مساء الخير على الجميع
صورت ليكم تورتة الملعب اللى عملتها لاخواتى الصغار بمناسبة فوز منتخبنا بكأس الامم الافريقية .
الفكرة انا اخذتها من المنتدى من فترة كبيرة و بصراحة ما فاكرة اسم صاحبة الموضوع لكن الله يجزاها كل خير مكان ما تكون لان الفكرة فعلا جميلة و الاطفال حبوها جداااااا .
الاول بنعمل كيكة اسفنجية او أى كيكة عادية بتتصبط معاكى و عندى فكرة أحسن أعمليها فى الكيكة لما تبوظ منك هههههههه
انا عملت طبعا كيكة عادية عشان سريعة عن الكيكية الاسفنجية و مقاديرها
3 بيضات - فانيليا - 1/2 كوب سمن - 1/2 كوب لبن او عصير برتقال - معلقة كبيرة بشر برتقال - 3/4 كوب سكر سنترفيش و يفضل طحنه - 1/2 باكو بودر -2 كوب دقيق
الطريقة
1- انا بستعمل المضرب الكهربائى و ممكن نستعمل الخلاط و عملت مقدارين من الكيكة عشان الملعب يكون كبير .
نضرب البيض مع الفانيليا 3 دقايق و بعدين نحط السكر و نضرب تانى و بعدين نحط السمن و العصير و البشر و نضربهم 5 دقايق و ما بتنضرب كتير و فى الاخر نضيف الدقيق المخلوط بالبودر و نضربهم حتى يتجانسوا تماما
2- ندهن صينية مستطيلة سمن و دقيق و نصب فيها الخليط و ندخلها فرن حار 0(سبق تسخينه على الاقل 20 دقيقة ) على درجة حرارة متوسطة و بتستوى بعد 40 دقيقة بالصبط
3- بعد ما تستوى نتركها تبرد تماما و نكون مجهزين خلطة الشيكولاته ( كوب لبن - كوب سكر - 1/2 كوب زيت - 2 ملعقة كبيرة كاكاو بودرة ) و ينضربوا كلهم بالخلاط و بيكون غليظ
4- باستخدام الوان الطعام بناخد اللون الاخضر و نخلطه على شوية جوز هند و بعدين ندخل جوز الهند الفرن عشان يجف
5- بعد ما بردت الكيكة بنصب عليها صلصة الشيكولاتة و نحدد الملعب بالخطوط البيضاء ( كريم شانتية عادى لكنه سائل قوى و غير متماسك ) و نرش جوز الهند الاخضر
6- اخر خطوة نرص اللاعبين و ما كان عندى لاعبين كفاية فعملت مباراة بين كوكب الارض و كوكب الهماتير ههههههههه
7- معلش ما فى صور كتير لانى كنت مستعجله بسبب اللى حواليا , لكن اهم شىء انهم اتبسطوا بيها كتير , و يارب تعجبكم انتم كمان .
الروابط المفضلة