صبايا مرحبا حبيت أقدم لكم هاي الأكلة اللذيذة ، في ناس بيسموها الأقراص أو الأقراص بالحليب أو الأقراص على الطابع و هي بتشبه الكليجة العراقية، المهم تعالو شوفوا المقادير و الطريقة و مو مهم الأسم.
المقادير:
4 كيلو طحين، 1كيلو حليب، 1كيلو سكر، 1كيلو سمنة أو زبدة، ملعقة كبيرة شمرة، نص ملعقة محلب، ملعقة كبيرة يانسون، حبة البركة، جوز هند حسب الرغبة مو ضروري، 2 ملعقة كبيرة خميرة،1ملعقة صغيرة بيكربونات الصودا،1 فنجان صغير زيت،كوب ماء فاتر لنقع الخميرة.
الطريقة:
ننقع الخميرة بالماء الدافي بعدين نعجن المقادير مع بعضها منيح حتى يصير عنا عجينة متماسكة و نتركها ترتاح كتيير ممكن نعجنها من الليل و الصبح نشتغل فيها كل ما ارتاحت العجينة أحسن.
نرق العجينة و نقطعها دوائر كبيرة و نزخرفها بالقالب الخاص بها شوفوا الصورة.
اذا ما عندكن منو ممكن تعملوا أشكال على ذوقكن.
نخبزها في فرن حامي و بعدين متوسط الحرارة أول من تحت بعدين من فوق.
بس خلص استنوا لحتى يبرد تمتما و بعدين كلوا مع ألف صحة و هنا لا تنسوا تعملوا معو شاي هو عادة بالقرى بيعملوا معو متة اذا بتعرفوها.
احزروا شو صار معي و أنا عم اشتغل،كنت عاملة فنجان قهوة و حاطتو جنبي و جنبو الفنجان يلي ناقعة فيه الخميرة و من غير ما انتبه اخدت فنجان الخميرة بدل القهوة، و لو تشوفوا الطعمة كتيييير طيبة الله لا يدوقها لحدا. بلا كتر حكي شوفوأ الصور و قولولي رأيكن و ادعولي اذا حبيتوها.
الروابط المفضلة