريقة
نخلط الدقيق مع السكر المطحون مع المحوجة مع البودر مع النشادر مع الفانيليا ثم نعجنهم بالزيتنفرك المقادير بالزيت باصابع اليد حتى يختفي الزيت تماما ثم نعجن بماء دافي حتى تصير العجينة طرية هشة نأتي بصينية وندهنها بزيت درة ونرش في القعر سمسم ونأتي بالعجينة ونفردها وبحيث تكون قوامها متوسط لا رفيعة ولا سميكة او على حسب الرغبة لان فيه ناس بتحبها تخينة وناس بتحبها رفيعة وبترشى شوية زيت وتفرديه على سطحها وشوية سمسم كذلك وتسويها فى فرن متوسط الحرارة فى والشبكة بتكون فى نصف الفرن وبالهناء والشفاء.

**--ايمي--** · 25-09-2009, 07:24 PM

حبيبتي لسه كنت راحه اكتب طريقتها لقيتك لقيتيها الحمد لله انا من مصر من المنصورة بس عندنا اسمها اللقمه الخضرا ولازم كنا نعملها في العيد مع الكحك والبسكوت والغريبه والبيتي فور اساسي بس ياة فكرتيني بايام زمان لما كنت صغيرة انا لسه صغيرة بردة الحمدلله انك وصلتلها

**ام جمن** · 26-09-2009, 03:12 AM

بارك الله فيك . وكل عيد وانتي بخير

**votvot** · 01-10-2009, 12:58 AM

وفي بورسعيد اسمها اللقمة الصفرا أعتقد بس مافهمتش بعد مانفردها نقطعها قبل ولا بعد الخبز؟؟؟

**الأمل الحزين** · 03-10-2009, 04:21 PM

سلمت يداك

**قمراية** · 06-10-2009, 08:27 PM

اه دى فعلا جميلة بس ياترى الاقيها فى السعودية

**حبة اللؤلؤ** · 07-10-2009, 12:04 AM

دى عندنا اسمها القرصة بالعسل الاسود والمقادير
كيلو دقيق + نص كيلو زيت + عسل اسود للعجن+ تحويجة من العطار وهى تحويجة المغات بالحلبة المطحونة+ باكو بيكنج بودر + حبة البركة وسمسم للوجه
تفرد فى صينية وتقطع قبل دخولها الفرن وبتطلع جميلة ومغذية وجميلة فى الشتاء لانها بتمنح الطاقة وكمان بتبوظ اى رجيم بتعمليه ههههههه

**قصص الحب** · 16-10-2009, 04:56 AM

انا بعملها زى مقاديرك بالظبط بس ساعات بشيل السكر واعملها بالعسل الاسود بتكون جميله برضه وبتقطع بعد الخبز لانك لو قطعتيها الاول بتسيح فى الفرن وتطلع مش مقطعه بتقطع اول ما تخرج من الفرن وهى لسه سخنه
وتسلم ايدك يا قمر والحمد لله انك عرفتيها

انتقلت منتديات لكِ النسائية إلى هذا الرابط:
منتديات لكِ النسائية
هذا المنتدى للقراءة فقط.

الموضوع: ما هى طريقة عمل المحوجة

أدوات الموضوع

العرض