الي اخواتي ليبيات

السلام عليكم
اني حنعطيك الطريقة اللي نعرفها كانها اللي قصدك عليها
تاخدى شرائح الدجاج وتكون رقيقة نوعا وبعدين اتبليها بالزبادى والتومة والبصل وزيت الزيتون وخل وليم عصرى والدبايرزي الحرارات والفلفل الكحل اللي تحبيها كانك عليا اني انموت في حاجة سماها فلفل اخضر حار وهريسة عربية ونحطهم في الخلاط ولا الفود بروسسر وبعدين نحطهم على الدجاج ونخليهم منقعين فهم وبعدين تاخدى شرايح الدجاج وتبويخها باش اتطيب وممكن تلفيها في سلفر واتبويخيها وبعدين تاخدى كل شريحة وتحطى عليها بطاطا مسلوقة مكعبات وسفناري مسلوق مكعبات و شرائح زيتون اخضر واكحل وبعدين ترشي عليهم الجبنة اللي تبيها وتحطيهم في الكوشة لين تسيح الجبنة وتشد الخضرة وتاكلي بالهني

السلام عليكم حبوباتي
سامحيني نانا 79 عطلت عليك على خاطر ماكانش عندي كونكشن
المهم اللحم المفروم يكون طايب والفطيرة حتى هيا طايبة يعنى كله طايب في طايب غر تلايمية لبعض وتحطيه في الكوشة لحد ماتسيح جبنة الشرائح والجبنة اللي على وجه الفطيرة وانشاء تاكليها بالهني
شنوا رايكم اليوم نعطيكم حاجة حلوة اسمها بسكويت الكب كيك
المقادير
كوب سكر ناعم، 1 و نصف كوب كاسترد، 2كوب زبدة سايحة، 2 بيضة، ظرف فانيليا، 1ملعقة صغيرة مكومة بيكنج باودر، نصف كوب كورن فلكس الرز ، ونصف كوب من كورن فلكس الشوكلاته اللي تجي مكركبه ،2ونصف كوب دقيق (ممكن يزيد وممكن ينقص علي حسب نوع الدقيق المهم انك تزيدية بالتدريج باش لا تجي لا يابسة ولا رطبة) .
الطريقة تعجن كل المقادير مع بعض ويضاف الدقيق قبل مايضاف الكورن فلكس واخيرا يضاف الكورن فلكس وتعجن بخفة حتى ماتتكسرش حبوب الكورن فلكس وراهو العجينة تكون ايبس من عجينة الكيكة بشوية يعنى مش يابسة تعتبر سايلة نوعا ما وبعدين تكوني مجهزة الكواغط متع الحلويات الحجم الصغير تحطي فيها العجينة وتحطيها في الكوشة وراهو متقربيهاش لبعض على خاطر ادف بعضها وميجيش شكلها حلو وبعد مااطيب تخليها تبرد وبعدين تغطسي وجهها في الشكلاطة الكحلة وتحطي في النص حبة كورن فلاكس متع الشكلاطة وتخططيها بالشكلاطة البيضا يعني يطلع شكلها زي الكب كيك وصدقونى خفيفة علاخر ومنظرها نازك اني نحب ديمة نديرها وقت ماعندي مناسبة لانها فعلا حلوة والكورن فلكس اللداخل يخليها مقرمشة والكتاردا تعطيها بنه ولون اصفر غر جربوها وقولولي
واي سؤال اني حاضرة

ماشاءلله عليكم
لينا زمان علي البلاد والاكلات الجديدة

تعرفوا من كثر ماشجعتوني قلت لازم قبل مانرقد نعطيكم هالحلو تاكلوه مع القهوة العربية حاجة تانية
واسمه مثلثات الشكلاطة
المقادير : كوب زبدة طريه بحرارة الجو، 1/4 كوب زيت نباتي، 2ملاعق كبيره سكر ناعم، ظرف بيكنج باودر، كوب لوز محمص ومهروش، كوب فواكه معسلة ولا فواكه مجففه زي المشماش والزبيب غر الزبيب لازم مايقرض باش مايفترشهاش لما يطيب لانه ينفخ ، 1/4 كوب جلجلان محمص ، دقيق مايعجن.
الطريقة: تعجن المقادير مع بعض وبعدين تتشكل مثاثات سميكه تقريبا غلضها اقل من الصبع بشوية وبعدين تتطيب في الكوشة وتتلبس بالشلاطة الكحلة وتتخطط بالشكلاطة البيضا ولا العكس
ملاحظة: كان لاحظتى العجينة في الاول رطبة وبعدين يبست ماتخافيش ماهو فيها الزبدة جمدت ماعليك الا كل ماتبي تشكليها تسبكيها بايدك باش تسخن وتقدري تشكليها
حلوة حلوة ونويزكة وزي مانقولوا بنه وصنه ومنظر

الباين ناااااااااازكة
بس اليي مافهمتاش مقدار الزيت ؟؟
وانا نموت في الحاجات المعسلة
معندكش طرق حتي قديمة

بالنسبة للزيت صلحته كان خطأ مطبعي هوا ربع كوب زيت
اما للحاجات المعسلة ادللي توا نعطيك عندي هلبه حاجات عندي الحاجات الليبية وعندى غيرها انت قولي شن تبي وخدي عاد عارفة رمضان قريب ومايمشي معاه غر المعسل بالذات مع القهيوة العربية المزهره بعد الحوسه والواحد يتفرج على التلفزيون حاجة تانية ووله؟