الدونات با لصور
السلام عليكم أخواتي...
اليوم جبت لكم طريقة دونت محشي... وللأمانة هذي طريقة أختي عشان ما تزعل طريقته تاخذ شوية وقت، بس يستاهل لأن النتيجة تطلع شي لذيذ و يسوى التعب...وبتقولون باي باي دنكن دونت
نبدأ بسم الله...
هذا المقدار كبير ويفضل يكون في أحد معاكم يساعدكم...
بالنسبة لي أسوي أحياناً نص المقدار او ربعه إذا لي أنا وزوجي بس...
في العجانة نخلط هذي المقادير مع بعض:
كوب حليب دافي
1/3 كوب ماء دافي
3 ملعق كبيرة زبدة مذوبة
3/4 كوب سكر
1 ملعقة كبيرة خميرة فورية
رشة ملح
بيضة
بعدين نضيف عليهم 2/1 4 كوب طحين بالتدريج، ونعجن لين تصير عجينة متماسكة
نغطي العجينة بورق نايلون ونخليها ترتاح بس 10 دقايق...
في هالوقت نجهز:
1- صينية فرن ونفرشها ورق زبدة أو ندهنها بالزبدة...
2- نجيب الحشوة المفضلة، وتكون حسب الذوق أنا استخدمت مربى فراولة وكاكاو نوتيللا...تقدرون تستخدمون مربى تفاح للتغير أو كاسترد أو أي حشوة تحبونها...
3- وطبعاً ما ننسى القطاعات، إذا استخدمتوا أكثر من حشوة يفضل تخلون كل حشوة شكل عشان يسهل الإختيار وقت الأكل...
يعني مثلاً، الدونت المحشي فراولة على شكل قلوب، والكاكاو على شكل دوائر وهكذا...
بس هنا أنا استخدمت قطاعة دائرية، وإذا ما عندكم عادي استخدموا فنجال القهوة... والحجم يرجع لكم...
4- نجيب كيس نايلون كبير ونحط فيه تقريباً كوب سكر بودرة عشان نغطي فيه الدونت...
نجهز المكان اللي بنشتغل عليه ونرشه بالطحين... نقسم العجينة نصفين...
نرق العجينة تقريباً بسمك نصف سم، ونقطعهاحسب الشكل اللي نبيه...
بعدين نوزع الحشوة على نص الدوائر مو كلها
ندهن أطراف العجينة بالماي عشان لما نسكرها تلزق وما تنفتح وقت القلي...
نجيب النص الثاني من الدوائر ونحطه فوق العجينة المحشية...
نكبس الأطراف مع بعض ونسكرها زين، و إذا تلاحظون أنا برمت اطرافها عشان ما تسيح الحشوة وقت القلي...
نصف الدوائر المحشية في صينية الفرن اللي جهزناها... ونكمل بنفس الخطوات مع النص الثاني من العجينة...
نغطي الصينية بفوطة مطبخ ونتركها ترتاح لمدة 45 دقيقة...
نجيب مقلى عميق ونحمي فيه الزيت...
ملاحظة هامة: لازم يكون الزيت غزير، لكن ما يكون حامي كثير... إذا كان حامي كثير بيتحمر الدونت من برا ومن داخل بيكون عجين، فلازم تكون حرارته وسط...
و أول ما تحطين قطعة قلبيها على طول عشان ما تنفش وتتشقق...
قلبي القطع لين تتحمر وارفعيها على ورق مطبخ عشان يمتص الزيت...
و أول ما تخلصين قلي، جيبي كيس السكر اللي جهزناه وحطي فيه كل مرة 4 قطع دونت وسكريه زين وهزي الكيس لين يتغطى الدونت بالسكر وصفيه في صحن التقديم...
وطبعاً حلاته تاكلونه في نفس اليوم، هذا إذا بقى شي لليوم الثاني
جربوه و أنا متأكده بإذن الله إنه بيعجبكم... وبالهنا والعافية على بطونكم.
رد مع الاستدلال
الروابط المفضلة