السلام عليكم و رحمة الله و بركاته، الله يسعد أوقاتكن يا أحلى صبايا، من يومين عملت هالأكلة و أنا بحب الألوان كتيير و بعرف أنها بتعجب الأولاد يللي كل همنا و تعبنا من شانهن الله يحميهن و يخليهن،
شو بدكن بكتر الحكي تعالوا معي و شوفوا النتيجة.
أولا" المقادير:
العجينة: كوب طحين ، كوب سكر، ربع ملعقة صغيرة بيكنغ باودر،فانيليا، برش ليمون، أربع
أربع بيضات ، ملونات طعام ، علبة جيلي توت أو أي نوع بتحبوه***
صوص الشوكولا: فنجان صغير بودرة الكاكاو، 1،5فنجان صغير سكر ، 2فنجان صغير حليب، ملعقة كبيرة نشاء ، 2 ملعقة كبيرة زبدة ***
ثانيا" الطريقة:
بالنسبة لصوص الشوكولا:
نمزج المقادير المذكورة مع بعض على البارد ، نخلطها منيح و بعدين نضعها على النار مع التحريك حتى تنطبخ و تصير سميكة، بعدين نرفعها عن النار و نتركها على جنب و بس تبرد منستخدمها***
بالنسبة للجيلي منعملو حسب التعليمات المكتوبة على العلبة و الكل بيعرفها، بعدين بيصينية مستطيلة منغلفها بالنايلون و منسكب الجيلي و منحطو بالبراد حتى يجمد***
طيب منجي للسويس رول :
* نخفق البيض مع الفانيليا و برش الليمون جيدا" و بعدين السكر و آخر شي الطحين و البيكنغ باودر، حتى تصير عجينة سميكة شوي ، أحيانا" بيكون البيض كبير شوي منحتاج نزود شوية طحين .
*نحضر صينية مستطيلة و نفرد فيها ورق الألمنيوم و ندهن بالزيت.
*نقسم العجينة 3 أقسام :نضيف لون أحمر للقسم الأول و نخلط حتى يصير لون العجينة أحمر.
نضيف لون أخضر للقسم التاني و نخلط حتى يصير لون العجينة أخضر.
القسم الأخير نتركه على حالو.
*نفرد القسم الأول الأبيض بشكل عشوائي حسب الصورة.
*الآن القسم الأخضر .
*أخيرا" نملأ الفراغات بالأحمر و نسوي الأطراف .
*منكون مشعلين الفرن قبل ما نبدأ ، ما تآخذوني نسيت قول من الأول.
*ندخل الصينية إلى الفرن و الحرارة متوسطة و من تحت فقط لمدة 10 دقائق مجرد بس تنشف العجينة ما منخليها تتحمر ، لازم تبقى طرية مشان تلف معنا.
* الآن منشعل من فوق دقيقة وحدة بس.
*نخرجها من الفرن و منطالع العجينة عن الورق و منرجع منلفها بنفس الورق و نتركها شي نص ساعة حتى تاخد الشكل الملفوف.
* الآن نرجع نفردها و ندهنها بصوص الشوكولا و بعدين نضع فوقه الجيلي و نلف بشكل جيد و بعدين نرجع و نلف بورق الألمنيوم و نحكم اغلاقها و نضع اللفافة في البراد لليوم التاني حتى تبرد و تتماسك.
* تاني يوم شو منعمل يا شطورين؟؟
صح يا رغود: منقطعها و نحطها بالصحن و بعدييييين مناكلهاو ألف صحة و هنا للجميع***
طولت عليكن و وجعت راسكون ، يلا شوفوا الصور مشان تغيروا رأيكن***
الروابط المفضلة